Júz teńgege bir kúlshe jeýge bolady

Shynynda búginde 100 teńgege toıyp tamaq ishý múmkin be? Tipten múmkin emes. Eń arzan degen ashanaǵa barsańyz, 100 teńgege jarty tabaq as bermeıdi. Qant qosylǵan bir stakan shaı ishýińiz múmkin. Odan basqaǵa bul saryala temir aqshanyń shamasy kelmeıdi. Al Baızaq aýdanynda ornalasqan «Rola-7» JShS-tiń qarjy dırektory Erke Toqtaǵulqyzynyń aıtýyna qaraǵanda 100 teńgege kishkene kúlshe jeýge bolatyn kórinedi. Qalaı deısiz ǵoı? Bul seriktestik sońǵy segiz jyldan beri kespe, jaıma, makaron ónimderin jáne un shyǵarýmen aınalysyp keledi. – Qazir eń arzan balmuzdaqtyń ózi 250-300 teńge turady, – deıdi Erke Toqtaǵulqyzy bizben áńgimesinde. – Biraq balmuzdaqty qansha jeseń de tamaq bolyp jarytpaıtyny anyq. Biz óz kespelerimizdiń bir danasyn 10,90 teńgeden bosatamyz. Aradaǵy deldaldar ústine taǵy sondaı aqsha qosyp satýy múmkin. Bul kespelerdi qaınaǵan sýǵa salsańyz, 5-7 mınýtta daıyn bolady. Bir kespeniń ózi bir adamnyń qarnyn toıdyrady. Al qazanǵa bes danasyn salsańyz, kózdi ashyp-jumǵansha bir tabaq kúlshetaı daıyn degen sóz. О́te arzan, ári dámdi jáne tez daıyndalatyn bolǵandyqtan shyǵar, bizdiń ónimimizge suranys óte joǵary. Stýdentter, jumysyna asyqqan jandar, aqshasyn únemdeýshiler... áıteýir, bizdiń kespelerdiń saýdasy jaqsy júrýde. Bir qaraǵanda bizdiń ónimimizdi tek turmysy nashar jandar ǵana alatyn sııaqty bop kórinedi. Bul qate túsinik. Qazir qaltaly jandar da sapaly ári dámdi jáne qazannan tabaqqa tez túsetin tamaqtardy unatady. Son­dyqtan bizdiń ónim barshaǵa arnalǵan. Shynynda «Rola-7» JShS-tiń ónimderi joǵarǵy suranysqa ıe. Sodan bolar seriktestik táýligine 5 tonna makaron, jaıma ónimderin, 30 tonnaǵa deıin un shyǵarady. – Búginde bizdiń kásiporynda 150 adam jumys isteıdi, – deıdi bul jóninde «Rola-7» JShS-tiń dırektory Tursynbek Nurbaev. – О́tken jyly bankten 165 mln. teńge nesıe alyp, onyń 92 mln.-yna zamanaýı qondyrǵylar satyp alyp, ornattyq. Qazir 14 túrli ónim shyǵarýdamyz. Un Soltústik Qazaqstan oblysynan tikeleı jetkizilip otyrǵandyqtan bizdiń ónimniń baǵasy óte arzan. «Rola-7» JShS sońǵy kez­deri óz ónimderin tek osy óńirge ǵana emes, shet memleketterge de shy­­ǵarý maqsatynda biraz áre­ketter jasapty. Nátıjesinde Aý­ǵanstannyń iri saýda oryndarymen kelisimshart jasasyp, eki vagon ónimderin jibermek. Arzan ári sapaly ónimniń tutynýshysy da kóp bolatyny bárimizge belgili. Endeshe «Rola-7» JShS-tiń bul qadamy baıandy bola bergeı! Oralhan DÁÝIT, «Egemen Qazaqstan» Jambyl oblysy