«Boks – tóbeles emes, ol – óner!»

– deıdi Atyraýǵa kelgen ataqty bylǵary qolǵap sheberi Gennadıı Golovkın Dańqty boksshy Gennadıı Golovkın Atyraýdyń tórinde sheberlik-sabaǵyn ót­kizdi. «Ákem – orys, sheshem – káris, al men – qazaqpyn!» – dep jar salǵan Genamen kezdesýge ju­mylǵan jurt H.Dosmuhamedov atyndaǵy Atyraý memlekettik ýnı­versıtetiniń «Jaıyq» sport zalynda ıin tiresip tur­dy. О́zinen dáris alýǵa, tip­ti qoltańba alýǵa nıetti jan­kúıerleriniń aldynda Gena boksshy qolyna qolǵap kıip, qum toltyrylǵan qapty da, ózine eliktep, izin basar izbasarlaryn da soqqylaǵan joq. – Boks – tóbeles emes, esh­qashan solaı bolǵan da emes. Muny boksshy bolýǵa umtylǵan ár jetkinshekke birden uǵyndyrý kerek, – dep sańq etti Gennadıı Golovkın. – Boks – óner! Al ónerdi ıgerý joly aýyr, maqsaty bar adam ǵana ony meńgere alady. Ár adam ómirde aldyna maqsat qoıa­tyn bolsa, sportta da dál sondaı murat qoıa bilý qajet. Maq­sat-muratsyz eshkim eshqandaı tabysqa da, jetistikke de jete al­maıdy. Ásirese, boksta bıik beles­ti baǵyndyrǵysy kelgender ár qadamyn myqtap oılanýy kerek. Gennadıı Golovkınniń pi­kirin­she, boksshylarǵa adal­dyq, shyn­shyldyq qajet. «Men jattyǵý zalynda tókken t­erimniń jemisin kórip júrmin. Jat­tyqtyrýshynyń aqyl-keńesi ǵana bıikke jete­leıdi», dep udaıy bapkerine qurmetpen qaraıtynyn bildirdi. Joldasbek ShО́PEǴUL, «Egemen Qazaqstan» ATYRAÝ