Kók Týdyń jelbiregeni – elimniń asqaq bedeli...

*4 maýsym – Qazaqstan Respýblıkasynyń Memlekettik rámizder kúni Sóz joq, janyńa qýat beredi. Astananyń qaq ortasyndaǵy Týtóbege kóz tikseń, kádimgideı boıyńdy bir keremet sezim bıleıdi. Rýhtanyp qalasyń. Azattyq týraly uǵym-túsiniktiń arqaýy Týtóbe ispetti. Baıraǵy bar, Eltańbasy bar, Ánurany bar elderdiń qataryn tolyqtyrǵanymyzǵa bıyl, Qudaı qalasa, shırek ǵasyr tolady. Táýbe etetinimiz, tórtkúl dúnıede sany qazaqty eki-úsh orap alatyn qanshama halyq azattyǵyna áli kúnge deıin qol jetkize almaı otyr. Soǵan qarap, shúkirshilik etemiz. Qaırattana túsetinimiz – shekaramyzdy shegendep, táýelsizdiktiń tolyq nyshandaryn túgendep alǵanymyzben, qaýipsizdik bulty áli seıile qoıǵan joq. Sol sebepti, burynǵydan da patrıot, burynǵydan da ultjandy bolýymyz kerek. Patrıottyq demekshi, Otanǵa degen súıispenshilik memlekettik rámizderdi ardaqtaýdan bastalady emes pe?! Aıtpaqshy, byltyr «Qazaqstan Respýblıkasynyń memlekettik rámizderi týraly» Konstıtýsııalyq Zańǵa engizilgen ózgerister men tolyqtyrýlar patrıotızmdi ulyqtaý sharalarymen astasyp jatyr. Sondaı-aq, zańda memlekettik rámizderdi qoldaný tártibin keńeıtý, nasıhattaý jáne olardy qoldaný jóninde Úkimettiń jáne ýákiletti organnyń quzyryn naqtylaý, Qazaqstan Respýblıkasynyń Memlekettik rámizderi kúnin atap ótýdiń erejesin ázirleý qarastyryldy. –       Eldiktiń belgisi ǵoı, jyl saıyn 4 maýsymda elimiz­de Memlekettik rámizder kúni mere­ke­lenedi. Osy kúni saltanatty túrde Qazaqstan Respýb­lı­kasynyń Týy kóterilip, Qazaqstan Res­pýblıkasynyń Memlekettik Gım­ni oryndalady. Aıtpaqshy, búgin Otanymyzdyń túkpir-túk­pirinde bir mezette saǵat 12.00-de Ánuran shyrqalatyn bolady. Sondaı-aq, Memlekettik rá­mizder kúnin merekeleý sheń­berinde jańa nysandardyń ashylýy, ákimshilik memlekettik qyzmetshilerdiń ant qabyldaýy, medaldardy, tósbelgilerdi, vedomstvolyq nagradalardy, qurmet gramotalary men alǵys hattardy tabystaý júzege asyrylady. Kitaphanalar men mýzeılerde Memlekettik rámizderge arnalǵan taqyryptyq kórmeler men ekspozısııalar ótkiziledi. Memlekettik rámizderdi dárip­teýge, óz eline degen maqta­nysh jáne Otanyna degen súıis­penshilikti qalyptastyrýǵa, tárbıeleýge baǵyttalǵan budan da basqa konkýrstar, vıktorınalar uıymdastyrylady. Osynyń barlyǵy Qazaqstan Respýblıkasy Úkimetiniń arnaıy qaýlysymen bekitilgen, – deıdi Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń bas sarapshysy Jomartbek Aımenov. Osylaısha quzyrly oryndar tarapynan óskeleń urpaqtyń sanasyna ultjandylyq rýhyn, patrıotızm nárin sińirýde úlken sharalar atqarylyp jatyr. Jastarymyzdyń ózderiniń de memlekettik rámizderdi erekshe baǵalaıtynyna kýá bolyp júrmiz ǵoı. Ásirese, týǵan elden jyraqta júrgen qazaqstandyq stýdentterdiń Kók baıraqty kóterip túsken sýretteri osynyń dáleli. Bıylǵy ótken Parlament Májilisiniń saılaýyna baıqaýshy retinde qatysqan Reseı Memlekettik Dýmasynyń vıse-spıkeri Vladımır Vasılev qazaqstandyqtardyń memlekettik rámizderin joǵary baǵalaıtyndyǵyna rıza boldy. «Saılaý ýchaskeleri ashylar tusta, tańǵy saǵat 7-de Memlekettik Gımnniń oryndalýy óte qatty unady. Barlyǵy qolyn júrek tusyna qoıyp, aqyryn shyrqady. Maǵan qatty áser etti», – dedi ol. Memlekettik rámizderdi kúlli dúnıege tanytýdyń, óskeleń urpaqqa ultjandylyq rýhyn darytýdyń eń bir ozyq dástúri sportshylardyń jetistikteri bolyp tabylady. Al onyń ishinde Olımpıadanyń orny bólek. Memlekettiń mártebesin kóterip, rámizderin asqaqtatatyn oıyndar. Elimiz táýelsizdik alǵaly beri jazǵy Olımpııa oıyndaryna eki márte tý ustap shyqqan (Atlanta, Sıdneı) Ermahan Ybraıymov qana. Afına Olımpıadasynda bul qurmetke Ashat Jitkeev ıe bolsa, Beıjińde Baqyt Ahmetov alyp shyqty. Londonda Nurmahan Tinálıev Kók týdy jelbiretken Olımpıadada qazaq sportshylarynyń mereıi ústem boldy. Al aldaǵy Rıoda Kók týdy ustaýǵa laıyqty oǵylandarymyz jetkilikti. Endeshe, Brazılııa tórinde Kók týymyz jelbirep, Ánuranymyz san ret shyrqalady dep senemiz. «Kók týdyń jelbiregeni, Qazaqtyń asqaq bedeli» emes pe! Ǵabıt ISKENDERULY, «Egemen Qazaqstan»