Qostanaı jurty Qobylandy batyrmen qaýyshty

Qostanaı qalasynyń qaq tórinde týǵan jerdiń aıbaryn­daı Taıbýrylyna minip, qoly­na kók súńgili naızasyn usta­ǵan Qobylandy batyrdyń eńseli eskertkishi boı kóterdi. «Qo­by­landy batyr» jyryn oqymaǵan qazaq kem shyǵar. Qazaqtyń has batyry ár qazaqtyń jadynda erlik pen eldiktiń nyshanyndaı jazylyp qalǵan. Boı kótergen eskertkishi týǵan jerdiń ár súıem jerin syrtqy jaýdan qorǵaǵan halqymyzdyń bar batyrynyń beınesi sekildi elesteıdi. Elimiz Táýelsizdiginiń 25 jyldyǵy toılanatyn jyly ulttyq rýhty aspandatatyn mundaı mazmundy eskertkishtiń Arqa tórinen oryn alýy zańdy edi. – Elimizdiń táýelsizdigi, jeri­mizdiń amandyǵy úshin kúresken uly babalar erligin dáriptegende ǵana jas urpaqty eldikke tárbıeleımiz. Sonda ǵana táýelsizdigimiz baıandy, Máńgilik El bolamyz, – dedi es­kertkishtiń ashylý saltanatynda Qostanaı qalasynyń ákimi Bazyl Jaqypov. Belgili akademık Saǵyndyq Satybaldın, Saǵa­dat Nurmaǵambetov atyndaǵy qaıyrymdylyq qorynyń prezı­denti Mahmut Nálibaev Qostanaı jurtyn quttyqtaýmen birge, qor­dyń osyndaı ıgilikti isterge muryn­dyq bolyp otyrǵanyn tilge tıek etti. Búginde qordyń eli­mizdiń alty oblysynda fılıaly bar. Demeýshiler jınaǵan qar­jynyń arqasynda Jambyl, Ońtústik Qazaqstan, Qyzylorda oblystarynda Qajymuqanǵa, Iman­júsipke eskertkishter ornatyldy, ózge de qaıyrymdylyq ister tyndyryldy. Mine, Qoby­landy batyrǵa ornatylǵan záýlim eskertkish te qordyń Serikbaı Beısetaev basqaratyn Qostanaı bólimshesiniń atqarǵan jumystary negizinde júzege asty. Tamasha týyndyny músinshiler – aǵaıyndy Ábdikárim jáne Ábdimútálip Ahmetovter jasap shyqty. Qazaq halqynyń máńgilik erlik ónegesine aınalǵan, orta ǵa­syr­dyń Altyn orda, Noǵaı orda­sy dáýiriniń asa kórnekti tulǵasy Qo­bylandy batyrǵa eskert­kish ornatylýyna oraı uıym­dastyrylǵan respýblıkalyq ǵylymı-prak­tıka­lyq konferensııa jalpy jı­nalǵan jurtshylyqqa ta­ǵy­lymdyq jaǵynan úlken áser etti. Oǵan eli­mizge belgili jazýshylar, tarıh­shy ǵalymdar qatysyp, tereń de mazmundy baıandamalar jasady. Názıra JÁRIMBETOVA, «Egemen Qazaqtan» QOSTANAI