Jetisý jaǵdaıymen tanysty

Premer-Mınıstr Kárim Másimov Almaty oblysyndaǵy áleýmettik nysandar jáne ınfraqurylym qurylysyn aralap kórdi Keshe Premer-Mınıstr Kárim Másimov jumys saparymen Tal­dyqorǵanǵa keldi. Úki­mettik delegasııanyń ju­mys baǵdarlamasynyń ty­ǵyz­­dyǵynan áńgime birden áýejaı­dan bastaldy. Almaty obly­sy­­nyń ákimi Amandyq Bata­lov Taldyqorǵan áýejaıy­nyń ushyp-qoný alabyna júr­gi­zilgen jóndeý jumystary já­ne onyń múm­kin­dikteri týraly aıtyp berdi. Negizinen Taldyqorǵan áýe­jaıy jylyna orta eseppen 26,5 myń adamdy tasymaldap, 600 áýe reısin jasaıdy. Jalpy áýe jaı­dyń ishki joldary, baılanys, elektr júıesi, dabyl quraldary tolyǵymen aýystyrylǵan. Sóı­tip, qalanyń kireberisindegi kelbetin kórgen soń úkimettik delegasııa Taldyqorǵannyń ońtústik-batysynda jarysa ári kókke shanshyla sándene boı kótergen turǵyn úı keshenine keldi. Taıaý jyldary bul arada jańadan 400 gektar jerge birneshe shaǵyn aýdan, áleýmettik-mádenı qurylymdar: balabaqsha, mektep, halyqqa qyzmet kórsetý ortalyǵy, drama teatr, emhana, qonaq úı, kórme kesheni salynyp, qala kólemi úlkeıe túsetini de habardar etildi. О́ńir basshysynyń orynbasarlary Ǵalymjan Ábdiraıymov, Serikjan Beskempirov, Serik Turdalıevter «Nurly Jol» baǵdarlamasy aıasynda jol, turǵyn úı qurylysy jáne «Aqbulaq» baǵdarlamasy boıynsha aımaqty gazdandyrýdy jedeldete damytý barysymen Úkimet basshysyn habardar etti. Osy jerde Jetisýdyń agrarly sektory, Jarkent-Qorǵas aglomerasııasy jobasymen óndiristik alqapty, ındýstrııalyq aımaqty qurý jóninde qysqasha habarlama jasaldy. Jergilikti bılik ókilderiniń aıtýynsha jaqyn jyldarda Panfılov aýdany, Nurkent aýylyn jańa qalashyqqa aınaldyrý josparlanǵan. Jańa qalashyqtyń ınjenerlik-kommýnıkasııalyq qurylys jumysynyń quny 5, 6 mlrd. teńge bolatyny da málim etildi. Jalpy Úlken Almaty sheńberli avtokólik jolyn júzege asyrý úshin Almatynyń alty kóshesi túıisetin sheńberli jol salynýy kerek eken. Úkimet basshysy Taldy­qor­ǵannyń ońtústik-batysyna taıaýda ǵana ashylyp, «Jasyl el» qozǵa­lysynyń oblystyq shtaby or­nalasqan jastarǵa qyzmet kórsetý or­talyǵynda boldy. Ondaǵy ınter­net-kitaphananyń jumysyn kórip, jergilikti jastarmen pikir almasyp, olardyń jumysqa ornalasýy sekildi ózekti máselelerine úkimettik delegasııa ókilderin de ara­las­tyra bildi. Kárim Másimov jumys saparynyń sońynda jaqynda ǵana qurylys jumystary aıaqtalyp, kóriktiligimen kóz tartatyn Oqýshylar saraıynda boldy. Onda óner salasynyń san qyryn ashatyn kórme, oıyn alańdary ornalasypty. Munda balalarǵa arnalǵan 50-ge jýyq túrli úıirmeler ashylyp, onda jas fızıkter, matematıkter, bıologtar, astronomdar jattyǵatyn bolady. Jobaǵa sáıkes, zerthanalar, fotosalondar jáne taǵy basqa sheberhanalar jabdyqtalady. Júzý basseıni, sán-saltanat mektebi, beınejazý stýdııa­sy, tipti balalar teatry da jumys isteıdi. Eń bas­tysy jergilikti ba­la­larǵa tartylatyn teńdessiz syı – juldyzdardy ala­qan­daryna salǵan­daı áserge bólenetindigi. Ol úshin ǵı­marat shatyryna qýatty teles­kop ornatylady. Sol arqyly májilis zaly­na arnaıy monıtor qoıy­lypty. Mundaı ǵalamat teles­kopııalyq qural elimizdiń birde-bir óńirinde joq eken­digin mamandar rastaýda. Sándi ǵımarattyń kon­serttik zalynda Úkimet músheleri men oblys aktı­viniń aldynda oblystyń áleý­mettik-ekonomıkalyq damýy jóninde óńir basshysy habarlama jasady. Úkimet basshysy birqatar mınıstrlerdi minbege shyǵaryp, Almaty ob­lysyna qatysty mınıstr­­likterde atqarylyp jatqan jumys­tar týraly aıtqyzdy. Jıyndy túıindeı kele bul kúni kóterilgen máselelerge tıisti tulǵalar jaýaby beriletindigin de málim etti. Nurbol ÁLDIBAEV, «Egemen Qazaqstan» Taldyqorǵan