Atyraý oblysyndaǵy Qıǵash ózeni arnasyn buzyp ketkeli tur

ATYRAÝ. 21 mamyr. Oblystyń Qurmanǵazy aýdanynda Qıǵash ózeni arnasynan tasyp, jaǵadaǵy bógetti buzyp ótýdiń qaýpinde tur. Bul týraly KTK telearnasynyń aqparyna súıengen egemen.kz tilshisi habarlady. Edildiń iri salasy bolyp keletin Qıǵash ózeni boıynda ornalasqan Jylandy aýylynyń halqy sońǵy 3-4  kúnnen beri kúni-túni darııa jaǵasynda kezekshilikke uıymdastyryp, eldi mekendi tasqyn sý basyp qalmaýy jaǵyn qarastyryp jatyr. Osyǵan oraı tipti mektepte sabaq ta toqtatylyp, joǵary synyp oqýshylary arna toǵanyn kúsheıtý jumystaryna qatystyrylyp jatyr. Jylandy aýylynda 2,5 myńǵa jýyq halyq turady. Olardyń iske jaramdy kisileriniń bári qazir osy toǵan bekemdeý naýqanyna tartylǵan. Al Qıǵash ózeni taıaq tastam jerde býyrqanyp aǵyp jatyr. «Elge qaýip tónip turǵan joq, bári halyqtyń kúshimenen saǵat 6-ǵa deıin osy ustap shyqty. Eki kúnnen beri osy mektep damby salýda. Kesheden beri sabaq toqtatyldy. Muǵalimder de beri osynyń basynda. Biraq jergilikti basshylar munyń bárin joqqa shyǵaryp, jaıbaraqat otyr. Bulardyń sózine sensek, esh mekeme jumysyn toqtatpaǵan, al qaýip seıilgen», - deıdi aýyl turǵyndary. «Sýdy toqtata almasaq, qujattaryńyzdy daıyndap kóshýge daıyn otyrýdy eskerttik. Biraq jastar jaǵy tańǵy 4 jarymǵa deıin eki kún jumys jasady. Sonyń nátıjesinde eldi mekendi qorǵap qaldy», - deıdi aýdan ákimi Bıboz Shaıahmetov. Qazir Qıǵashqa Volgograd qoımasynan sekýndyna 26 myń tekshe metr sý kelip túsýde. Reseı jaǵy sonymen qatar mundaı mólsherdegi sýdyń 6 maýsymǵa deıin jiberiletinin eskertken eken. Soǵan qaraǵanda, Qıǵashtyń tasýy qaýpi jaqyn arada seıile qoımaıtyn sııaqty. Joldasbek Shópeǵul. Derek, foto: KTK.