Jergilikti bıznes – bereke uıytqysy

Qazaqstan Respýblıkasynyń «Atameken» ulttyq kásipkerler palatasy prezıdıýmynyń tór­aǵasy Tımýr Qulybaev jumys saparymen Kókshetaý qalasynda boldy. Ol aldymen Kókshetaýdaǵy irgeli kásiporyndardyń biri «Moloko Sınegorıa» sút zaýy­tynyń jumysymen tanys­ty. Kásiporyn basshysy Elena Mıhaılovanyń aıtýyna qara­ǵanda, zaýyt ýltrapasterlengen A3/Flex sútin óndirý bo­ıynsha eki birdeı tehnologııalyq jelimen jabdyqtalǵan. Jaqynda zaýytta taǵy bir  joǵary temperatýrada sút óńdeıtin jeli iske qosyldy. Sondaı-aq, aldaǵy ýaqytta shved ádisi boıynsha qyshqyl sút ónimderin,  grek jabdyqtarymen «stefart» ıogýrtyn, fınderdiń ádisimen japsyrma qaǵazy men kólemi 1-2 lıtrlik shısha shyǵaratyn jańa jelilerdi iske qosý josparlanǵan. – Kásiporynnyń qazirgi za­manǵy ozyq tehnologııalyq ádisti qoldanýy óndiris kólemin edáýir arttyryp, joǵary sapaly ónim shyǵarýǵa múmkindik berýde. О́nim negizinen, Qazaqstannyń ishki naryǵyna jóneltilýde. Aldaǵy ýaqytta Reseı men Túrikmenstan elderine eksportqa shyǵarý kóz­delip otyr, – dedi óndiris ornynyń basshysy. Budan keıin T.Qulybaev óńir­de kásipkerlikti damytýdyń tıimdi baǵyttary men túıtkildi máselelerin sheshýdiń joldaryn qarastyrǵan keńeıtilgen keńes ótkizdi. Onyń jumysyna oblys ákiminiń birinshi orynbasary Qadyrhan Otarov, oblystyq departamentter, basqarmalar men vedomstvolardyń basshylary oblystyq máslıhattyń depýtattary, óńirlik kásipkerler palatasy men «Damý» kásipkerlikti damytý qorynyń ókilderi qatysty. – Búgingi tańda, Memleket bas­shysy Nursultan Nazarbaevtyń tapsyrmasyna sáıkes, elimizde kásipkerlikti damytý baǵytynda «Bıznestiń  jol kartasy-2020» tárizdi memlekettik baǵdarlamalar men aýqymdy jobalar qolǵa alynǵan. Osynyń nátıjesinde respýblıkamyzda kásipkerlik keń óris alýda. Astanalyq oblys Aqmola óńirinde de iri kásiporyndarmen qatar, shaǵyn jáne orta bıznes damý ústinde. Búgingi bizdiń basty mindetimiz kásipkerler men memlekettik organdar arasynda jıi kezdesetin túsinispeýshilik pen ákimshilik ke­dergilerdi azaıtý bolyp tabylady, – dedi Tımýr Qulybaev óz sózinde. Keńes barysynda óńirlik kásipkerler palatasynyń bas­shy­sy Qazybek Eskendirov sha­ǵyn jáne orta bıznesti damy­tý baǵytynda qolǵa alynǵan jumystar týraly baıandady. Atap aıt­qanda, oblys boıynsha Indýstrııalandyrý kartasyna 15 joba engizilip otyr. Onyń ishinde 10 joba aýyl sharýashylyǵy salasynda, ıaǵnı, sút jáne et ónimderin óńdeý, kúrke taýyq ósiretin keshen jáne taýarly-sút fermasyn salý, mal azyǵyn óndirý boıynsha qolǵa alynǵan. – О́ńirlik palata 2015 jyldan bastap kásipkerlerge servıstik qyzmet kórsetýde. Byltyrǵy jyly 1677 kásipker 2500-den astam servıstik qyzmetti paıdalandy. Oǵan qosa, «Bıznes-mektep» jobasy boıynsha 1000-nan astam adam arnaıy kýrstan ótti. Bul 150 adamnyń óz kásibin ashyp, 324 jobanyń júzege asyrylýyna múmkindik berdi, – dedi Qazybek Eskendirov. Keńes otyrysy barysynda sýbsıdııa alý, iskerlik top ókilderin qorǵaý jáne eldegi tekserýler men qadaǵalaý organ­darynyń sanyn qysqartý tárizdi máseleler de qozǵaldy. – Qatysýshylar tarapynan qo­ıylǵan saýaldardyń kó­bi osyǵan deıin talaı ret aı­tyl­ǵan jáne tıisti memlekettik qurylymdardyń baqylaýynda tur. El ekonomıkasyn damytýda shaǵyn jáne orta bıznestiń belsendiligi artyp keledi. Atalǵan qurylym kóptegen áleýmettik máselelerdiń oń sheshimin tabýyna uıytqy bolýda. Búgingi kúni olardyń quqy men múddesin ulttyq kásipkerler palatasy sııaqty ınstıtýt qorǵaıdy. Budan bylaı memleket pen bıznes bir-birine túsinistikpen qarap, barlyq máseleni kelise sheshetin bolady, – dedi keńesti qorytyndylaǵan prezıdıým tóraǵasy. Baqbergen  AMALBEK, «Egemen Qazaqstan» Aqmola oblysy