Kóktemgi shaqyrý

Oǵan 5 myńǵa jýyq qazaqstandyq tartyldy Qazaqstanda kóktemgi áskerge shaqyrý naýqany aıaqtaldy. Qazirdiń ózinde Qazaqstan Qarý­ly Kúshteriniń UQK Shekara qyz­metine, Memlekettik kúzet qyzmetine áskerge alý aıaqtaldy, al Ishki ister mınıstrliginiń Ulttyq ulanynyń qataryn tolyqtyrý áli de jalǵasýda. 18 ben 27 jas aralyǵyndaǵy áskerge shaqyrýǵa jatatyn jas­tardyń jalpy sanynyń 5 000-ǵa jýyǵy Qazaqstan Qarýly Kúsh­terinde áskerı qyzmet ótkerýge jiberildi. «Ońtústik» óńirlik qolbasshylyǵynyń áskerlerine 900-ge jýyq, «Shyǵys» óńirlik qol­basshylyǵyna – 500-den asa, al «Batys» óńirlik qolbasshylyǵyna – 500-den asa, sondaı-aq, «Astana» óńirlik qolbasshylyǵyna 30-ǵa jýyq jas qyzmet óteýge jiberildi. Aeroutqyr áskerlerine 900-den astam, al oqý-jattyǵý ortalyqtaryna 800-den asa adam jiberildi. Áýe qorǵanysy kúshteriniń áskerler sapy 900-den asa adammen tolyqty. Olardyń ishinde joǵary bili­mimen áskerge alynǵandar sany 20 adam, arnaýly-orta mamandyq ıesi – 3 000-nan asa, orta bilimi bar  –        2 000-ǵa jýyq adam. Búgingi kúnge deıin Qarýly Kúsh­terdiń qataryna áskerge shaqy­rylǵandardyń barlyǵy Otan al­dyndaǵy boryshyn óteıtin jerlerge jiberildi. Jas tolyqtyrýlardy jóneltý aldynda dástúrge sáıkes shyǵaryp salýlar uıymdastyryldy, al olardy merzimdi qyzmet barysynda áskerı istiń qyr-syry men jańa jaǵdaılarǵa beıimdeýge kómektesetin  komandırleri, ofıserler qarsy aldy. Alǵashqy áskerı daıarlyq baǵ­darl­amasy aıaqtalysymen jastar áskerı ant qabyldap, sodan keıin áskerı qyzmetti atqarý úshin tıisti laýazymdarǵa taǵaıyndalady. Esterińizge sala ketsek, Qazaq­standa 2016 jyly kóktemde merzimdi áskerı qyzmetke 14 myń qazaq­standyqty shaqyrý josparlanǵan. «Egemen-aqparat»