Maqsat – salt-dástúrdi saqtaý jáne keńinen taratý

Táýelsizdigimizdiń 25 jyl­dyq belesi ultymyzdyń rýhanı qundylyqtaryn nasıhattap, el damýynyń dara jolyn tanytatyn is-shara­lardyń ótkizilýimen erek­shelenip otyr. Keshe kóne Taraz qalasyn­da qazaq halqynyń umyt bola bas­taǵan ulttyq taǵamdarynyń jáne «neo-folklor» stılindegi kıim dızaınerleriniń konkýrstary qorytyndylandy. Sharaǵa Mem­lekettik hatshy, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova qatysty. – Is-sharaǵa qatysýshylardyń basym kópshiligi jastar bolýy qýantty, – dedi Gúlshara Naýshaqyzy. – Bul jas býyn­nyń kóneni zerdeleýge, tarıhymyzdy tanýǵa, dástúrimizdi bilýge degen talpynysyn kórsetedi. Bul konkýrstardyń maz­muny Memleket basshysy Nursultan Nazarbaev­tyń «Dástúr men mádenıet – ult­tyń gene­tıkalyq kody. Biz ózimizdiń ult­tyq máde­nıetimiz ben dástúrlerimizdi qorǵaýy­myz kerek, mádenı ıgiligimizdi bólshektep bol­sa da jınastyrýymyz kerek», degen keleli mindetine tolyq saı keledi. Respýblıkalyq dárejedegi eki konkýrstyń shejireli Taraz jerinde ótkizilýi kezdeısoq emes. Bul – Taraz – Aqsholaq – Aqyrtóbe – Qulan – Merki – Shý – Aspara arqyly Uly Jibek joly ótken qasıetti jer. Onyń tósindegi ár kesenede tunǵan tarıh bar, al ólkede salt-dástúrlerimizdiń saqtalyp, dáriptelýine tıisinshe mán berilip, jaǵdaı jasalyp otyr. Taraz tórinde ótken bul kon­kýrs­­tardyń maqsaty – ulty­myz­dyń san ǵasyrlar boıǵy salt-dástúrin saqtaý jáne keńinen taratý, eldiń ósip-órkendeýi dástúrli ulttyq qundylyqtar negizinde júzege asatynyna jurtshylyq­tyń nazaryn aýdarý, sondaı-aq, áıel­derdi halyqaralyq Astanada ótetin  EKSPO-2017 kórmesine qa­ty­sýǵa daıyndaý. Oralhan DÁÝIT, «Egemen Qazaqstan» Jambyl oblysy