Qurban Berdyev pen «Spartak» arasyndaǵy kelissóz toqtatyldy

ASTANA. 1 maýsym. О́tken dúısenbi kúni Máskeýdiń «Spartak» klýby men belgili fýtbol mamany, Dondaǵy Rostovtyń «Rostov» komandasynyń bas jattyqtyrýshysy Qurban Berdyevtyń ókili arasynda kelissóz júrdi. Málimetter boıynsha, Máskeý klýbynyń basshylyǵy oǵan 2 mıllıon eýro kóleminde jalaqy usynǵan. Bul týraly matchtv.ru saıtyna silteme jasaǵan egemen.kz tilshisi habarlady. Biraq kelissóz Qurban Berdyevtyń ótinishimen toqtatylypty. Ol muny «Rostov» klýbymen aradaǵy qarym-qatynastyń áli sheshilmegeninen baılanystyrǵan. Osy oraıda atalmysh klýbtyń vıse-prezıdenti Aleksandr Shıkýnov bas jattyqtyrýshymen arada bastalǵan kelissózdiń nátıjesi dúısenbi kúni keshke qaraı belgili bolatynyn aıtty. Ol óz sózinde sondaı-aq bapkermen kelisimsharttyń budan ári jalǵasýy múmkin ekenin atap ótti. Búgingi kúnniń málimetine qaraǵanda, «Rostov» klýby fýtbolshylardyń jalaqylaryn áli tolyq tólep úlgermegen eken. Al Qurban Berdyev munyń aldynda sol qaryzdar 27 mamyrǵa deıin tólenbese, óziniń klýbtan ketetinin málimdegen edi. TASS aqparat agenttigi habarlaǵandaı, oıynshylar bıylǵy jyldyń naýryz aıynan beri jalaqy kórmegen. Komanda chempıonatta alǵan ekinshi oryndary úshin bólingen syıaqyna da áli almaǵan. Degenmen, klýbtyń 28 mamyrdan bastap qaryzdardy tóleı bastaǵany belgili boldy. Aıan Ábdýálı. Derek, foto: matchtv.ru.