Suranysqa ıe áýejaı

Petropavl halyqaralyq áýejaıy tóńireginde ártúrli áńgimeler tyıylmaı tur. Onyń jumysynyń toqtatylýyn bázbireýler jańa qojaıynnyń satyp alýymen baılanystyrsa, ekinshi bireýler qordalanyp qalǵan bereshektiń ótelmeýimen túsindiredi. Biz máseleniń mánisin bilmek bolyp Petropavl halyqaralyq áýejaıynyń dırektory Marat Hasenovpen habarlasqanymyzda, el ishin kezgen alypqashpa sózderdi teriske shyǵardy. – Bar jaıt aýqymdy kúrdeli jóndeý jumystaryna kelip tireledi. Ol jaıly birazdan beri aıtylyp kel­se de, qomaqty qarajat tabý oń­aı bolǵan joq. Byltyr Úkimettiń rezervinen 4 mıllıard teńge bó­lin­se, bıyl 3,2 mıllıard teńge qarastyrylyp otyr. Osyǵan oraı jaz maýsymyn qolaıly paıdalanyp, qalpyna keltirý úshin ýaqytsha jabylǵany ras. «K-Dorstroı» AQ ushý-qoný jolaqtaryn jańǵyrtý jobasyn júzege asyrýǵa belsene kirisken. Jobanyń birinshi kezeńin aıaqtaý barysynda Astana men Al­maty baǵyttaryna maýsymaralyq ushý retke keltirildi. Alda ushý-qoný jolaqtaryn keńeıtý, uzartý, jolaýshylar termınalyn zaman aǵymyna laıyqtaý, jaryq-sıgnal qural-jabdyqtaryn ornatý mindetteri tur, – dedi bizge jan-jaqty túsinik bergen Marat Jumajanuly. О́kinishtisi sol, jańa aksıonerdiń ýádeleri de qaǵaz júzinde qala bergen. Kásiporynnyń birneshe jyl boıy tólenbeı kelgen eńbekaqy qa­ryzdarynyń ótelýine kólik pro­kýratýrasynyń dúrkin-dúrkin aralasýyna týra kelgen. 2013 jyly bereshek 23 mıllıon teńgeni quraǵan. Zańdylyqty qadaǵalaýshy organ nazar aýdarmasa negizgi aksıoner qarajat joq dep aýyzdy qý shóppen súrtip otyra bereri anyq. 19 mıllıon teńge jalaqynyń berilýine qaraǵanda tabyssyz dep aıtý qıyn. Azamattyq avıasııa komıteti de kóptegen olqy­lyqtardy jipke tizgendeı etip jalǵannyń jalpaǵyna shyǵarǵan. Sanıtarlyq, órt, qurylys normalary óreskel burmalanǵan. Sońǵy kúrdeli jóndeý 1974 jyly júrgizilse, qandaı áýe qaýipsizdigi jaıly sóz qozǵaýǵa bolady, dep jurtshylyqtyń kúıinetini de sondyqtan. Kóbine aǵymdyq jóndeýlermen shektelip otyrǵan. Tyǵyryqtan shyǵýdyń joly retinde ushý-qoný jolaqtarynyń jaramdy bóligin ǵana paıdalaný usynylyp, «Boıng», «Tý-154», «Tý-157» sekildi alyp laınerlerdiń qatynaýyna tyıym salynǵan. Aksıonerler tarapynan jol berilgen osyndaı qyrsyzdyqtar men quntsyzdyqtar birneshe ret betterine basylyp, onyń sońy mamandandyrylǵan ekonomıkalyq sotqa talap-aryz túsirýge jalǵasqan. Solardyń biri «VIP AVIA» AAQ pen «Altyn Estate» JShS arasyndaǵy aksııalardy satý-satyp alý kelisimin zańsyz dep tanýǵa qatysty. Aqyry sot sheshimimen baqylaý paketiniń aksııalary aldymen kommýnaldyq, sosyn memlekettik menshikke berildi. Endi, mine, menshik ıesine baılanysty sońǵy núkte qoıylǵannan keıin memleket tarapynan qomaqty qarjylyq qoldaý kórsetile bas­taýy kóńilge qýanysh uıalatady. Birneshe jyl buryn Qytaıdyń júk laınerlerin de qabyldaǵan bolatyn. Ekonomıkalyq qıyndyqtar tusynda aptasyna 56 reıske deıin ushqan kezder bolǵan. Búginde Astanaǵa aptasyna 2 ret, Almatyǵa 1 ret qatynaýdy jıiletý múmkindikterimen qosa Máskeýge, Germanııaǵa, Qytaıǵa, Túrkııaǵa ushý kelisimsharttary jasalǵan.  О́mir ESQALI,  «Egemen Qazaqstan» Soltústik Qazaqstan oblysy