Reseılik áskerı serjanttyń erligi
Sırııada Reseıdiń jaýlasýshy jaqtardy bitistirý jónindegi ortalyǵynyń áskerı qyzmetshisi qaza tapty. Muny keshe osy eldiń qorǵanys mınıstrligindegi derek kózine silteme jasaı otyryp, «Novostı» aqparat agenttigi habarlady.
Áskerı vedomstvodan túsken aqparatqa qaraǵanda, serjant Andreı Tımoshenkov jarylǵysh qoıylǵan avtomobıldiń gýmanıtarlyq kómek berilip jatqan jerge kelip jarylýynyń aldyn alǵan. Serjant qolbasshylyq atynan memlekettik nagradaǵa usynylyp otyr. Al oqıǵa 15 maýsymda oryn alsa, dárigerler áskerıdiń ómiri úshin bir táýlikten astam ýaqyt boıy kúresse de esh nátıje shyǵara almaǵan.
Avstrııa dıplomatııasynyń usynysy
Avstrııanyń syrtqy ister mınıstri Sebastıan Kýrstiń pikirinshe, Eýroodaqqa Reseımen belgili bir mámilege kelýdiń jolyn izdeıtin ýaqyt jetti. Ol EO-ny Reseıden sanksııalardy kezeń-kezeńimen alý baǵytynda is-qımyl tanytýǵa shaqyrdy.
S.Kýrstiń aıtýynsha, Reseıge qarsy sharalar – burys jol. Bul jerde mınıstr Máskeýdiń de, óz kezeginde, Brıýsselge qatysty oń nıet tanytýy tıis ekenin atap kórsetedi. Eske sala ketsek, Eýroodaqtyń Reseıge qarsy ekonomıkalyq sanksııasynyń merzimi osy jyldyń 31 shildesinde aıaqtalady. Osynyń aldynda Eýrokomıssııanyń tóraǵasy Jan-Klod Iýnker de Reseıdiń EO-men qarym-qatynasyn qalpyna keltirýine múmkindik bar ekenin málimdegen edi.
Iran teraktilerdiń aldyn alypty
Irannyń arnaıy qyzmetteri keń aýqymdy terrorlyq áreketterdiń aldyn alǵany týraly málimdep otyr. Bul týraly «Reıter» agenttigi habarlady. Iran qarsy barlaýynyń derekterine súıensek, terrorshylar el astanasy – Tegeran jáne basqa da iri qalalarda jarylǵyshtar qoıýǵa áreket jasaǵan.
«Islamıst-vahhabıtterdiń qylmystyq pıǵyldaryna qaraǵanda, jaqyn kúnderde eldiń túrli aýdandarynda jarylystar jasaý josparlanypty. Búginde lańkester qamaýǵa alyndy, olardan bombalar men kóptegen jarylǵysh zattar tárkilendi», delinedi barlaý isteri jónindegi mınıstrliktiń málimdemesinde. Jarylystar týra Ramazan bastalatyn 5 maýsym men 4 shilde aralyǵynda júzege asyrylmaq eken.
Qysqa qaıyrǵanda:
- «Normand tórttigi» (Reseı, Ýkraına, Germanııa, Fransııa) elderi basshylarynyń jańa kezdesýi Varshavada ótetin NATO sammıtiniń aldynda, ıaǵnı shilde aıynyń basynda uıymdastyrylýy yqtımal. Bul týraly nemis úkimetindegi derek kózine silteme jasaı otyryp, Stuttgarter Zeitung gazeti habarlady.
- Fýtboldan Eýropa chempıonatynyń kezekti irikteý týrynda Islandııa men Vengrııa quramalary kezdesken edi. Vengrııalyq fanattar ózderiniń fýtbolshylaryn nasıstik ısharat bildirip qarsy alypty. Tipti, oıyn aldynda qarsy jaqtyń jankúıerlerimen tóbelesip te alsa kerek. Eýropa fýtbol assosıasııasynyń odaǵy (ÝEFA) Vengrııaǵa qatysty tártiptik is ashty.
