Almatyda jańa baǵyttaǵy joldar ashyldy

Almatynyń búgingi nómiri birinshi, eń kókeıtesti máselesi – kólik keptelisi. Qurylysy 2011 jyly bastalyp qazir paıdalaný ústindegi Almatynyń kúnshyǵys aınalma jolynyń (7,8 shaqyrym) bir tarmaǵy halyqaralyq áýejaıǵa baryp tireledi. Qala ishindegi kúre joldyń biri – Tóle bıdiń sol aınalma jolǵa (Ál-Farabı dańǵylyna) qosylýyna 110-aq metr jer qalǵan. Qala halqy kópten kútken eki kóshe qosylyp, jańa baǵyttaǵy kóliktik jol aıryǵy ashyldy. Qala turǵyndary shyn qýanyshyn jasyra almady. Sarapshylardyń aıtýynsha, osy jol qıylysy arqyly bir táýlikte 60 myń avtokólik júrip ótedi ári aýmaqtaǵy jol keptelisi belgili bir mólsherde azaıady. «Elbasynyń sarabdal saıasatynyń arqasynda elimizdiń bolashaǵy úshin qanshama ınfroqurylymdyq jobalar júzege asyp, joldar salynyp, jańadan jumys oryndary ashylyp keledi. Almatynyń kóliktik-logıstıkalyq múmkindigin keńeıtý maqsatyndaǵy búgingi shara sondaı úlken istiń bir ǵana kishkentaı kórinisi», – dedi qala ákimi Baýyrjan Baıbek. Atalǵan jol aıryǵy rasynda da qalanyń burynǵy «Saıahat» avtobeketi aýmaǵynan bastalatyn – Raıymbek, Súıinbaı, Fýrmanov, Pýshkın, Jangeldın kóshelerindegi keptelisti tórtten bir esege azaıtady eken. Qalanyń soltústik baǵyttaǵy kólik leginiń keptelissiz júrýin qamtamasyz etetin Rysqulov pen Saıyn kóshelerindegi jol aıryǵy taıaý arada bitýge ázir. Bókeıhanov kóshesindegi sheńberli kópir aldaǵy 2017 jyly paıdalanýǵa beriledi. Talǵat SÚIINBAI