Qazaq ánin quıqyljytty

Ashyq aspan aıasynda tiri daýysta án salyp álemge áıgilengen reseılik «Týreskıı hor» mýzykalyq toby Astana kúninde óner kórsetip, tyńdarmandarǵa ǵajaıyp kúı syılady. «Báı­terek» monýmentiniń aldyndaǵy sahnada án salǵan ónerli top bul joly qazaq tilinde úsh án oryndap, kóńilderdi marqaıtty. Onyń aldynda BAQ ókilderine resmı baspasóz máslıhatyn ót­kizgen mýzykalyq top qala tur­ǵyndary men qonaqtaryn qut­tyqtaý úshin Astanaǵa arnaıy kel­gendigin aıtty. «Saparlap barǵan eldiń tilinde tiri daýyspen án shyrqaýymyz búgingi tańda basty ereksheligimizge aınaldy. Bul bizdiń dám-tuz tatqan elge degen qurmetimizden týyndaǵan ıdeıa edi. Endi, mine, Astanaǵa da arnaıy kelip otyrmyz. Qorjynymyzda úsh án – «Aýylym» men «Kózimniń qarasy» jáne Batyrdyń (Shúkenov) «Djýlııasy» bar. Bulardy tańdaý sebebimiz – ándi oryndaý jeńildigimen jáne el ishine keń taralǵandyǵymen baılanysty», deıdi top jetekshisi Mıhaıl Týreskıı. Tiri daýysta án salatyn óner­­pazǵa tyńdarmandardyń da qo­shemet-qurmeti erekshe bolatyny aqıqat qoı. Sondyqtan shy­ǵar, bultty kúnniń qabaǵyna qa­ramaı «Báıterektiń» mańyna jınalǵan jurttyń qarasy qa­lyń boldy. Oǵan qosa, on adam­nan quralǵan mýzykalyq top­tyń shyrqaǵandary úsh qana án­men shektelmedi. Kóp­shilikke ke­ńinen tanylǵan kınodaǵy án­der men  halyq ánderin oryndap, tyń­darmandardyń qulaq qury­shyn qandyrdy. Tipti, karao­ke arqyly kóptegen ándi el-jurt ártistermen qosyla aıtyp, tún­gi As­tananyń aspanyn ánmen áldıledi. Osyndaı keshti ótken kúnniń esteliktermen bólise otyryp júrgizgen Mıhaıl Borısovıch ha­lyqpen qosyla án shyrqaý ıdeıasyn ózine osydan eki jyl buryn Elbasymyz Nursultan Nazarbaev usynǵandyǵyn atap ótti. «Merekelik án» stılindegi án aıtýdy Prezıdent myrza bu­rynyraqta eskertken bolatyn. «Sen halyqpen birge án oryn­daýǵa kereksiń» degeni áli esimde. Endi, mine, búgin biz osylaısha kó­ńilderge qýanysh syılap ke­lemiz» dedi M.Týreskıı. О́nerli ujymnyń taǵy bir múshesi Pavel Berkýt bolsa, qazaq tilinde án shyrqaý qıyn emestigin alǵa tartady. «Bizdiń repertýarymyzdaǵy «Kózimniń qarasy» áni Qazaqstanda ǵana emes, barǵan jerimizde zor yqylaspen qabyldanady. Máselen, Reseı men Fransııada, tipti, AQSh-tyń ózinde bul ánimizdi qosyla oryndaǵan tyńdarmandarymyz az emes. Bastysy, júregiń taza, nıetiń túzý bolsa, kez kelgen tilde án shyr­qaý ońaı» deıdi ol. Nurlybek DOSYBAI, «Egemen Qazaqstan»