Baqyt qushaǵyndaǵy baıqaý

Elbasy Nursultan Nazarbaevtyń 2013 jylǵy sheshi­mimen «Mereıli otbasy» jalpyulttyq baıqaýynyń jarııalanýy elimizdegi eń jarqyn merekelerdiń qata­rynda shattyq shashýda. О́ıtkeni, «Mereıli otbasy» – Máńgilik eldiń tiregi». Sondyqtan, Aqmola oblysyndaǵy baıqaýdyń qorytyndy kezeńi osy uranmen ótkizilýi 320 adam qatys­qan tálim sharanyń saltanatyn asha túskeni anyq. – Memleket basshysy atap ótkendeı, otbasy – Qazaqstan qoǵamynyń tiregi, el jetistikteriniń negizi, – dedi oblys ákiminiń orynbasary Nurlan Nurkenov quttyqtaý sózinde. – Otbasylyq qundylyqtardy, otbasy men neke­ni jáne kóp balaly bolý ónegelerin keńinen dáripteý, hal­qymyzdyń ulyq murattarynyń biri. Mundaı ónegeli otbasylar bizdiń óńirimizde de kóptep sanalady. Jyl sanap baıqaýǵa qatysýshylardyń sany artyp keledi. Búgin biz tańdaýlylardy anyqtap, qýanyshtaryna ortaqtasamyz. Osynaý qymbat dástúrimiz ámanda jalǵasyn taba bersin. Uıymdastyrý komıtetiniń sheshimimen Agafonov­tardyń ınternasıonaldyq otbasy, muǵalimdik ótili 407 jyldy quraıtyn Loshkovtardyń áýleti arnaıy júldege ıe boldy. Al úshinshi oryndy 11 bala tárbıelep, shańyraq qurǵandaryna 60 jyl tolýyn toılap otyrǵan Aıtqojınder men Qorǵaljyn eline aty keńinen tanymal Smanovtardyń yntymaqty uıasy jeńip aldy. Jarqaıyń aýdanynan kelgen Rahıma Sultanova apaǵa «Dostyq» mádenıet saraıyna jınalǵan qaýym túregep turyp qurmet kórsetti. «Batyr Ana» 49 jasynda jesir qalǵanymen, tirshilik aýyrtpalyǵyna qaıyspaı, 25 nemere, jeti shóbere súıip otyr. Sondaı-aq, jastyǵyna qaramastan, ózderiniń úsh balasy men eki nemeresin ósirip, buǵan qosa, úsh balany asyrap alǵan Zerendi aýdanynyń turǵyndary Saıran men Gúlnur Ybyraevtarǵa arnalǵan qoshemet te aıryqsha boldy. Bul eki otbasy júldeli ekinshi orynnan kórindi. Baıqaýdyń bas júldesi Sandyqtaý aýdanynyń Qurmetti azamaty, belgili kásipker Atlan Dokaev pen Makın qalasynyń turǵyny, I toptaǵy múgedektigine qaramastan 17 balany kútimge alǵan Serik Ákimbaevtyń otbasyna buıyrdy. Aldaǵy qyrkúıek aıynda osy otbasylardyń bireýi respýblıkalyq baıqaýǵa qatysatyn bolady. Shara sońynda búldirshin Dáýlethan Álınurdyń tusaýy kesilip, merekelik konsert qoıyldy. Baqbergen AMALBEK, «Egemen Qazaqstan» Aqmola oblysy