ASTANA. 4 maýsym. Úndistannyń shyǵys jaǵyndaǵy provınsııalardyń birinde 4 qoly, eki aıaǵy bar sıam egizderi dúnıege keldi. Olardyń ishki organdary túgel derlik birge jaratylǵan bolyp shyqty. Bul týraly ras.kz-ke silteme jasaǵan egemen.kz tilshisi habarlady.
Qaryndary birge jaratylyp, bir-birlerimen jabysyp týǵan perzentterdiń biri ul, ekinshisi qyz eken. Olardyń 24 jastaǵy anasy Shıvradjo Devı ekiqabat kezinde dárigerdiń keńesine qaıta-qaıta baryp, tekserilip júrip, egiz balalar týatynyn bilmepti. Al sıam egizderi jaıynda oı úsh uıyqtasa da túsine kirmegen. Tekserilý kezinde kelinshek tipti birneshe ret ÝZI jabdyǵynan da ótken kórinedi. Sonda ishte egiz balalar jatqanyn, olardyń bir-birlerimen jabysyp qalǵanyn eshkim de baıqamaǵan.
Áıel balalaryn jeke klınıkalardyń birinde bosanypty. Biraq sıam egizderi týylǵannan keıin dárigerler olardy budan góri áleýeti joǵary, jaǵdaıy jaqsy emhanaǵa aýystyrǵan. Sodan keıin balalardyń jaǵdaılary jaqsarǵan.
Jas ata-ananyń ókinishine oraı, sońynan balalardy Delıge áketip emdetý kerektigi aıtylǵanda, bular soǵan baratyn jáne em-domǵa jumsaıtyn aqsha taýyp bere almaǵan. Sol sebepti de olar balalaryn úılerine alyp qaıtýǵa májbúr bolǵan.
«Meniń júregim qatty jaraly, – deıdi balalardyń anasy. – Dárigerler biraz úmit kútip edim, olardyń ómirlerin saqtap qala alady ǵoı deýshi edim. Sol dárigerler bizden teris aınaldy. Men endi ne isterimdi, balalarǵa ne bolaryn bilmeımin».
Sıam egizderiniń 30 jastaǵy ákesi Chhota Sıngh budan buryn mundaı egizder bolatyny jaıly estip kelgenimen, ózderin kórmegenin aıtady. Bulardyń munyń aldynda eki balasy bar eken. Olar solardyń qataryna taǵy bir bala qosylady dep úmittenipti. Alaıda, sıam egizderin kórgende, kózderi tas tóbelerine shyqqan.
Úndi dárigerleri balalardyń ishteri birge jaratylǵanyn, ondaǵy organdardyń ekeýine ortaq ekenin aıtady. Endi olardyń tiri qalatyndaryna nemese ekige bólip alýǵa úmittiń óte az ekenin ata-analary da sezip otyr.
Talǵat Raıymbek.
Derek, foto: ras.kz.
