Túrikmen-qazaq fýtbolynyń túlegi, Qazannyń «Rýbın» komandasynyń burynǵy bas jattyqtyrýshysy, qazir Dondaǵy Rostovtyń «Rostov» komandasyn jattyqtyryp júrgen belgili maman Qurban Berdyevke Reseı fýtbol odaǵynyń (RFS) ókilderi shyǵyp, qyzmettestik bolý turǵysynda áńgime qozǵady.
TASS-tyń deregi boıynsha, biraq ázirge mamanmen kelissóz júrgizilmegen. Degenmen, RFS jaqyn arada Qurban Bekıulyna Reseı quramasy tizginin alýdy usynatyn sııaqty.
Shyn máninde Berdyev ótken aptada «Rostovpen» aldaǵy eki fýtbol maýsymyna kontraktini jalǵastyryp qoıyp edi. Al kelisimshartta qyzyqty baptar da bar eken. Atap aıtqanda, resmı emes málimetterge qaraǵanda, jattyqtyrýshy bul kelisimshartty kez kelgen ýaqytta birjaqty buza alady. Osynysy úshin jáne eshqandaı ótemaqy tólemeıdi.
Reseı quramasyn 2015 jylǵy tamyz aıynan beri Máskeýdiń SSKA komandasynyń bas jattyqtyrýshysy Leonıd Slýskıı jattyqtyryp keldi. Ol quramany Eýropa chempıonatynyń irikteý tobynan alyp shyǵyp, Fransııada ótken fınaldyq kezeńine jetkizdi. Biraq fransýz jerinde Reseı komandasy qatty sátsizdikke ushyrady. Ol toptaǵy úsh oıynnyń bireýin teń aıaqtap (Anglııa – 1:1), eki oıynynda utyldy (Slovakııa – 1:2, Ýels – 0:3). Sóıtip, topta eń sońǵy orynda qalyp qoıdy. Osydan keıin Slýskıı óziniń ulttyq komandadan ketetinin málimdedi.
Talǵat RAIYMBEK.
