Áskerı avıatorlar ant qabyldady

Aqtaý qalasyndaǵy avıasııalyq bazada merzimdi qyzmetke qabyldanǵan jas sarbazdar Otan aldynda adal bolý úshin ant qabyldady. Olar munda áskerı qyzmetin ótkerý úshin Atyraý oblysynan keldi. Ant qabyldaý arnaıy baǵ­darlamadan, atap aıtqanda, Konstıtýsııany, Qazaqstan Res­pýb­lıkasyn qorǵaý máselesi týraly zańnamanyń talaptaryn zerdeleýden bastaldy. «Senderdiń aldaryńda armııa­nyń qaýyrt kúnderi tur, áskerı isti izdenispen úırenińder, ójet, erjúrek bolyńdar, eń bastysy – birlikteriń myqty bolsyn. Bir-birińdi qoldap, qol ushyn berińder,  Qazaqstan Respýblıkasy Qarýly Kúshteriniń áskerı qyzmetshisi ataǵyna laıyqty abyroımen qyzmet atqa­ryńdar», – dedi Áskerı-áýe kúsh­teri qolbasshysynyń tárbıe jáne ıdeologııalyq jumystar jónindegi orynbasary, polkovnık Erkin Jumaǵalıev. Is-sharaǵa Qarýly Kúshterdiń ardagerleri, jas sarbazdardyń týystary men jaqyndary keldi. Sonymen qatar, jas sarbazdardy bólim basshylyǵy, týystary men dostary quttyqtady. Ant qabyldaýdan keıin týys­tary men jaqyndaryna sar­baz­dardyń qyzmet ótkeretin jaǵ­daıyn tanystyrý úshin oqý-jattyǵý korpýsy, kazarma, ashana, sport zaly kórsetildi. Atalǵan is-sharanyń este qalarlyǵy arnaıy maqsattaǵy bólimsheniń qoıan-qoltyq kúres tásilderin kórsetken sáti bol­dy. 30153 áskerı bóliminiń bas­shylyǵy jas jaýyngerler Otan aldyndaǵy boryshyn abyroımen atqaratyndyǵyn jáne bir jyldan soń aman-esen elge oralatyndyǵyn zor senimmen aıtty. «Egemen-aqparat»