Bala tiliniń balqaımaǵyn shaıqaǵan

Belgili jazýshy Muhametjan Etekbaevtyń mereıtoıy Qaraqastekte saltanatpen atap ótildi Aýyldaǵy záýlim Máde­nıet úıiniń keń de jaryq bir bólmesinde «Jazýshy Muha­metjan Etekbaev atyn­daǵy mýzeıdiń» saltanatpen ashylý lentasyn tanymal jazýshy, jambyltanýshy-ǵalym Naǵashybek Qapalbekuly men belgili balalar aqyny Sultan Qalıuly qıdy. – Muhametjan aǵa shejireli jan edi, taǵylym alar bir qasıeti – Jambyl men onyń ustazy Súıinbaı, Qarasaı men Naýryzbaı týraly tyń derekterdi tirnektep júrip mol jınaqtady. Ony sol keńestik zamannyń ózinde tartynbaı, tııanaqtap, baspasóz betinde jarııa­lap turdy, – deı kele, Naǵashybek Qapalbekuly HH ǵasyr Gomeriniń 125 jyldy­ǵyn álem jurtshylyǵy bolyp toılaǵan dúbirli merekede Jambyl atyndaǵy mýzeıdiń dırektory qyzmetin atqarǵan Muhamet­jan Etekbaevtyń dúnıe­júzi jazý­shylarynyń jyr aly­bynyń aýylynda bas qosqan sımpozıýmyn shashaý shyǵarmaı ótkizgenin de tilge tıek etti. Qazaqstan Jazýshylar odaǵynan Qaraqastekke ádeıi at basyn burǵan,  qazaqtyń belgili jazýshysy Zákir Asabaev bas­tap kelgen  – Mamadııar Jaqyp, Ahmetjan Ashırı, Ǵalym Qalıbek, Nurdáýlet Aqysh syndy tanymal qalamgerler toı ústinde lebizdi sózden sha­shý shashty. «Tulpar» syı­lyǵynyń laýrea­ty Mu­hametjan Etekbaevtyń álem halyqtarynyń tili­ne aýda­rylǵan «Alataý erte­gi­sinen» bastap ber­tinde jaryq kórgen «Qyzyl ala jolbarys» kitabyna deıingi on-san kitaptary týraly tolymdy pikirler bildirildi. Jazýshy shyǵarmalarynyń ishinde «Batyr bala Bolatbek» kitabynyń shoqtyǵy bıik ekeni erekshelep aıtyldy. Bala tiliniń balqaımaǵyn shaıqaǵan, bala tile­giniń sheber bilgiri bolǵan, bala júregine jan dúnıesimen jol tapqan, ǵumy­rynyń sońyna deıin balalar  qýanyshyna ortaqtasyp, qushaqtasyp-qaýyshyp ótken bala jandy jazýshynyń jan súısi­nerlik qasıetteri týraly jyly lebizder mol aǵytyldy. О́jet pıoner Bolatbek Oma­rov týraly derekter men áń­gimelerdiń Máskeý basylymdarynda jıi jaryq kórýine birden-bir sebepker bolǵan jazýshynyń jary Qazıma Qojahanqyzy ekenin kópshilik bile bermeýi de múmkin. – Bar bolǵany 62 jyl ómir súrip, 1998 jyly ómirden ozǵan Muhań artynda úlken mura qaldyr­dy. Minezi bııazy, bala jandy bolashaq tanymal jazýshynyń bolashaq tanymal eńbekteri úshin biz birlesip qyzmet atqardyq. Sonyń arqasynda kúlli Odaq­qa tanymal «Batyr bala Bolatbek» kitabynyń negizi aýylda qalandy. Orys tilindegi hımııa pániniń muǵa­limi qyzmetin atqarǵan men ol kisiniń arqasynda qalaı ádebıetshi bolyp ketkenimdi de baıqamaı qaldym, – dep jymıǵan Qazıma apaı syıǵa tartylǵan shoq-shoq raýshan gúlderdi qushaqtap turyp, jınalǵan qaýymǵa aqja­rylqap kóńilmen alǵys aıtty. Derbes zeınetker, talaı jyl jazýshy týǵan Jam­byl aýdanyn basqarǵan Bek­bolat Turysjanov aqsaqal kópshilikke beımálim bir qyzyq derektiń shetin shyǵardy. – Muhametjanmen bir aýylda óskendikten, onyń  sol oıyn balasy kezinen-aq eki kitaby anasy tigip ber­gen shúberek dorbasynda bolsa, bir kitaby únemi qo­lynan túspeı júretinine tańdanýshy edik. Talabyna jetti. Mine, búgin osy zalda halyq tanymal jazý­shynyń shyǵarmashylyǵyna laıyqty baǵasyn berdi. Ádebı sharany uıymdastyryp, otbasynyń qarajatymen murajaı ash­qan Qazıma qaryndasyma myń da bir alǵys aıtamyn. Bizdiń Qazıma ataqty Medeý shatqalynyń bir kezdegi ıesi – Medeý Pusyrma­novtyń uly Qojahannyń qyzy. Tektiniń tuıaǵy búgin atadan dary­ǵan qasıet belgisin tanytty. Ardager aqsaqal  aıtqan shyraıly lebizdiń sońy «Qulansaz» án-bı ansambliniń konsertine ulasty. Jazýshy aýylyn dúril­det­ken úlken toı tús aýa tarady... Talǵat SÚIINBAI, «Egemen Qazaqstan» Almaty oblysy, Jambyl aýdany Sýretti túsirgen Nurmanbet QIZATOV