«Astana-Arqaý»

festıvali halyqaralyq syılyqpen marapattaldy Ystanbul qalasynda túrkitildi álemdi damytýǵa qosqan zor úlesi úshin beriletin «Qyzyl alma» syılyǵyn tapsyrý rásimi ótti. Bul syılyqty 2013 jyly jyl saıyn túrkitildes halyqtar turatyn barlyq elder men aımaqtardyń saıasatkerleri men qoǵam qaıratkerleriniń basyn qosatyn Túrki álemi forýmy taǵaıyndaǵan. Onymen qoǵamdyq iske, ǵylym, sport, mádenıetke erekshe úles qosqan tulǵalar marapattalady. Máselen, osy jylǵy «Qyzyl alma» syılyǵyna Qyrǵyzstan Prezıdenti Almazbek Atambaev pen Nobel syılyǵynyń laýreaty Ázız Sanjar ıe bolǵan. Sonymen qatar, bul marapatqa bıyl túrki halyqtarynyń dástúrli mádenıetin damytýǵa qosqan úlken úlesi úshin jyl saıyn Astanada ótkiziletin «Astana-Arqaý» dástúrli túrki mýzykasynyń festıvalin uıym­dastyrýshy «EL production company» laıyq dep tanyldy. Syılyq atalmysh kompanııanyń bas dırektory Aıgúl Beısen­baevaǵa tapsyryldy. «EL production company»-den basqa, bul syılyqpen túrki sportyn damytýǵa qosqan úlken úlesi úshin dástúrli qazaqsha kúresten xalyqaralyq «Eýrazııa Barysy» týrnırin uıymdastyrýshy,  belgili jýrnalıst jáne prodıýser Arman Shoraev ta marapattaldy. Astana qalasy ákimdiginiń qoldaýymen qazirge deıin 9 márte ótkizilip, osy ýaqyt ishinde búkil túrki mýzykasy ókilderiniń basyn qosyp úlgergen «Astana-Arqaý» – búginde  túrki álemi­niń dástúrli mýzykasyna ar­nalǵan eń iri festıvalǵa aınaldy. Sońǵy onshaqty jyl kóleminde festıvalǵa barsha túrki halyqtarynyń mýzykalyq dástúrin nasıhattaýshy 700-ge tarta mýzykanttar men ǵalymdar qatysqan eken. «Astana-Arqaý» túrki mýzy­kasynyń festıvali qazirgi kezde túrki halyqtarynyń mádenı ıntegrasııasy úrdisinde eleýli oryn alǵan bedeldi mýzykalyq sharaǵa aınaldy. Festıvaldyń 10 jyldyǵyna oraı, 2017 jyly Túrki álemi mýzykasynyń antologııasy shy­ǵa­rylmaq.  «Egemen aqparat» Almaty