Qazaqstan qor bırjasynda saýda-sattyq 64,4 paıyzǵa artty

«Qazaqstan qor bırjasy» aksıonerlik qoǵamy (KASE) 2016 jyldyń birinshi jarty jyldyǵynyń qorytyndysyn jasady. Aksııalar naryǵynda saýda-sattyq kólemi ótken jyldyń sáıkes kezeńimen salystyrǵanda aıtarlyqtaı 64,4 paıyzǵa artty. KASE ındeksi jyldyń basynan beri 14,7 paıyzǵa (jyldyq 29,4 paıyz) ósti. Sonymen qatar, jeke tulǵa-ınvestorlardyń aksııalar naryǵynda belsendilik baıqalady. Qazaqstan qor bırjasynda 22 emıtenttiń 23 baǵaly qaǵazy lıstıngileý rásiminen ótti. Sol sııaqty, «Aqtóbe metall qurylymdar zavody» aksıonerlik qoǵamy jaı aksııalary Qazaqstan qor bırjasynda 2016 jyldyń shilde aıynda ótetin IPO aıasynda ınvestorlarǵa usynylmaq. Qazaqstandyq qor bırjasynyń jumysyn qysqa qorytyndylaǵanda, bırjalyq saýda-sattyq kólemi 2016 jyldyń alty aıynda 49,2 trln. teńgeni qurady, ol ótken jyldyń sáıkes kezeńimen salystyrǵanda (47,7 trln teńge) 1,5 trln. teńgege nemese 3,1 paıyzǵa artqan. Aksııalar naryǵyndaǵy saýda-sattyq kólemi – 80,4 mlrd teńge, ótken jyldyń sáıkes kezeńimen salystyrǵanda ósim 64,4 paıyzǵa nemese 31,5 mlrd. teńgege artqan, osylaısha ınvestorlardyń teńgelik aktıvterge suranysy artyp otyrǵandyǵy baıqalady. Kerisinshe korporatıvtik oblıgasııalar naryǵy eseptik kezeńde saýda-sattyq kólemi 2015 jyldyń birinshi jartyjyldyǵymen salystyrǵanda aıtarlyqtaı tómendep, 191,8 mlrd. teńgeni qurady. Onyń basty sebebi – Ulttyq banktiń bazalyq mólsherlemesiniń jańa deńgeıine sáıkes teńgelik qordyń birden qymbattaýyna baılanysty. Memlekettik baǵaly qaǵazdar (MBQ) naryǵynda saýda-sattyq kólemi 2015 jyldyń birinshi jartyjyldyǵymen salystyrǵanda, 334 mlrd. teńgeni qurap, 43,4 mlrd. teńgege nemese 14,9  paıyzǵa artty. Sheteldik valıýtalar naryǵyna kelsek,  osy jartyjyldaqta saýda-sattyq jıyntyq kólemi 19,3 trln. teńge, ótken jyldyń sáıkes kezeńimen salystyrǵanda 46,8 paıyz tómendedi. Repo operasııalarynyń naryǵynda saýda-sattyq kólemi ótken jyldyń sáıkes kezeńimen salystyrǵanda 2,8 ese artyp, 29,3 trln. teńgeni qurady. Teńgeniń dollarǵa qatysty nyǵaıýy jaǵdaıynda repo operasııalaryn qatysýshylarǵa dollarlyq svop operasııalarymen almastyrdy. Aınash ESALI