Áskerı dáriger

5 jasar búldirshindi ólim aýzynan alyp qaldy Qoınaýy keń Qordaı aýda­nynyń jurtyna osyn­daǵy Otar aýyly mańynan oryn tepken áskerı bólim­shelerdiń kómegi óte kóp. Bul bir jaǵy jumys kózi bolsa, bir jaǵy áskerı bólimshelerdiń tehnıkasy da, mamandary da osy tóńirektegi aýyldarǵa járdemin jıi tıgizip tura­dy. Jaqynda 63302-áskerı bóliminiń dáriger­leri klınıkalyq ólim aýzynda jatqan qyz balany qutqaryp qaldy. 5 jastaǵy Alına sý toltyrylǵan sıs­ternaǵa qu­lap, tunshyǵyp qalǵan eken. Ony taýyp alǵandar jaqyn mańda ornalasqan emdeý meke­mesine, Otardaǵy 63302-áske­rı bólimshesiniń jekelegen medısınalyq jasaǵyna jetkizgen. – Qyz bala klınıkalyq ólim aýzynda jetkizildi. Onyń teri qabaty sup-sur, sýyq boldy. Demalýy men júrek qaǵysy bolǵan joq. Kóziniń qarashyǵy barynsha keńeıip ketken. Ony birden anestezııa jáne jan saqtaý bólimshesine alyp ketti, – deıdi medısınalyq bólim bastyǵy, podpolkovnık Abaı Rysqulov. Qazirgi ýaqytta jas qyz­dyń jaǵdaıy jaqsy. Esin jıdy, týystaryn tanı bastady. О́zdiginen tamaqtanady, sý ishe alady. Búldirshindi ólim aýzynan alyp qalǵan medısınalyq bólim bastyǵy Abaı Rys­qulov: «Bul meniń jumy­sym. Biz bala, eresek, áske­rı qyzmetshi nemese azamat­tyq adam dep bólip-jarmaı­myz.  Biz úshin birinshi kezekte olardyń barlyǵy emde­lýshiler. Bizge jol-kólik apatynan zardap shekkenderdi jıi ákeledi. О́ıtkeni, janymyzda Almaty-Qordaı tas joly ornalasqan. Onyń ústine barlyq jaqyn ornalasqan aýyl­dardyń turǵyndary kómekke júginedi», deıdi aǵynan jarylyp. Áıtse de dárigerdiń jan­keshti eńbegi basshylyq tarapynan eleýsiz qalmaıdy degen oıdamyz. Oralhan DÁÝIT, «Egemen Qazaqstan» Jambyl oblysy