Shyǵys Qazaqstan oblystyq sáýlet-etnografıkalyq jáne tabıǵı-landshaft mýzeı-qoryǵynyń «Altaı» galereıasynda «Balalyq qaıda barasyń?» atty fotosýretter kórmesi ashyldy. Kórme ıesi – О́skemendegi №39 mekteptiń 8-synyp oqýshysy Darıa Bajenova. Dasha eki jyl buryn fotoónerge shyndap den qoıǵan eken. Fotoapparattyń qarapaıymynan kásipqoıyna kóshken qarshadaı qyzǵa qymbat kınokamerany ájesi syılapty.
– On bes jasar fotosheberdiń shyǵarmalary kórkem oıdy shynaıylyǵymen hám shynshyldyǵymen jetkizýimen baýraıdy. Elýge jýyq jumys jınaqtalǵan fotokartınalardyń árqaısysy balalyqqa tán emes tereńdikti, erekshe álemdi usynady. Balalar ádette eresek adamnyń nazary shala bermeıtin dúnıelerdi baıqaıdy. Jáne oǵan túbegeıli jańasha qaraýǵa májbúr etedi, – deıdi kórmeniń tusaýkeserinde qoryq-mýzeı dırektorynyń orynbasary Tamara Bykova.
D.Bajenovanyń ómirdiń qaı soqpaǵyna túsetini ázirge belgisiz bolsa da, ónertanýshylar onyń ómirdi ózgeshe kóre biletinin aıtady. Oqýshy fotosýretterinde peızajdar, portretter men ómirdiń ózinen oıyp alynǵan sahnalar kórinis tapqan. Kópshiliginiń astarly oıy bar. Qolaıly sátti qalt jibermeý – kez kelgen fotosýretshiniń armany. Al fototaspa arqyly rýhanı negizdi bere bilý – ekiniń birine buıyra bermeıtin qabilet. Osy údeden tabylǵan «Dýal», «Úı», «Qar», «Kún nyspyly juldyz» syndy shyǵarmalary adamdardyń ishki dúnıesin túsinýge, sezimin qurmetteýge jeteleıdi.
On bes jasar oqýshy vernısajynyń ashylýyna ata-anasy, qos sińlisi men otbasylyq dostary keldi. Kórme ıesi fotoónerge qyzyǵýshylq ákesinen daryǵanyn aıtady. Sharany uıymdastyrýǵa qolushyn sozǵan Pavlodar qalasynan kelgen «Polıgrafııa ortalyǵy» JShS dırektory, elimizdegi belgili fotosheber Aleksandr Parhomenko eken. Oqýshy jumystarymen tanysqan ol Pavlodarda da kórme ótkizýge usynys jasady.
Dýman ANASh,
«Egemen Qazaqstan»
О́SKEMEN
Sýrette: D.Bajenova (sol jaqta birinshi)
