Grýzııa elinen ornyn tapqan

qandasymyz Qazaqstan atyn jaqsy jaǵynan tanytyp júr Búginde Qazaqstanda týyp, shet memleketterde kásiptiń urshyǵyn ıirip, qazaq ul-qyzdarynyń ne nársege de qabiletti ekenin kórsetip, dáleldep júrgen qandastarymyz kóp-aq. Alty qurlyqty meken etken halyqtardyń ishinde qandastarymyz da atakásipti dóńgeletip, Otanynyń atyn aıǵa jazǵandaı aıshyqtap júr. Olardyń derligi elimizde júrip bıznestiń alǵashqy qadamdaryn jasap úlgergen. Keıin shetelderge baryp, iri kásiporyndardyń negizin qalaǵan. Sondaı jannyń biri – Saıda Táýekelova. Qazaq qyzy osydan týra on jyl buryn otbasymen Grýzııaǵa kóship barǵan. Mine, sodan beri ol  ózi qalaǵan jetekshi kompanııanyń tizgindeýshisi, bıznes álemindegi ataqty názik jandylardyń biri bolyp keledi. S.Táýekelova elde júrgende zańgerliktiń qyr-syryn jetik meńgergen eken. Osynda túrli mekemelerde zańger bolyp ju­mys istep, mol tájirıbe jı­naǵan. Aıtýynsha, adam aldyna maqsat qoısa, eńbek etse, yntalansa, sol maqsatyna jetedi. Bul, shynynda da, ómirdiń jazylmaǵan zańy. «Osydan 10 jyl buryn jubaıym Grý­zııadaǵy iri kásiporynǵa ju­mysqa shaqyryldy. Sosyn ol kóp oılanbastan, atalǵan memleketke ketti. Men balalarymmen Qazaqstanda qaldym. Kúıeýim bir aıdyń ishinde úı máselesin sheship, bizdi kóshirip aldy. Ol kezde qyzymyz 4 aı­­­lyq bolatyn. Men bala kú­timine baılanysty demalys­ta boldym, sondyqtan jańa jerge kóshý men úshin qıynǵa soqpady», – deıdi Saıda. Áıtse de tanys emes orta, jat qala, buryn kórip-bilmegen adamdar onyń óz kásibin bas­taýyna az da bolsa kedergi kel­tirgen. Ol aldymen til úı­rený kerektigin uqqan. Sosyn taý halqynyń talǵamyn zerttep, bul elde ne ótimdi, grýzın­der neni qalaıtynyn anyq­taý qajet ekenin túsingen.  Osy­­laısha jat elde júrip, qandaıda bir kásiptiń shylbyryna jarmasýdy kózdepti. «Men Grýzııada múldem bol­ǵan emes edim. Bul memle­ket jaıynda tek atam men ájem­niń aıtqan áńgimelerinen, telearnalar men gazetterdegi jańalyqtar, fotosýretter se­kildi dúnıelerden biletinmin. Úıdegi úlken kisilerdiń Gagra, Pısýnda, Batýmı týraly aıtqan áńgimeleri arqyly taý halqyn tanı bastadym. Bir qyzyǵy, Tbılısı týraly áńgimeni ájem úlken tebirenispen aıtatyn. Nege ekenin qaıdam, bul qala ol úshin eń súıikti shaharlardyń biri sanalatyn», – deıdi ol. Sonymen qatar, S.Táýe­ke­lova Grýzııa tarıhyn úlken yqylaspen oqyǵanyn aıtty. «Meni Grýzııa óte ertedegi el retinde tańdandyrdy. Sonymen qatar, óz shyǵarmalarynda orys jazýshylary sýrettegen jerlerdi aralaý óte unady. Qyzymyz ekeýmiz Grýzııanyń barlyq jerinde boldyq desek te bolady. Grýzııa – óte ádemi memleket, grýzınder – qonaqjaı halyq, – deıdi ol. – Grýzııaǵa kóshpes buryn men iri kompanııada zańger bolyp jumys istedim. Meniń qarjy salasynda da tájirıbem bar, belgili bir ýaqyt aralyǵynda qundy qaǵazdardyń ortalyq depozıtarııinde jumys jasadym.  Osynda júrip, jer­gilik­ti jerdiń zańnamasymen tanystym. Maǵan mundaǵy bız­nestiń tazalyǵy unady. Sonymen, osydan tórt jyl buryn seriktesterimmen bi­rigip, saqtandyrý brokeri qyz­metin kórsetetin kompanııa ashýdy uıǵardym. Jumysymyz óz retimen júrse de, qıyndyq týyndaǵan kezeńder de bolyp turdy. Sebebi, bizge jumysqa turǵysy kelgen adamdardyń barlyǵy derlik aǵylshyn tilinde sóıledi jáne úlken talaptar qoıdy. Olarǵa eń aldymen ózderin jumysta kórsetip, kompanııaǵa paıdasyn tıgizip, sodan keıin baryp kareralyq basqyshyn quraýǵa bolatynyn túsindirip otyrýǵa týra keldi». Osylaısha, S.Táýekelova jańa kásibin bilikti qyzmet­kerlermen jasaqtap, úlken ujym qurady. Eńbekqor­lyǵy sonsha, olar túski asqa da bar­maı, jumys isteıdi. Basshylyqtyń qoldaýymen qyz­metkerler alys-jaqyn shetelderge is-saparlarǵa shy­ǵyp, óz jumystaryna qul­shy­­nys tanytady. «Qazir biz Kavkaz syrtynda iri bıznes ash­paqpyz. Tbılısı men Erevanda óz keńselerimiz bar. Jalpylaı aıtqanda, uıymdasa jumys jasap kelemiz», – deıdi qandasymyz. Saıdanyń arman-maqsaty kóp-aq. Ol Qazaqstan men Grý­zııa arasyndaǵy áriptestikti túrli salada damyta túskisi kelip, jańa jobany qolǵa alypty. Qııalyna qanat baılaǵan otan­dasymyz, aldymen Almaty men Astana qalalarynda grýzın sýretshileri Merab Gogıladze men Irma Kýsıanıdiń týyndylarynan kórme uıymdastyrdy. Mundaǵy tyń týyndy, buryn kórsetilmegen sýretter, shyn­aıylyǵy basym keshter qos qalanyń turǵyndaryn tamsandyrdy. Osynyń nátıjesinde jas grýzın dızaınerleri óner akademııasy túlekterimen yn­ty­maqtastyq kelisimine qol jetkizip, Qazaqstanǵa áıgili Emzar Bazerashvılı, Salo­me Rıgvava, Georgıı Rýhadze, Dato Kvantalıanı jáne Zýrab Janıashvılı sekildi óner ıe­leriniń jańa kolleksııalary ákelingen. «Meniń Grýzııadaǵy qoǵamdyq ómirim qarbalasqa toly. Men munda isker áıelder assosıasııasynyń múshesimin. Jumys barysynda tek TMD elderi ǵana emes, búkil álem kompanııalarymen kezdesemin. Endigi kezekte Qazaqstannan art-joba jasaýdy qolǵa alamyn», – deıdi ol. Sóz sońynda S.Táýekelo­va qazaq dalasyn, týǵan ólkesin jaqsy kóretinin, saǵynaty­nyn aıtty. «Qashanda Qazaqstan me­niń júregimde», – deıdi qan­dasymyz. Talǵat RAIYMBEK, «Egemen Qazaqstan»