Shyn júırik top ishinde tanylady

[caption id="attachment_48022" align="alignleft" width="264"] Rio2016_AO[/caption]

Olımpıadanyń bastalýyna 43 kún qaldy

Sońǵy aptanyń ishinde Qazaqstan sportshylarynyń Rıo Olımpıadasyna qatysý úshin alǵan lısenzııalarynyń sany taǵy 3-ke artyp, barlyǵy 102-ge jetti. Alamanǵa at qosatyn sańlaqtarymyz qatary osylaısha birtindep kóbeıip kele jatyr. Sonyń ishinde jeńil atletter 22 úmittige deıin ósti. Odan keıingi oryndy 11 joldamany baıdarka men kanoeda esýshiler alsa, úshinshi satyny árbirinde 10 oryn bar boksshylar men aýyr atletter alyp otyr. Bulardyń barlyǵynda sportshylar tıesili joldamany ózderi jeńip alǵan bolsa, aýyr atletterde ol komandalyq sıpatta beriledi. Sondyqtan sporttyń osy túrinen ǵana ázirge Rıoǵa kimderdiń baratyndary belgisiz. Munyń aldynda kúrestiń barlyq túrleri boıynsha qurama sapyna kirgender jarııalanǵan bolatyn. Bizdegi eń bir ózekti taqyryp qazir osy ziltemirshiler tóńireginen týyndaǵan daý-dalaba bolyp otyr. Ázirge bul máselege tolyq núkte qoıylyp, tııanaqtalyp bitken joq. Osy rette burnaǵy kúni Lozannada ótken Halyqaralyq olımpııalyq komıtet sammıtiniń byltyrǵy kúzden beri dopıng daýyna ushyrap jatqan Reseı jeńil atletteriniń Olımpıadaǵa qatysýyna qarsylyq bildirmeıtin sheshim qabyldaýy kóńilge eptep úmit sáýlesin uıalatady. Osyǵan qatysty qorytyndy jıyn 30-31 shilde kúnderi qaralyp, eń sońǵy tujyrymy shyǵarylady. Degenmen, aýyzdy qý shóppen súrte beretin retimiz joq. Sporttyń basqa salalarynan da tym qara jaıaý emespiz. Sonyń ishinde boksshylar men jeńil atletterge, sondaı-aq balaýandarymyzǵa artatyn úmitterimiz zor. Sondyqtan qazan aýzyn joǵary sanaıtyn ýaqyt ta jaqyndap kele jatqanyna senýimiz kerek.

Aýyr atletterdiń ahýaly qandaı?

Qazirgi tańda qazaqstandyq sportsúıer qaýymdy erekshe tolǵandyryp otyrǵan máseleniń biri osy bolsa kerek. Al sońǵy ýaqyttary bizge jetip jatqan aqparlar onshalyqty kóńildi qýandyryp otyrǵan joq. Aptanyń basynda Halyqaralyq aýyr atletıka federasııasy (IWF) Ilıa Ilıniń Beıjińdegi synamasynan da dopıng belgisi, dáliregi, stanozolol tabylǵanyn habarlady. Buǵan deıin onyń Londondaǵy synamasynan tyıym salynǵan degıdrohlorometıltestosteron degen preparat shyqqany belgili bolǵan edi. Sarapshylar osyǵan qarap, qazir Qazaqstan sportyna úlken qaýip tónip turǵanyn aıtyp jatyr. Olar munyń sońy elimizdiń aýyr atletıka quramasyn túgeldeı Rıoǵa jibermeý jóninde sheshim qabyldaýǵa aparyp soqtyrýy múmkin ekenin de alǵa tartady. Eger Halyqaralyq olımpııalyq komıtet Qazaqstan aýyr atletterin kináli dep tapsa, olar Beıjiń men Londonda jeńip alǵan medaldaryn túgel qaıtaryp berýge májbúr bolady. Osylaısha 5 birdeı altyn júlde keri qaraı qaıtady. Qazaqstan úkimeti bul dopıng daýyna qatysty sońǵy sheshimdi HOK qabyldaıtynyn, al bılik tarapynan sportshylarǵa quqyqtyq qoldaý jasalatynyn talaı márte málimdedi. 21 maýsymda Qazaqstan Premer-Mınıstri Kárim Másimov Ulttyq olımpıada komıtetiniń tóraǵasy Tımýr Qulybaevqa Rıo-de-Janeıro Oıyndary aldynda sportshylardy túgel tekserýdi tapsyrdy. «Qazirgi tańda Qazaqstan men Reseı sportshylarynyń dopıng qoldanýyna qatysty kóptegen suraqtar týyndap otyr. Múmkindikterdi qarastyrýymyz kerek. Bálkim, jeke demeýshilerdiń esebinen jaqsy zerthana satyp alýymyz qajet shyǵar. Sonda bizdiń sportshylar jarysqa qatyspas buryn osy testten óte alady» dedi Premer-Mınıstr. Qazaqstan Ulttyq olımpıada komıtetiniń ókilderi «Endi bul daý Qazaqstanda sheshilmeıdi. 27 maýsymda bolatyn HOK tártiptik keńesi otyrysynyń sheshimin kútemiz» degendi aıtty.  Murat AITQOJA