- Ombyda Ertis ózeninde bortynda 7 adamy bar «Assol» úlgisindegi ıahta sýǵa batyp ketti. Jeteýdiń beseýi ózderiniń kúsh-jigerimen aman-esen jaǵaǵa jetse, eki adam iz-túzsiz joǵalyp ketken. Iаhta Omby oblystyq jelkendi sport federasııasynyń ıeliginde bolǵan kórinedi.
- Búkilreseı jeńil atletıka federasııasynyń bas hatshysy Mıhaıl Býtov Halyqaralyq jeńil atletıka assosıasııasy keńesiniń quramynan ýaqytsha shyǵarylǵan. Munyń Reseı jeńil atletshileriniń dopıng qoldanýlarynyń saldarynan bolyp otyrǵan jaıt ekeni anyq. Sóıtip, búginde reseılik búkil jeńil atletterge Olımpıadaǵa barmaı qalý qaýpi tónip tur.
Italııa oppozısııasynyń jeńisi
Italııanyń «Bes juldyz» oppozısııalyq saıası qozǵalysy 20 mýnısıpaldyq quralymdar saılaýynyń 19-ynda jeńiske jetti. Sóıtip, atalǵan partııadan kandıdattar Rım men Týrın qalalarynyń jańa merleri atandy. Muny keshe ANSA agenttigi habarlady.
Qozǵalystyń kóshbasshysy Beppe Grıllo bul jeńisti qazirdiń ózinde tarıhı jeńis dep málimdep úlgerdi. Jáne, onyń sózine qaraǵanda, bul aldaǵy úlken jeńisterdiń bastamasy ǵana. Italııanyń bıleýshi demokratııalyq partııasy óziniń jeńilisin moıyndaǵan. Italııa astanasy – Rım qalasyn Vırdjınııa Radjı esimdi áıel basqaratyn boldy. Týrındegi saılaýda da áıel adam jeńiske jetti. Ol – Kıara Appendıno. Bul áıel de Týrınniń meri atandy.
Tárkilengen geroın quny – 4 mln.$
Reseıdiń Sverdlov oblystyq federaldyq qaýipsizdik qyzmetiniń adamdary esirtki tasymaldaýshy kýrerlerge qatysty operasııa barysynda Tájikstannan pııaz artyp kelgen júk kóliginiń ishinen 25 kılogramm geroın tapty.
Operasııa oblys ortalyǵy – Ekaterınbýrg qalasyndaǵy №4 jemis-jıdek bazasynda júzege asyrylǵan. 20 tonna pııaz artylǵan fýra týra osy bazaǵa kelip taban tiregen kórinedi. Esirtki pııazdyń ishine muqııat ári uqypty salynyp jasyrylǵandyqtan, ony qolmen arshyp alýdyń ózi úlken kúsh-jigerdi talap etken. Tárkilengen geroınniń jalpy quny – 4 mıllıon dollar. Operasııa qorytyndysyna sáıkes, RF QK-niń tıisti baptary boıynsha qylmystyq ister qozǵalypty.
Jaýapsyzdyqtyń saldary aýyr
Máskeý bıligi Karelııanyń Sıamozero kólindegi shtorm saldarynan qaza tapqan máskeýlik oqýshylardyń tizimin jarııalady. 14 jasóspirimniń 3-eýi – qyz bala. 3-eýi 13-te, qalǵandarynyń bári 12 jasta.
Keshe Reseı tótenshe jaǵdaılar mınıstrliginiń ushaǵymen balalardyń máıitteri Petrozavodskiden Máskeýge jetkizildi. Aıta ketetin bolsaq, 18 maýsym kúni «Park-Otel Sıamozero» saýyqtyrý lagerindegi 47 ul-qyz 4 pedagogtyń jol bastaýymen eki qaıyqpen Sıamozeroǵa túsip, shtormǵa tap bolǵan. Keıin 13 oqýshynyń deneleri tabylsa, bireýiniki áli tabylǵan joq. Karelııa basshysy Aleksandr Hýdılaınen opat bolǵan balalardyń otbasylaryna óńirlik bıýdjet qarjysynan 1 mıllıon rýblden tóleýge ýáde berdi. Atalǵan oqıǵa boıynsha qylmystyq is qozǵaldy.
Internet materıaldary negizinde ázirlendi
