Úzdikterdiń úzdigi

Qorǵanys mınıstri Imanǵalı Tasmaǵambetov «Aıbyn» ekinshi respýblıkalyq áskerı-patrıottyq jıynynyń saltanatty jabylý rásimine qatysty. «О́ser eldiń balasy armanshyl bolady, ósher eldiń balasy janjalshyl bolady». Bul – Elbasy – Joǵarǵy Bas qolbasshy Nursultan Nazarbaevtyń sózi. Mine, men osy ortada rýhyn namysyna túıgen, Otanyn júregimen súıgen sol armanshyl jas­tardy kórip turmyn! Sizderdiń «el erteńin qorǵaımyn» degen qordaly nıetterińizdi bilip turmyn! Olaı deıtinim, osy jerde ótken bes kúnde sizder jaýynger bolýdyń qyr-syryn meńgerip qana qoıǵan joqsyzdar. О́zara tirek bolýdyń, qıyndyqta kerek bolýdyń qadirin bildińizder. Osy arqyly naǵyz dostyqtyń ne ekenin sezdińizder», – dedi qorǵanys vedomstvosynyń basshysy jıynǵa qatysýshylarǵa arnaǵan sózinde. Áskerı qoldanbaly sport túri, áskerı-dalalyq taktıkalyq oıyn, sondaı-aq, «Aıbyn daryny» robotty tehnıkalar men zııatkerlik baıqaýy boıynsha jarystarda úzdik nátıje kórsetken jastar Qorǵanys mınıstriniń qolynan nagrada alýǵa laıyq dep tanyldy. Ál-Farabı atyndaǵy Qazaq ulttyq ýnıversıteti áskerı kafedrasynyń stýdenti Dastan Rahatov «Meniń robotym» baıqaýynyń jeńimpazy atandy. «Meniń ushqyshsyz ushý apparatym» baıqaýynyń úzdigi – «Arystan» mamandandyrylǵan lıseıiniń tárbıelenýshisi Qaısar Berdiǵulov, al «Aıbyn daryny» zııatkerlik oıynynyń úzdigi retinde Semeı qalasyndaǵy mamandandyrylǵan mektep-lıseıdiń tárbıelenýshisi Erqanat Kenjehanov tanyldy. Semeı qalasyndaǵy mamandandyrylǵan mektep-lıseıdiń tárbıelenýshileri «Aıbyn» jıynynyń jáne áskerı-dalalyq taktıkalyq oıynnyń jeńimpazdary dep jarııalandy. Jalpykomandalyq esepte birinshi oryndy áskerı-patrıottyq klýbtar arasynda – Aqmola oblysynyń «Batyr» áskerı-patrıottyq klýby, al joǵary oqý oryndary áskerı kafedralarynyń arasynda – Qazaq ulttyq agrarlyq ýnıversıteti, respýblıkalyq áskerı mektep-ınternattary arasynda – Semeı qalasynyń mamandandyrylǵan mektep-lıseıi ıelendi. Qorǵanys vedomstvosynyń basshysy robotty tehnıkalar men ushqyshsyz ushý apparattarynyń kórmesimen tanysty. «Jas ulan» áskerı mektebiniń tárbıelenýshisi qoıan-qoltyq kúreste óz sheberligin kórsetse, áskerı-tehnıkalyq mekteptiń jigitteri motosıkl men kvadrosıkldy júrgizýdegi keremet ónerlerimen kórermendi tánti etti. Sodan keıin aspanǵa ushqysh­syz ushý apparattary kóterildi. Al avıasııalyq oqý-jattyǵý orta­lyǵynyń kýrsanttary men Áýe qorǵanysy kúshteri áskerı ınstı­týtynyń jas ushqysh túlekteri ushýdaǵy jetistikterin pash etti. «Otandy súıý – órkenıettiliktiń birinshi belgisi. Dese de, ósý men órkendeýdiń ózi – tek ózin ózi qorǵaı alatyn elderge ǵana buıyratyn baq. О́zderińizge málim, bıyl elimizdiń Táýelsizdigine 25 jyl tolady. Bul jyldardyń basty jeńisi de, erteńgi jemisi de búgingi urpaq – sizdersizder», – dedi I.Tasmaǵambetov. Jas patrıottardyń ortaǵa shyǵyp, barlyq jıynǵa qaty­sý­shylarmen birge saltanatty ant qabyldaýy jabylý rásiminiń aıryqsha sáti boldy. Osydan keıin «Aıbyn» jalaýy túsirilip, jıyn resmı túrde jabyldy. Esterińizge sala ketsek, «Aıbyn» ekinshi respýblıkalyq áskerı-patrıottyq jıynyna 800-den asa qazaqstandyq qyz-jigit qatysty. Atap aıtqanda, elimizdiń barlyq óńirinen áskerı-mektep ınternattardyń tárbıelenýshileri, áskerı-patrıottyq klýbtardyń músheleri men joǵary oqý oryndary áskerı kafedralarynyń stýdentteri keldi. Jıynǵa olardyń árqaısysyn áskerı qyzmetshi, patrıot bolsam degen nıet pen áskerı ispen aınalysýǵa degen shynaıy tilek jetelep keldi. Bıyl «Aıbynǵa» Qazaqstannyń joǵary oqý oryndary áskerı kafedralarynyń kýrsant qyzdary birinshi ret qatysty. Dene tózimdiligi men shydamdylyqqa, dáldik pen eptilikke normatıvter tapsyrý birinshi synaq bolatyn. Osy synaq barysynda jigitter belaǵashta kúshtik jattyǵýlardy, al qyzdar – keshendi kúshtik jattyǵýlardy oryndady. Sonymen qatar, qatysýshylar avtomatty bólshek­teý jáne jınaqtaýda óz eptilikterin kórsetti. Atys shebinde jastar úshin granat laqtyrý taǵy bir sy­naq túri boldy. Lagerdiń aýmaǵynda naǵyz kórme alańy óristetildi. «Me­niń robotym» baıqaýyna qaty­sýshylar robotty tehnıka aý­qymyndaǵy ózderi jetken jetis­tiktermen, sondaı-aq, jańa ıdeıa­larmen tanystyrdy. «Egemen-aqparat»