Kórkem gımnastıkanyń prımasy

Álııa esimdi qyz­dardyń deni batyr tekti bolady-aý. Qazaq kórkem gımnastıkasy tarıhynda álemde úzdik bestikke kirgen dańqty qyzymyz týraly dúnıejúzindegi eń myqty bapkerlerdiń biri sanalatyn Irına Vıner Beıjiń Olımpıadasynyń aldynda «Mende Olımpıada oıyndarynda top jarýǵa laıyq tórt gımnasshy bar. Sonyń biri – Álııa Iýsýpova», degen bolatyn. Álııa Iýsýpova úlken sport­­­­pen qoshtasqannan ke­ıin Irına Vınerdiń ózine jumysqa shaqyrǵanyn es­tigenbiz. Álııadan sonyń jaıyn su­ra­dyq. – Nege men Reseıge barýym kerek?! Ras, Irına Vı­ner – álemdegi eń úzdik bapkerlerdiń biri. О́z qo­lymda ósken qyzsyń, bir­ge jumys jasaıyq dep sha­qyrǵany ras. Biraq, men «Reseıde bapkerler kóp qoı, Qazaqstanǵa keregirekpin», dedim. Men óz elimniń patrıo­tymyn. Bizge óz olımpıadashylarymyzdy daıyndaý kerek. Sondyqtan, tulǵańdy altynnan quıamyn dese de Qazaqstannan ketpeımin. Osyny aıtqanda Álııanyń tanadaı kózi jarq ete qalǵan. Ádette, kórkem gımnasshylar saıysqa shyqqanda jadyrap shyǵady. Máse­len, Olımpıada oıyn­da­rynyń jeńimpazy Alı­na Kabaevanyń ezýi bir jıylǵanyn kórgen emespiz. Esesine bizdiń qyzymyzdyń álemdik synda jarq etip bir kúlgenin jáne kórgen emespiz. Tabıǵatynda baısaldy qyz qansha jerden kórkem gımnas­tıka talap etse de ótirik kúle almaıdy. Onyń Olımpıada oıyndarynyń júldegeri bol­maǵandyǵyn keıbireýler osy minezinen de kóredi. Biraq, qazaq qyzynyń na­mys­­qoılyǵynda shek joq. Syrt kózge uıań kórinetin qa­ryndasymyz ult namysy, mem­lekettik máselege kelgende jolyndaǵyny quraqtaı japyrady. «Nege men Reseıge ketýim kerek. Men óz elimniń patrıotymyn», degen sózi sonyń bir aıǵaǵy ǵana. 2006 jyl. Katar. Dohada Azııa oıyndarynyń baıraqty básekesi qyzyp jatyr. Aq kóılegi qy­zyl tobyǵyn ja­­ýyp jú­retin, aýzynan Alla­sy túspeıtin arabtar etegine súrinip júretindeı halde emes. Qazaqtyń bo­ta tir­sek, bota kóz arýy Álııa Jú­sipova-Iýsýpova kórkem gım­nastıkanyń tórt túrinen ótken synynda bar altyndy bir ózi sypyryp aldy. Komandalyq esepte de Qazaqstandy alǵa shyǵararlyqtaı erlik jasady. Eki ókpemizdi qolymyzǵa alyp arasyn juqa shatyr bólgen kúres zalyna asyqtyq. Roman Meleshın aqtyq synda aıqasyp jatqan edi. Bir kezde aıqaı-shýdy tunshyqtyryp Qazaqstanyń ánurany oınaldy. Álııanyń qurmetine. Álııanyń úzeńgiles serikteriniń qurmetine. Osy kezde Roman tórttaǵandap jatqan qarsylasyn jerden qap kótergendeı salaqtatyp julyp alǵan. Sheke tamyrlary bileýlenip sál turdy da oń jaq qaptalǵa bir-aq urdy. Roman Meleshın de Azııa oıyndarynyń jeńim­pazy. Alyp saraıdy qýanǵannan moı­nymyzǵa ilip keterdeı halde júrmiz. Sońynan Roman aıtty ǵoı. Qazaqstannyń Ánuranyn estigende keýdeme alapat kúsh bitti dep. Solaı. Álııa ózi ǵana altyn alyp qoımaı serikterine jáne Shyǵystyń balýanyna da altyn ustatqan. Sonda deımin-aý, halqy taý-taý qumnan kóp Qytaı gımnasshylary qazaq qy­zynyń qurmetine bas ıdi. Afına Olımpıadasynda osy Álııa Iýsýpovanyń kem degende úshtikke kiretin múmkindigi boldy. Bar jat­tyǵýdy min­siz oryndady. Lentasyn shu­baltyp tú­sirip alǵan Reseı qy­zy aldyna túsip ketti. Beı­­­­­jiń Olımpıadasynda da ýkraınalyq Bessonova ekeýiniń upaıy qaıta-qaıta eseptelip, qazylar ataqty fýtbolshynyń qyzyna jaq tartty. Adamdar qazylyq etken jerde ádil tórelik kútý qıyn. Sál-pál min taýyp, kúshtiniń aldynda shybyndaǵan atsha buryp ketedi. Kórkem gımnastıkada álemdik arenada bir tóreshimizdiń joq­tyǵy bizdiń Álııanyń jolyn san ret baılaǵan. Elbasy Nursultan Ábish­ulyna rahmet. Shym­kentke kelgen bir saparynda Álııanyń qo­lynan ustap turyp, «Álııa, men seniń jeńgenine sendim», dedi. Oblys ákimine «Álııaǵa arnaıy kórkem gımnastıka mektebin ashyp berińder», dep tapsyrdy. Sol mektep Shymkenttegi jańa ákimshilik-iskerlik or­talyǵy jobasynda paı­dalanýǵa berildi. – Búginde onda júz elý, eki júz shamasynda shákirtter jattyǵady, – deıdi Álııa. –Basynda onshaqty-aq qyz bol­ǵan. Bapkerlerimiz myq­ty. Halyqaralyq dá­re­je­degi sport sheberi Sábına Áshirbekova Rıo-de-Janeıroda ótetin Olımpıada oıyndary­na joldama aldy. Irına Vıner bapkerlerim jarystarda Sábınany kórip joǵary baǵa bergen. О́nerin taldap, paıdaly keńesterin berip turady. Onyń syrtynda 2002 jylǵy Daıana Ábdirbekova men Álına Rústemova degen gımnasshylarymyz jaqsy tabysqa jetip keledi. 2003 jylǵy Roza Ábıtova degen shákirtimiz 2018 jyly jasóspirimder arasynda ótetin olımpıada oıyndaryna joldama aldy. Álııa Iýsýpova búginde kórkem gımnastıkadan Qazaq­stan ulttyq qura­masynyń bas bapkeri, Halyqaralyq sa­nattaǵy tóreshi, Shymkenttegi №9 kórkem gımnastıkadan olımpıadalyq rezervtegi ma­mandandyrylǵan balalar men jasóspirimder mektebiniń dırektory. Qoshtasarda bir saýal qoı­ǵanbyz. – Álııa, ákeń, ataqty boks­shy Maqsut aǵaıdy jaqsy bilemiz. Biraq, famılııańa qarap tegi tatar eken dep qa­latyndar óz ishimizde de bar. – Túsindim, aǵa. Ákem qa­zaq, sheshem qazaq. Áke­mizdiń tólqujatynda Iýsýpov bolyp jazylyp ketkendikten osylaı bolǵan. Al men qazaq qyzy ekenimdi árqashanda maqtan tutamyn. Baqtııar TAIJAN, «Egemen Qazaqstan» Shymkent