Urpaq umytpaıdy

Ulttyq ulannyń №6655 áske­rı bóliminde kelisimshart negizinde qyzmet atqarǵan kishi serjant Berik­jan Qalıevtiń Aqtóbede lań­kestermen sońǵy demi bitkenshe aıqasqan erligi elge málim. Arystaı azamattyń artynda ańyrap tórt balasy men aıaýly jary Nursulý Qalıeva qaldy. Sarbazdyń súıegi 8 maýsym kúni týǵan aýyly Jaq­sybaıda jerlendi. Qaraly jıynǵa qatys­qan oblys ákimi Altaı Kól­ginov Elbasynyń tapsyrmasymen otbasyna memlekettik qoldaý kór­setiletinin aıtqan edi. Keshe Memleket basshysynyń tapsyrmasy buljytpaı oryndalǵanyna barsha batysqazaqstandyqtar kýá boldy. Qalıevter otbasyna Batys Qazaqstan oblysynyń ákimi Altaı Kólginov Zashaǵan kentinen jańa páter kiltin tabystady. – Aqtóbedegi qandy oqıǵada úsh áskerı qyzmetker qaza tapty. Solardyń biri – jerlesimiz Berikjan Qalıev. Sońynda tórt balasy qaldy. Elbasymyzdyń lańkestik qurbandarynyń otba­sylarynyń eshbiri qaraýsyz qalmasyn degen tapsyrmasy boıynsha jan-jaqty qoldaý kór­setilýde. Zaıyby Nursulý Qa­lıeva mektepke jumysqa ornalas­ty. Balalary Zashaǵan kentindegi mektepte sabaq oqıtyn bolady, kishkentaıy shaǵyn ortalyqqa barady. Otbasyna úsh bólmeli páter berildi. Onyń aldynda 5 mıllıon teńge qarjylaı kómek kórsetildi. Aldaǵy ýaqytta da nazarymyzdan tys qaldyrmaı, qamqorlyq kórsetetin bolamyz, – dedi oblys basshysy. Nursulý Qalıeva Elbasy qam­qorlyǵyna rızashylyǵyn bildirdi. Ol óz júreginiń túk­pirindegi oı-tilegin bylaısha jetkizdi: – Elde tek tynyshtyq pen bereke-birlik bolsynshy. Alǵysym sheksiz. Kúni keshe ǵana óte shaǵyn páterde turdyq. Qazir bári de jetkilikti, – degen ol, sonymen qatar, jarynyń asyl qasıetterin eske aldy. Jubaıymnyń minezi aqjarqyn, óte salmaqty boldy. Eshkimnen qolynan kelgen kómegin aıamaıtyn. Qyzmetine jaýap­kershilikpen qarap, jan-tánimen berilip isteıtin. Balalaryna jaqsy tárbıe berdi. Nurtaı TEKEBAEV, jýrnalıst, Temir QUSAIYN, «Egemen Qazaqstan» Batys Qazaqstan oblysy Sýrette: páter kiltin tapsyrý kezinde