Májilistiń jańa Tóraǵasy saılandy

Keshe Parlament Májilisiniń kezekti jalpy otyrysy bolyp, onda eki másele qaraldy. Birinshi kezekte halyq qalaý­ly­lary Májilistiń burynǵy Tór­aǵasy Baqtyqoja Izmuham­betovtiń «Ardagerler uıymy» res­pýblıkalyq qoǵamdyq birlestigi Ortalyq keńesiniń tóraǵasy bolyp saılanýyna baılanysty óz er­kimen ornynan túsýi týraly máse­leni qarap, biraýyzdan qoldaý bildirdi. Osydan keıin palata otyrysyna tóraǵalyq etýdi Májilis Tóra­ǵa­synyń orynbasary Gúlmıra Isım­baeva jalǵastyryp, depý­tattarǵa kún tártibindegi ekinshi máseleni jarııa etti. Ol – Parlament Májilisiniń jańa Tóraǵasyn saılaý. Zań boıynsha palata tóraǵalyǵyna kandıdatty Májilis depýtattary usynady. Sóz alǵan depýtat Qýanysh Sul­tanov Májilistegi «Nur Otan» partııasy fraksııasynyń tapsyrýymen Qazaqstan Respýb­lıkasy Par­lamenti Májilisiniń tóraǵalyǵyna bir ǵana depýtattyń, ıaǵnı Nurlan Nyǵmatýlınniń kandıdatýrasyn usyndy. Odan ári Q.Sultanov N.Nyǵmatýlınniń ómirbaıan bet­terine sholý jasap ótti. Basqa kandıdat usynyl­maǵandyqtan, G.Isımbaeva N.Nyǵmatýlınniń kandıdatýrasyn talqylaýdy usyndy. Alǵashqy sóz kandıdatty usynýshy Qýanysh Sultanovqa berildi. Nurlan Zaırollauly Elbasy Nursultan Nazarbaevtyń elimizdiń eń jaýapty máselelerin sheshýde zor senim kórsetip júrgen áriptesteriniń biregeıi. Ol memleketimizdiń qurylysy men qýattanýy baǵytynda Prezıdent tapsyrǵan asa mańyzdy laýazymdyq qyzmetterdi abyroımen atqaryp, qaıratyna bedel qosyp ósýmen kele jatqan tulǵa. Ekinshiden, bizdiń usynǵan kandıdatymyz óńirler men memleket basqarý isiniń kúrdeli ári mol tájirıbeli mektebinen ótip, el tynysyn, jaǵdaıyn bilip, shyńdalyp kemeldengen, elimizge tanymal memleket qaıratkeri. Úshinshiden, N.Nazarbaevtyń qoǵamymyzdyń sapasyn ózgertetin Bes ınstıtýttyq reformasy, «100 naqty qadamy» bizdiń barlyǵymyzdyń aldymyzǵa, ásirese, Úkimetke, Parlamentke, sot bıligine, barlyq memlekettik ınstıtýttarǵa jańa mindetter qoıyp otyr. N.Nyǵmatýlın – Elbasynyń osy strategııasynyń júzege asyrylýynyń mazmuny men tetigin biletin adam. Ol jańalyqqa, qandaı da damý men ózgeristerge sezimtal, múmkin bolatyn daǵdarystardyń aldyn alýǵa qabiletti. Parlament jumysyn utymdy uıymdastyrýǵa sheber, shymyr, shıraq basshy, deı kelip, áriptesterinen onyń kandıdatýrasyn qoldaýdy ótindi. Odan keıin sózdi depýtat, «Aq jol» partııasy fraksııasynyń basshysy Azat Perýashev aldy. Ol osydan 4 jyl buryn N.Nyǵmatýlınniń Májilistiń besinshi shaqyrylymynda Tóraǵa bolǵanyn eske alyp, onyń parlamentarızmge demokratııalyq dástúrler ákelgenin atap ótti. N.Nyǵmatýlın pikirsaıystarǵa tikeleı aralasyp, oń sheshimderdiń qabyldanýyna ıgi yqpal etip otyrdy. Fraksııalardyń pikirleri men usynystarynyń aıtylýyna da jaǵdaı týǵyzdy, deı kelip, kandıdatýrany qoldaıtynyn jetkizdi. Halyqtyq kommýnıs­ter partııasy fraksııasynyń jetekshisi Vladıslav Kosarev te N.Nyǵmatýlınniń kandıdatýrasyn qoldap sóıledi. Ol ótken shaqyrylymda ózin spıker retinde tamasha qyrynan kórsete bildi. Zań jobasyn jetkilikti dárejede daıyndamaı ákelgen Úkimet múshelerin Nurlan Zaırollauly minberden túsirip jiberip otyrdy. Osynyń ózi Parlamentte joǵary deńgeıli isker ahýal qalyptastyrǵan edi, dedi ol. Depýtat Nurtaı Sabılıanov ta óziniń sózinde N.Nyǵmatýlınniń kandıdatýrasy Tóraǵalyqqa ábden laıyqty ekenin atap aıtty. Odan ári Májilis jasyryn daýys berýdi ótkizetin jáne onyń nátıjesin anyqtaıtyn 7 adamdyq Sanaq komıssııasyn saılady. Jasyryn da­ýys berý úderisine 20 mınóttik úzilis jarııalandy. Sanaq komıssııasynyń tóraǵalyǵyna saılanǵan Asqar Bazarbaev jasyryn daýys berý nátıjesinde Nurlan Nyǵmatýlınniń Májilis Tóraǵasy bolyp saılanǵanyn jarııalady. Onyń kandıdatýrasyn jaqtap saılaýǵa qatysqan 102 depýtattyń bári derlik daýys bergeni belgili boldy. Otyrys qorytyndysynda jańa Tóraǵa N.Nyǵmatýlın ózin biraýyzdan saılaǵan áriptesterine alǵysyn aıtty. Bul – men úshin úlken mártebe ári úlken jaýapkershilik. Aldaǵy ýaqytta Elbasy Nursultan Nazarbaevtyń jáne sizderdiń senimderińizdi aqtaý, Májilistiń jumysyn odan ári kúsheıtý jolynda barlyq kúsh-jigerimdi, tájirıbemdi aıamaı jumsaıtynyma sendiremin, dedi ol. Jaqsybaı SAMRAT, «Egemen Qazaqstan»