Qolǵa úırengen qonjyq

О́skemenniń Semeıge qaraı shyǵatyn kúrejolynyń boıynda Gerasımovka degen aýyl bar. Tólegen Toqtarov aýyldyq okrýgine enetin osy aýyldyń turǵyny Ravshan Zúlfıev osydan úsh apta buryn aıýdyń qon­jyǵyn taýyp alǵan bolatyn. Ol Opytnoe pole eldi mekeniniń aýma­ǵynda sońynan ilesip kele jatqan bógde adamdardyń kólikterimen álde­bir ańdy qýalap, «qyzyqqa» batyp, ózara daýryǵysyp júrgendikterin baı­qaıdy. Bajaılap qarasa, kólikpen qaq­paılaǵany qonjyq eken. Anasyna ne bolǵany belgisiz. Qonjyq – jalǵyz. «Eger kishkentaı maımaqtyń anasy qasynda bolsa, bul «batyrlar» ne ister edi?» degen oı bılegen Ravshan tez arada beıbastaq áreketke toqtaý aıtyp, qonjyqty arashalap úıine alyp keledi. Kelinshegi dalanyń qorǵansyz qalǵan haıýanyna qarsy bolmaıdy. Al segiz jasar uly Jánibektiń qýanyshynda shek joq edi. Súp-súıkimdi maımaqpen ilezde dostasqan bala ınternetten aıýdyń balasyn baǵyp-qaǵý joldaryn izdeıdi. Ravshan aýyl ımamy eken. Mine, sodan beri ımamnyń úıi aýyldaǵy eń tanymal shańyraqqa aınaldy. Alǵashqyda aýyldastary aǵylsa, qazir irgedegi oblys ortalyǵynan da qonjyqty qyzyqtaýshylardyń aıaǵy basylar emes. Qaraqumyq, balyq, sút, buqtyrylǵan bıdaı berip asyraǵan kishkentaı aıýdyń salmaǵy alǵash kel­gende 7,5 kılo tartsa, qa­zir 18 kıloǵa jetti. Qon­jyq­tyń tamsanyp jeıtin táttisi – bal. – Bastapqyda uıań bolǵanymen, úırenise kele asyr salyp oınaıtyn boldy. Ishin qasý úshin alaqanyn jaıyp jiberip, shalqasynan jata qalǵandy jaqsy kóredi. Kishigirim uıadaǵy ornyna keshkilik tamaǵyna toıyp alǵan soń jatady da tań atqansha uıqyny soǵady, – deıdi Ravshan Zúlfıev. Bala Jánibekpen birge kún­delikti ózenge baryp shomylatyn qonjyq tabıǵat aıasynda da adamn­yń qasynan eki eli qalmaıdy eken. Adamǵa úırengen qonjyqtyń ós­ken kezinde tabıǵı ortada álde­kimge jem bolýy yqtımal ekenin aıtqan Zúlfıevter ony haıýanattar baǵyna tapsyrmaq nıette. Tabıǵat qorǵaý prokýratýrasy qyz­metkerleriniń keńesi boıynsha, Ravshan qonjyqty Shemonaıha aýda­nynyń Kamyshınskoe aýylyn­daǵy haıýanattar baǵyna ótkizbek. – Qonjyqqa ábden baýyr basyp qalyppyz. Kóńilimiz qımaıdy. Ásirese, balamnyń jibergisi joq. Otbasymyzdyń bir múshesine aınalǵan qonjyǵymyz úshin endi haıýanattar baǵyna turaqty baryp, jaǵdaıyn bilip turatyn bolamyz, deıdi ol. Dýman ANASh, «Egemen Qazaqstan» Shyǵys Qazaqstan oblysy, Ulan aýdany