«Qazaqstan barysy-2016». Tórt balýan jarystan shettetildi

«Qazaqstan barysy» týrnıri jaqyndap keledi. Qazir jarysqa daıyndyq jan-jaqty júrip jatyr. Búgin Astanada osy týrnırge baılanysty ótken baspasóz máslıhatynda Qazaq kúresi federasııasynyń atqarýshy komıtetiniń múshesi Tastanbek Esentaev tórt balýannyń jarystan shettetilgenin aıtty. Onyń aıtýynsha, Dúnıejúzilik dopıngke qarsy agenttik Mereı Turashev, Alekseı Kosachev, Samır Mamedov pen Aıbek Nuǵymarovtyń qanynan tyıym salynǵan preparatty anyqtaǵan. Osyǵan baılanysty olar 10 shildege deıin jarystan shettetiledi. «Tórt balýanymyz analız tapsyrǵanda dopıng synamasynan óte almady. Olardyń qanynan meldonıı dárisi tabyldy. Olar 20 mamyr kúni qan tapsyrǵan. Biraq, ol sportshylardyń qanynda az bolyp shyqty. Balýandar dárini tyıym salynǵan ýaqytqa deıin qabyldaǵan. Al meldonııge osy jyldyń 1 qańtarynan bastap tyıym salynǵany belgili. Bul dári adamnyń salmaǵy kóp bolsa qanynda 4-5 aıǵa deıin júredi. Endi federasııa 10 shildeden keıin balýandardy jarysqa qatystyrý-qatystyramý máselesin taǵy qaraıdy», dedi ol. Dastan Kenjalın. Foto: ulttyqsport.kz