Jegenderi jelkesinen shyqty

«Qazposhta» aksıonerlik qoǵamynyń Qostanaı oblystyq fılıaly Taran aýdandyq bólimshesiniń úsh qyzmetkeri zeı­net­kerlerdiń zeınetaqysy men múgedek­terdiń járdemaqysyn maıshelpek dep oılapty.  О́zderi jas ta emes, jer ortasyna kelip qalǵan áıelder qunyqqannan uıat pen ardy jıyp qoısa kerek. Áıtpese, 50 jastaǵy Lıýdmıla Reımer, 49 jastaǵy Svetlana Mıtak jáne 62 jastaǵy Oryntaı Qanapııanova ózderiniń qyzmetin paıdalanyp, zeınetkerlerdi aıtpaǵanda, ǵarip jandar men jetimderdiń jalǵyz nápaqasyna aınalǵan járdemaqysyna qol salar ma edi? Osy úsheýin aqsha urlaýdyń uıymdasqan tobyn qurdy deýge saıady. Olar buryn da osyǵan uqsas qylyqtary úshin  shartty túrde sottalǵan bolatyn. Biraq  ózgeniń aqshasyn  jymqyryp dánikken áıelder endi aqshany iri kólemde urlap, odan beter qunyǵa bastaǵanda qolǵa tústi. «Qazposhtanyń» Qostanaı oblystyq fılıalynyń Taran aýdanyndaǵy Maı selosynda ornalasqan bólimshesiniń bastyǵy bolyp isteıtin Lıýdmıla Reımer  óziniń 2-sanatty qyzmetkeri Svetlana Mıtak jáne operator Oryntaı Qanapııanovamen birigip, 2012 jyldyń 11 qańtarynan bastap 2014 jyldyń 16 maýsymyna deıin pochta klıentteriniń jyljymaıtyn shottarynan baǵdarlamada shyǵystyq-kassalyq order qurý arqyly aqsha sýyryp alyp otyrǵan. Bul aqshalar zeınetkerler men múgedekterdiń, jetim balalardyń shotyna salyp qoıǵan  qarajattary bolatyn. Sary maıdan qyl sýyrǵandaı, bildirmeı qaltalaryna  basyp otyrǵan 6 mıllıon teńgeni  úsh áıel ákesi bergendeı shalpýyttap jumsaǵan. Tegin kelgen paıdany shelektep tókken olardyń qylmysy ashylyp, tergeý bastalǵanda áıelderge álgi 6 mıllıon teńgeni eńbekpen tabý qıyn boldy, onyń 1 mıllıon teńgesin ǵana qaıtara aldy. Ádil sot kinásin moınyna qoıǵan úsh áıeldiń de endigi orny tordyń arǵy beti dep tapty. Lıýdmıla Reımer 5 jylǵa, Oryntaı Qanapııanova 5 jyl 6 aıǵa,  Svetlana Mıtak 5 jyl 6 aı­ǵa bas bostandyǵynan aıyrylyp, múlki tárkilendi. Olar jazasyn jalpy rejimdegi kolonııada óteıtin bolady.  Sonymen qatar sot úsh áıelden «Qazposhta» aksıonerlik qoǵamynyń paıdasyna 5 mıllıon teńge shyǵyn óndirdi. Bul eń bir durys sheshim boldy. Názıra JÁRIMBETOVA, «Egemen Qazaqstan» Qostanaı oblysy, Taran aýdany