*Lańkestikke laǵnet

Qastarynan tabylýǵa da daıynbyz

Roman KIM, Parlament Májilisiniń depýtaty Qazirgideı sátte árbir qazaqstandyq aqtóbeliktermen birge bolyp, olardyń qaıǵysyna ortaqtasyp, birge ekendigin bildirgisi keletinderdiń qatary az emes búginde. Eger qajet dep tabylsa, olardyń qasynan tabylý úshin sol óńirge barýǵa da ázirmiz. Al endi Qazaqstanda ólim jazasyna jarııalanǵan moratorııdiń kúshin joıǵanymyzben, másele oń sheshile me eken?!. Menińshe, qalaı bolǵanda da qylmyskerler qatań jazalanýlary kerek. Eń bastysy – biz Táýelsizdiktiń 25 jyldyǵynda yrysy uıyp, yntymaǵy jarasqan elde turyp, alańsyz ómir súrip úırenip qalǵan ekenbiz. Respýblıkamyzdyń qaı óńirine, qaı oblysyna, qaı jerine barsańyz da ulttar men ulystardyń tatý turyp, kún keship jatqan kelbetin kóremiz. Aqtóbe oqıǵasynyń astarynan basyna baq qonǵan baıtaq Qazaqstanymyzdyń búgingideı beıbitshiligine baz bireýlerdiń qyzǵanyshpen qaraıtyndyǵy aıqyn sezildi. Sondyqtan da biz budan bylaı óte saqtyqpen qadam basyp, keıingi tolqyn jastardyń tárbıesine, olardyń júris-turysyna asa muqııat qaraǵanymyz abzal. Sonymen qatar, bereke-birligi jarasqan Qazaqstan halqyna arnaǵan Elbasynyń ulttyq aza tutý kúnin jarııalaýy óte oryndy dep sanaıtyndyǵymdy bildiremin.

Júrekpen sezinýleri tıis

 Anatolıı BAShMAKOV, Parlament Senaty IV, V shaqyrylymdarynyń depýtaty, L.N.Gýmılev atyndaǵy EUÝ Qazaqstan halqy Assambleıasy kafedrasynyń meńgerýshisi Birden aıtaıyn, Aqtóbedegi qandy oqıǵany uıymdastyrýshylar óz eli men jerine qurmetpen qaraı almaıtyn dinsiz basbuzarlardyń naq ózi. Eger olardyń júreginde ımanı nanym-senimderi bar bolsa, qandaı jaǵdaıda da mundaı áreketke barmaǵan bolar edi. Al endigi jerde el azamattarynyń qaı-qaısysy bolsa da ótken jeksenbide oryn alǵan qandy oqıǵany uıymdastyrýshylardyń kez kelgeniniń betine túkiredi. Bul ári-beriden soń, teris túsiniktiń qurbanyna, belgisiz aıtaqshylardyń qulyna aınalyp kóz jumǵan nemese qylmysker atanǵandardyń súıegine zor tańba bolary sózsiz. Sondyqtan da men Memleket basshysynyń qaraly úıdiń qaıǵysyna tutas eldi uıystyryp, 9 maýsymdy ulttyq aza tutý kúni dep jarııalaýyn tolyq qoldaımyn. Bul kúni árbir otandasymyz oıda joqta opat bolǵan otbasylardyń qaıǵysyna ortaqtasyp, beıbitshilik zamannyń qadir-qasıetin júrekpen sezinýi tıis dep oılaımyn.

Bul –  orny tolmas ókinish

 Nargıza MAHMÝDI, Uıǵyr jastar ortalyǵynyń tóraıymy Biz qaı kezde qandaı da bir jetistikke jetkende Kók týymyzdyń bıikte jelbireıtinin bilemiz jáne ony kórip júrekpen tebirenemiz. Al endi búgingideı qaıǵyly jaǵdaı bolǵandyqtan, Týymyzdyń tómenge túsirilýi, elimizde bolatyn oıyn-saýyqtardyń toqtatylýy men úshin orny tolmas úlken ókinish bolyp tur. Qazaly otbasylardyń árbiriniń qaıǵysyna ortaqtasa otyryp, Qazaqstan jastarynyń atynan kóńil bildirgim keledi. Al qaskóılerdi ólim jazasymen jazalaý týraly Elbasymyzdyń oıyn quptaımyn. Sebebi, ózi ómir súrip otyrǵan qoǵamnyń shyrqyn buzyp, óz zamandastaryna qaraı oq jaýdyrǵan jaýyzdar qandaı jazaǵa bolsa da laıyq. Eger joǵaryda aıtqan ólim jazasyna kesý týraly úkim shyǵarý tetigi zańnamalyq turǵyda qarastyrylyp, iske qosylatyn bolsa, terrorlyq aktilerdiń qaıtalanbaýyna da oń yqpaly tııýi ábden múmkin. «Jaýdy aıaǵan –  jaraly»Nuraly ÁBIShEV, Ońtústik Qazaqstan oblystyq máslıhatynyń depýtaty, kásipker Aqtóbe qalasyndaǵy terrorlyq aktiniń saldarynan kóptegen otbasylar qara jamylyp qaldy. Ol tek bir oblystyń ǵana qaıǵysy bolǵan joq, barlyq qazaqstandyqtarǵa aýyr tıdi. Jaqynda Shardara aýdanyndaǵy  Kóksý aýylynda jalyndap turǵan jas jigit Sapar Dosboldyń denesi jer qoınyna berildi. Ol Aqtóbede Ulttyq ulanǵa shabýyl jasalǵanda oqqa ushqan. Armany asqaq, Otan aldyndaǵy boryshyn ótegennen keıin, ol Sport jáne deneshynyqtyrý akademııasyna túsip, sport mamany bolýdy armandaǵan eken. Jas jaýyngerdiń armany kesildi. Úmitin úzgender – dinı fanatızm mıyn ýlaǵan, áldebireýlerdiń arandatýynan qolyna qarý alǵan qaskóıler. Aqtóbedegi oqıǵa saldarynan qansha shańyraq kúızelip, aza tutyp otyr. Bizdiń otandastarymyzdyń jazyqsyz tógilgen qany – bárimizge ortaq tragedııa. Sondyqtan, 9 maýsymdy Memleket basshysy N.Nazarbaevtyń ulttyq aza tutý kúni dep jarııalaǵany barsha qazaqstandyqtardyń nıetimen qabysty. Dinniń atyn jamylǵan esirikterdi qasıetti Ramazan aıy da toqtata alǵan joq. Táýelsizdik qazaqqa ońaı kelgen joq. Onyń qadirin barshamyz túsinip, barynsha nyǵaıtyp, qorǵaýymyz kerek. El ishin iritkisi keletinderge birden tosqaýyl qoıyp, Elbasynyń tóńiregine toptasýymyz kerek. О́ıtkeni, bizdiń Qazaqstannan basqa Otanymyz joq, bolmaq ta emes jáne keregi de joq. Shymkent

