Foto: RIA «Novostı»
Túrkııa prezıdenti Redjep Taııp Erdoǵan Reseıdiń Sý-24 bombardırovshıgi atyp túsirilýine baılanysty Reseı prezıdenti Vladımır Pýtınnnen keshirim surady. ras.kz habarynda túrik lıderiniń muny arnaıy joldaǵan málimdemesi arqyly jasaǵanyn jazady. «Erdoǵan atyp túsirilgen Reseı ushaǵy úshin Reseı prezıdentiniń aldynda keshirim ótindi», dep baıandaıdy Kreml baspasóz qyzmeti. Túrkııa basshysy RF prezıdentinen keshirim ótinýden bólek, Sý-24 ushaǵynyń atyp túsirilýine baılanysty jaǵdaıdy retteýge múddelilik bildirgen. «Bizde Reseı Federasııasyna qaraıtyn ushaqty atyp túsirý jóninde eshqashan aldyn ala bir nıet bolǵan joq ...Barlyq táýekeldi moınymyzǵa alyp, kóp jumsaı otyryp, biz qaza tapqan reseılik pılottyń denesin sırııalyq oppozısıonerlerden alyp, ony Túrkııaǵa ákeldik. Jerleý aldyndaǵy prosedýralar dinı jáne áskerı úrdisterge sáıkes júrgizildi. Mundaǵy barlyq jumystardy biz túrik-orys qarym-qatynasyna laıyqty joǵary deńgeıde atqardyq. Men endi qaza tapqan reseılik ushqyshtyń otbasyna ózimniń sezimimdi jáne kóńil aıtýymdy bildire otyryp, «keshirińizder» degim keledi. Sizderdiń qaıǵylaryńyzǵa ortaqpyn. Reseı pıloty ushqyshynyń otbasyn túrik áýletin sekildi qabyldaımyz. Jan jarasyn jeńildetý men keltirilgen zardaptardy jeńildetý úshin biz kez kelgen bastamaǵa ázirmiz», delingen Redjep Taııp Erdoǵan málimdemesinde. Málimdemede Túrkııa úshin Reseıdiń dos jáne strategııalyq áriptes bolyp tabylatyny aıtylǵan. Túrik bıligi sol qarym-qatynasty buzǵysy kelmeıdi. Erdoǵan sondaı-aq Reseı pılotynyń ólimimen baılanystyra aıtylyp júrgen Túrkııa azamatyna qatysty sot tekserisi bastalyp, júrip jatqanyn jazady. Ol bolǵan jaıǵa óziniń qatty ókinish bildiretinin aıta kelip, Túrkııa men Reseı arasyndaǵy burynǵy dástúrli dostyq qarym-qatynasty qalpyna keltirý, sondaı-aq aımaqtaǵy daǵdarysty oqıǵalarǵa birlesken qımyl jasaý, terrorızmmen kúresý úshin qoldan kelgenniń bárin jasaıtynyn jetkizedi. Eske sala keteıik, ótken aptada Túrkııa prezıdentiniń baspasóz hatshysy Ibragım Kalyn Túrkııa bıligi Reseıdiń Sý-24 bombardıovshıgi atyp túsirilgeni úshin keshirim surap, onyń óteýin qaıtarý jaıynda josparlap otyrmaǵanyn aıtqan edi. Reseı men Túrkııa qarym-qatynasyndaǵy daǵdarys 2015 jylǵy qarasha aıynda bul eldiń Sırııamen shekaralas aspanynda Reseıdiń Sý-24 ushaǵy atyp túsirilgennen keıin buzylǵan bolatyn. Ankaranyń málimdemesi boıynsha, Reseıdiń Sý-24 bombardırovshıgi eldiń áýe keńistigi tártibin buzǵan. Reseı qorǵanys mınıstrligi ushaqtyń Sırııa jeriniń ústinen ushyp bara jatqanyn málimdedi. Talǵat RAIYMBEK.
