«Eýro-2016». Ekeýdiń fınaly: Ronaldý – Grızmann jekpe-jegi

Reseıdiń «Sport-Ekspress» gazeti búgingi nómirin «Fınal dlıa dvoıh: Ronaldý protıv Grızmanna» degen anshlagpen shyǵardy. Basylymnyń baıandaýynsha, komandalar kimniń chempıon bolatynyn anyqtap qana qoıa salmaıdy, sonymen birge, olardyń lıderleri – Krıshtıaný Ronaldý men Antýan Grızmannyń qaısysy kúshti, qaısysynyń jyldyń qorytyndysy boıynsha «Altyn dop» júldesin alýǵa laıyqty ekenderin sheship alady... Portýgaldyń jasy da úlkendeý, tájirıbesi de kópteý, sondaı-aq salmaǵy da aýyrlaý. Ol áli ótken shaqqa ketken joq, naǵyz osy shaǵynda júr. Buǵan qaraǵanda, Grızmannyń jaqyn aradaǵy keleshegi jarqyn bola túsetin sııaqty. «Jeksenbi kúni ýaqyttar toǵysqan kezde, sol jarq etetin sátter de kózge kórinedi», dep jazady gazet budan ári. «Match TV» telearnasynyń kommentatory Konstantın Genıch «Sovetskıı sport» gazetine bergen suhbatynda: «Matchtan eshqandaı jarqyl kútip otyrǵanym joq. Jalpy, fınaldyq oıyndardyń olaı bolýy óte sırek kezdesedi. Men osy oraıda biz bul kúni qosymsha ýaqytty da, matchtan keıingi penaltıler senııasyn da kórip qalatyn shyǵarmyz dep oılaımyn. Túbinde bul kezdesýdiń taǵdyryn bir dop sheship ketetin bolady... Meniń yqylasym Fransııa jaǵynda. Birinshiden, alań ıeleriniń týrnırdi utqanyn qalaımyn, ekinshiden, meni Portýgalııa quramasynyń fýtbolynan góri osylardyń fýtboly kóbirek qyzyqtyrady», dedi. Damır QOJAMQUL