Keshe. Búgin. Erteń

Elordalyq jas sýretshilerdiń «KADMII QYZYL» art-toby usynǵan «Neonomad» kórmesinde úsh kezeńniń keskini ushtasady. Kórmeniń ashylýynda Ulttyq mýzeıdiń dırektory Darhan Myńbaı jastardyń zamanaýı jumystaryn joǵary baǵalap, olarǵa shyǵarmashylyq tabys­tar tiledi. – Bul jumystardyń barlyǵy da talantty jas sýretshilerdiń ishki dúnıelerin ashyp kórsetedi. Mundaı jańa bastamalarǵa árqashan qoldaý bildirýimiz kerek. Sebebi, biz úshin ónerdiń orny bólek. Aldaǵy ýaqytta da mundaı tyń ıdeıalardyń avtorlaryn Ulttyq mýzeıden kórgimiz keledi. Sondyqtan, talapty 7 sýretshiniń aldaǵy jumystaryna tabys tileımin, – dedi D.Myńbaı. Eske sala keteıik, «KADMII QYZYL» art-toby 2010 jyly qurylǵan. Onyń qatarynda Beıbit Ásemqul, Áıgerim Juma­ǵalıeva, Álııa Qanybekova, Natalıa Lıgaı, Jeńis Mol­dabekov, Almas Oraqbaı, Gúl­maral Tátibaeva esimdi jastar bar. Kórmege olardyń 30-ǵa jýyq jumysy qoıyldy. О́ner týyndylarynyń arasynda  ıns­tallıasııa, fotosýretter, vıdeo-art jáne perfomans bar. Týǵan úıdiń sımvoly sanalatyn «Uıa» ınstallıasııasy arqyly kórmeniń basty ıdeıasy aıqyndala túsedi. Qazirgi tańda baqytty ómir izdegen adamdar qustarmen taǵdyrlas tárizdi. Álemde únemi qozǵalys, adamdar qaladan-qalaǵa, bir elden ekinshi elge, bir qurlyqtan ekinshi qurlyqqa kóship-qonyp jatady. О́mirdiń zamanaýı kóshý beınesi búkil álemge ortaq, búgingi kósh­peliler – neonomadtar – ózin jáne óz baqytyn tabý úshin oryn aýystyrýdan jalyqpaıdy. Osy arada, óz tamyryńnan qol úzbeý, ózińniń kim jáne qaıdan ekenińdi umytpaý óte mańyzdy! Sonymen qatar, kórmege Natalıa Lıgaıdyń «О́mir elesi», Álııa Qanybekovanyń «Týǵan jerim tuǵyrym», Gúlmaral Tátibaevanyń «Zamana kóshi», Almas Oraqbaıdyń «Jurt» fotosýretteriniń toptamasy qoıylmaq. Osy jumystarda sýretshiler qonys aýdarýdyń áleýmettik-mádenı úrdisine óz kózqarastary men oılaryn bildirýge tyrysady. Megapolıster óz tóńi­regindegi eldi mekender men olardyń turǵyndaryn ózine sińire otyryp qarqyndy ósý­de. Mundaǵy adamdar qum qıyr­shyǵy sııaqty. Alaıda, árbir adam biregeı jáne talantty, Áıgerim Jumaǵalıevanyń «Qala alpaýyttary» toptamasymen jasalǵan fototýyndylary osy týraly baıandaıdy. Sýretshi sáýlettik ansamblderdi, músin kompozısııalarynan góri qa­lany jasaıtyn jáne oǵan jan kirgizetin adamdardy jyrlaıdy. Jeńis Moldabekovtiń «Tarıh qoınaýynan jarqyn bolashaq­qa» toptamasymen jasalǵan fototýyndylarynda babalarymyzdyń baıyrǵy kóship-qoný úrdisimen búgingi temirjoldar ótip jatýy yqtımal Qazaqstannyń keń-baıtaq dalasyna erekshe oryn berilgen. Sýretshi óz sıý­jetterinde búgingi men keshegini ushtastyrady. Al, Beıbit Ásemqul­dyń «Shek­­sizdik» toptamasymen ja­salǵan fototýyndylary áıelderge arnalǵan. Qazaq má­denıetindegi áıel ejelden otbasy men dástúrdiń saqtaýshysy sanalady. Sýretshi qazirgi za­man­daǵy áıeldiń klassıkalyq beı­nesiniń ózgerýi týraly oı tolǵaıdy. Jastar kórmesi 26 maýsymǵa deıin jalǵaspaq. «Egemen-aqparat»