Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyulynyń qasıetti Ramazan aıyna baılanysty halyqqa úndeýi

Asa qamqor, erekshe Meıirimdi Allanyń atymen bastaımyn! Qurmetti otandastar, baýyrlar! Bar­shańyz­­dy kúlli musylman balasy saǵyna kútken, berekeli, qasıetti Ramazan aıynyń kelýimen shyn jú­rek­ten quttyqtaımyn. Ramazan múbárak bolǵaı! Ramazan – jalpyǵa ortaq izgi amaldar maýsymy. Oraza – tárbıe, sabyr, qaıyrymdylyq, izgilik mektebi. Ramazan – qaıyrymdy jandar úshin úlken múmkindik. Orazada jasalǵan Jaratýshy Iemizge unamdy árbir qaıyrly is – úlken saýap. Paıǵambarymyz Muhammed (Allanyń oǵan salaýaty men sálemi bolsyn) bir ósıetinde: «Adamdardyń jaqsysy – elge paıdasy tıgenderi», – degen. Adam qalaı nıet etse, sol maq­satyna jetedi. Ár pende saýapty amalymen, taqýalyǵymen Allanyń aldynda dárejesi artady. Jomart, janashyr azamattardy, kásipkerlerdi kómekke muqtaj adamdarǵa qamqorlyq kórsetýge, máselen, sý tasqynynan úısiz, sharasyz qalǵan otandastarymyzǵa qaıyrymdylyq jasaýǵa, tabıǵı apat saldarynan buzylǵan úılerdi jóndeýge qolushyn berýge, jetim men jesirge meıirimdilik tanytyp, qaraýsyz qalǵan qarttarǵa kóńil bólýge shaqyramyn. Zeket berý – jaǵdaıy kelgen (sharıǵat boıynsha nısap mólsherine jetken) musylmanǵa paryz. Al zeket berekeli Ramazan aıynda berilse, onyń da saýaby eselenip jazylady. Qasıetti aıdyń qurmeti úshin azyq-túlik, kókónis pen turmystyq zattarǵa jeńildik jasalyp, Qudaıy astar men sadaqalar aýyzashar ýaqytynda uıymdastyrylsa, toılar ishimdiksiz ótkizilse, jamandyqtyń bas­taýy bolǵan araq-sharaptyń satylýyna barynsha jol berilmese degen tilegimdi bildiremin. Sonymen qatar, kópshilik jurtqa orazanyń ár kúninde bir jaqsylyq jasaýdy josparlap, osynaý saýapty amaldardy yqylaspen oryndaýǵa, Allanyń árdaıym bizge úzdiksiz násip etetin nyǵmetterinen sadaqa berýge shaqyramyn. Izgi amaldar Ramazannan keıingi aılarda da jalǵasyn tapsa ıgi. Ramazan – birlik aıy. Osy aıda beriletin aýyz­asharlar aǵaıyn-jurttyń arasyn jaqyndastyryp, ıgi is-sharalar men qaıyrymdylyq aksııalar halqymyzdy senimi men násiline qaramaı, ortaq maqsatqa úndeıdi. Búkil álemniń Jaratýshysy barsha adamǵa: «Bólinbeńder», – dep baýyrmal bolýǵa buıyrǵan. Birligi kúshti eldiń berekesi artady. Birligimizge bekem bolaıyq! Qadirli jamaǵat! Saýaby eselenip jazylatyn qasıetti aıda jasaǵan amaldarymyz ben izgi nıetterimizdi Alla Taǵala qabyl etkeı! Áýmın!