Elbasy tóńiregine toptasaıyq

Imanáli BAIDÁÝLETOV, medısına ǵylymdarynyń doktory, Shymkent qalasynyń qurmetti azamaty Elbasy Aqtóbedegi lańkestik oqıǵaǵa baılanys­ty qaza bolǵan azamattardyń shańyraǵyna kóńil aıtty. 9 maýsymdy ulttyq aza tutý kúni dep jarııalady. «Bireýdiń kisisi ólse, qaraly ol», deıdi dana Abaı. Bizdiń otandastarymyzdyń beıbit kúnde oqqa ushýy – orny tolmas qasiret.  Lańkesterde Otan, otbasy degen qundylyqtar bolmaıtyndyǵyn Aqtóbedegi oqıǵa taǵy da aıǵaqtap berdi. Qarý asynǵan jaýyngerge kekti-aq bolsyn, al óz sharýasymen júrgen qarapaıym adamdardy oqqa jyǵýyn olar qandaı sharıǵatpen túsindirip bere alady? Qysqasy, beıkúná adamdardy óltirý olardyń teksizdigin tanytady. Ekstremızm men terrorızm tek bizdiń eldiń ǵana emes, búkil álemniń qaýipsizdigine qater tóndiredi. Sondyqtan, barshamyz burynǵydan da tyǵyz toptasyp, el ishinde beıbitshilikti, turaqtylyqty saqtap qalýǵa qyzmet etýimiz kerek. «Bir qaryn maıdy bir qumalaq shiritedi» deıdi qazaq. Sol shirik qumalaqtar qazaq jastary arasynan shyǵa bastaǵany munyń artynda qozdyrýshy, ıtermeleýshi kúshterdiń bar ekendigin kórsetedi. Keshegi TMD elderiniń keıbirinde bolǵan «túrli-tústi revo­lıýsııalardyń» sol memleketterge qanshalyqty zalal ákelgendigin, eldiń búlingenin, ult tutastyǵyna qater tóngenin kórip otyrmyz. Keshe ǵana týysqan bolyp otyrǵan memleketter bir-birine jaý pıǵylmen qaraıdy. Lańkesterdi esirtkender terrorlyq áreketterinen bas tartar emes. Ata-baba armandaǵan táýelsizdigimizge syna qaǵyp alsaq, memleket úshin úlken qater. Qaýiptiń bar ekenin baıqadyq. El ishi bútin bolýyna barsha qazaqstandyq atsalysyp, Elbasynyń tóńiregine toptasýy tıis. Ońtústik Qazaqstan oblysy

Jan dúnıemmen qarsymyn

 Saltanat ShAIDAROVA, Qaraǵandy qalasyndaǵy №4 emhananyń dırektory Barsha qazaqstandyqtar sııaqty men de Aqtóbe qalasynda bolǵan lańkestik áreketterge beı-jaı qaraı almaımyn. Mundaı shekten shyqqan oqıǵalardy aıyptaǵan Elbasy Nursultan Nazarbaevtyń sózin tolyqtaı qoldaımyn. Tynyshtyǵymyzdyń shyrqyn alatyn lańkestik áreketterge barlyq jan dúnıemmen qarsymyn. Dál osyndaı syn saǵattarda biz Tuńǵysh Prezıdentimizdiń mańaıyna tutasa túsýimiz kerek. Búkil qoǵam bolyp osyndaı jaýyzdyqtarǵa qarsy turmasaq, kúırete soqqy bermesek, is nasyrǵa shabady dep oılaımyn.