Aǵaıyndy sıqyrshylar

Eki jigit sahnaǵa shyqty da, aldymen ustaranyń júzin kó­rer­menderge ustatyp, qaǵaz tilip kórsetti. Sonan keıin onyń birnesheýin shyqyrlatyp jep qoıdy, artynan aýzyna jip salyp jiberip, álgilerdi tizip shyǵardy. Bul kórinis neshe ret kórse de, kórermenniń denesin titirkendiredi, tańǵaldyrady. Osyndaı túrli kórinistermen bir sátte kóptiń kóńilin alýan túrli qubyltatyn sıqyrshylar Tórehan Jumanov pen Asan Taıyralıevtiń esimderin qazir Qostanaı jurtshylyǵy jaqsy bilip qaldy. Jap-jas balalardyń osy ónermen aınalysa bastaǵanyna bes jyldaı ýaqyt boldy. Búginde Tórehannyń jasy 21-de bolsa, Asan 16-ǵa endi toldy. Jastyǵyna qaramastan, olar Almaty, Astana qalalary men Reseı sahnalarynda óner kórsetip úlgerdi. Sıqyr áleminiń juldyzy sanalatyn aǵaıyndy Safronovtarmen, komedııalyq aktrısa Marına Fedýn­kıvpen bir sahnada óner kórsetti. Eń qyzyǵy, sıqyrshylyqty eki jasqa esh­kim úıretken joq, olar túrli áde­bıetten, ınternetten ózderi izdenip, meńgergen. – Biz ataqty sıqyrshylar bas qosqan jıyndarǵa baryp turamyz. Olarmen birge sah­naǵa shyǵamyz. Negizinen, sıqyr­shylyqtyń syryn ashatyn áde­bıetterden úırenip, ózimiz jat­tyqtyq. Sıqyrshylyq túr-túrge bólinedi. Biz sonyń ár túrine mashyqtanyp kelemiz, – deıdi Asan Taıyralıev. Qos jigit sıqyrshylyq ónerdi ómir, turmys saltyna aı­nal­dyrypty. Biraq ózderi basqa mamandyq alǵysy keledi. Asan Qostanaı ekonomıkalyq kolledjinde oqıdy, Tórehan kolledj bitirip, jumys isteıdi. Sıqyrshylyq – bizde asa damyp ketpegen óner. Qostanaı óńirinde osy kezge deıin bul ónermen sahnaǵa shyqqan eshkim bola qoıǵan joq. Bul óner uzaq jattyǵýdy, eńbekti qajet etedi. Sıqyrshylar aldaǵy ýaqytta sheberligin damytyp, úlken sahnalarǵa shyǵýdy maqsat tutyp júr. Olar bos ýaqyttarynda izdenisten jalyqpaıdy. Názıra JÁRIMBETOVA, «Egemen Qazaqstan» QOSTANAI