«Syrǵalym» telehıkaıasy tatar elinde kórsetilýde

«Qazaqstan» ulttyq arnasynan kórsetilip, kópshiliktiń ystyq yqylasyna bólengen «Syrǵalym» teleserıaly tatar tiline aýdarylyp, qazir Tatarstanda kórsetilip jatyr. Ony «Qazaqstan» teleradıokorporasııasynan eki birdeı telearna satyp alǵan. Á degennen-aq, kórermenderdi ózine baýrap alǵan «Syrǵalym» qazir kópshiliktiń kúndelikti asyǵa kútetin súıikti serıalyna aınalypty. Tatarstan telearnasy qyzy­ǵýshylyq tanytqanda, qazirgi qoǵam azamattarynyń kókeıindegi alýan suraqqa osy fılm arqyly jaýap izdeýdi jón kórgen bolýy kerek. Sonymen qatar, qazaqstandyqtar túsirgen hıkaıa da sheteldik televızııa mamandarynyń nazaryna iligipti. Qazir jergilikti «Tatarstan – jańa ǵasyr» jáne «TNV Planeta» degen qos birdeı arnada qazaq kınotýyndylary tatarsha sóılep jatyr. Tatarstannyń basty telearnalary «Syrǵalymdy» osy jyldyń aqpan aıynan kórsetýdi bastady. Barlyǵy 48 serııadan turatyn telehıkaıa efırde kúndelikti tańerteń, keshke jáne tún mezgilinde, ıaǵnı úsh márte kórsetiledi. – Biz «Qazaqstan» telera­dıokorporasııasynyń ónimde­rimen tanysyp, tatar kórer­menderi úshin de qyzyqty týyn­dylar bar ekenin kórdik. Biz­diń tarıhymyz ortaq, mádenıetimiz jaqyn. Sondyqtan, tatar hal­qyna qazaqtardyń qazirgi ty­nys-tirshiligi, ómiri qyzyq bolady dep osy serıalǵa toqtadyq. Kórermenge unaǵan soń «Syr­ǵalymnyń» ekinshi bólimin de satyp aldyq», – deıdi «Tatar­stan – jańa ǵasyr» telearnasy bas dırektorynyń orynbasary Zýfar Zakırov. Dýblıaj isiniń birqatar mamandary teleserıaldy barynsha shynaıy aýdaryp, kórermenderge usynýda. Dybysyn jazý úshin kásibı akterler kún-tún demeı jumys istep jatyr. Nátıjesinde, baýyrlas el qazaqstandyq ónim­di jaqsy qabyldady. Qazir Tatar­standaǵy reıtıngi joǵary telehı­kaıalardyń biri bolyp sanalady. – Dýblıaj jumysyn júrgizý bizge asa qatty qıyndyq týdyrǵan joq – tilimiz ben dilimiz ortaq bolǵandyqtan, ońaı. Bizge negi­zinen mátin orys tilinde keledi. Biraq keıbir sátterde qazaq ti­lindegi túpnusqaǵa qarap otyryp, tikeleı aýdaramyz. Mine, osyndaı kezde akterlerdiń emosııa­syn burmalamaı, shynaıy berýge bolady, – deıdi dýblıaj bóliminiń jetekshisi Alfııa Iаrosh. – Qazaqtyń bul serıalynan janym rahattanady. Eńbektegen baladan, eńkeıgen qartqa deıin kórsetedi. Eń bastysy, Batystyń fılmderinde beleń alǵan uıat­syzdyq, zorlyq-zombylyq «Syr­ǵalymda» múldem joq. Qaıta tatardyń mádenıetimen sabaqtas qazaqtyń salt-dástúri, úlken kisilerdiń óskeleń urpaqqa aıtatyn ulaǵatty sózderi, jastardyń qart kisilerge qurmeti t.b. sekildi tamasha adamı qasıetterge kýá bolamyz, – deıdi Qazan qalasynyń turǵyny Neılıa Kýzına. Aıta keteıik, «Qazaqstan» RTRK» AQ saıtynda telekó­rermenderdiń daýys berý nátıje­sinde «Syrǵalym» «2014 jylǵy úzdik hıkaıa» júldesin jeńip alǵan. Al basty róldi somdaǵan Juldyz Mahanova «2014 jyly áıel rólin somdaǵan úzdik aktrısa» nomınasııasyn ıelengen bolatyn. Aıan ÁBDÝÁLI, «Egemen Qazaqstan»