Azıada alamany aıbynymyzdy asyryp, abyroıymyzdy asqaqtatty

Alǵa, Azıada! Jasa, Qazaqstan! Jeksenbi kúni Almatydaǵy Balýan Sholaq atyndaǵy Sport saraıynda 7-shi Qysqy Azııa oıyndary saltanatpen jabyldy.

Baıtaq dalamyzǵa, aýyl men qalamyzǵa, barsha jamaǵat hal­qymyzǵa súıinshilep «aqsarbas!» aıtar kún búgin. Qazaq eli osy­dan bes jyl buryn óz moınyna mártebeli mindet etip alǵan taǵy bir úlken synnan abyroımen ótti. Jeti kún boıy Astana men Almatydaǵy alaman dodasynyń dúbirine álem jurtshylyǵy qu­laq túrgen VII Qysqy Azııa oı­yndary óziniń máresine jetti. Jaı máre emes, elimizdiń aıdyny men aıbynyn asyrǵan, sáni men saltanatyn asqaqtatqan, dúıim dú­nıege jumylǵan judyryqtaı yn­ty­maq-birligi men kúsh-qýatyn ta­nytqan mereıli máre der edik biz ony. Tolaıym tabystarmen túıin­delgen Azıadanyń jabylý salta­natyna Qazaqstan Prezıdenti Nur­sultan Nazarbaevtyń zaıyby Sara Alpysqyzymen birge kelip qaty­sýy, bizdiń elimizde osynaý asa aýqymdy álemdik jarysty ótki­zý­ge qanshalyqty zor mán-mańyz berilgendigin taǵy bir aıǵaqtaǵandaı. Tákappar dúnıe qazaqty ta­nydy, Qazaqstandy moıyndady desek, álbette, munyń eń birinshi jarqyn kórinisi elimizdiń Eýropa tóriniń tóbe bıi retinde bir jyl boıy bılik aıtýy bolǵany anyq. Sol mártebeli tóraǵalyqtyń al­tyn tájindeı Astana Sammıti el bedelin odan ári sharyqtatty, kóńi­limizdi tý bıikke qalyqtatty, memlekettik tuǵyry­myz­dyń beriktigi men turaqtyly­ǵyna dú­nıe­júzilik qoǵamdastyqtyń kózin kámil jetkize tústi, salıqaly hám sarabdal saıası ustanymy­myz­dyń dáıektiligi men máıektiligine halyqaralyq saıasat serkeleriniń senimin shegeleı tústi. Jamalymyz jaınaǵan sol Sammıtten keıin týra eki aı ót­kende, mine, Qazaqstan jul­dyzy álem kóginen, shyrqaý bıikten taǵy da jarqyrap kórindi. «Toı toıǵa ulassyn» dep qazaq atamyz aıtqan­daı, Astana Sammıti­niń qo­naq­jaı qazaq jerinde tuńǵysh ret jalaý jelbiretken Azıadaǵa jal­ǵa­sýy já­ne sabaqty ıne sátimen kelip, tamasha ótkizilýi bir jaǵynan jaqsy yrym­ǵa balansa, ekinshiden, munyń ózi elimizdiń qazirgi shaqta qandaı da bolmasyn jahandyq aý­qymdaǵy al­qaly jıyndy alqyn­baı, joǵary deńgeıde atqaryp shyǵý­ǵa qabilet-qarymy da, qýat-qu­direti de, zııaly­lyq óresi de molynan jetetinin dúıim dúnıege dáleldep, aıqyn kórsetip berdi. Qazaqstannyń qos qanatyndaı Astana men Almatyda qaptalda­syp qatarlasa ótken Azııa oıyn­daryn kórgen de armanda, kórmegen de armanda. Osy jarystar kezinde sáýletti jańa elordamyz táýelsiz jas memleketimizdiń jasampazdyq aıbynyn beınelese, qoınaý-qol­ty­ǵy men baýraılarynda sporttyń segiz túrinen saıys-básekeler ót­ken asqar abyzymyzdaı Alataý qa­zaq­tyń taýsylmas qazynadaı yrys-berekesin, qudaı bergen dar­han minezin, danalyq qasıetin bildirgen­deı-di. Iá, halqymyz shat­tandy, jas­tarymyzdyń keýdesin maqta­nysh kernedi. Sportshylarymyz na­­mysty qoldan bermeı jar­qyl­dap atoı saldy. Jarystarda kók baıraǵymyz qaıta-qaıta jelbiredi, saıypqyran órenderimiz jeńis tu­ǵyrynda oń qolymen keýdelerin basyp, ánuranymyz jıi-jıi shyr­qaldy. Keýdemiz bıik, mereıimiz ústem boldy. Osynaý sport ala­many barshamyzdy eldik rýhpen tutastyra biriktirgendeı ǵajaıyp áserge bóledi. Ár ýaqyt dánekershi, dostastyrýshy, aq nıetke bastaý­shy, sulýlyq pen tazalyqty qas­ter­leýshi, izgilikti kókseýshi sport­tyń olımpııalyq rýhynyń maqsat-muraty da osy emes pe. Endeshe, Azıadany óz tórinde tótesinen soq­qan qarjy qıyndyǵyna, jahan­dyq daǵdarysqa qaramastan táýe­kel etip qabyldaýǵa erligi jetken Qazaq eliniń de, osy jolǵa eren eńbek si­ńirip, sheshýshi sózin aıtqan Elba­sy­myzdyń da áýel basta alǵa qoı­ǵan uly maqsattarynyń biri, tipten, biregeıi oryndaldy dep bileıik. Azıada barlyq turǵydan oı­daǵy­daı atqaryldy deı alamyz. Qanshama elden kelgen mártebeli meımandar, jarysqa qatysýshy­lar, sportshylar men tehnıkalyq delegattar, týrıster Oıyn­dar­dyń uıymdastyrylýyna, ózderi­niń ornalastyrylýyna, qonaq úı­lerdiń joǵary mádenıetti qyz­me­tine, medısınalyq turǵydaǵy jáne qaýipsizdik qyzmetine dán rıza. «Syrt kóz – synshy» desek te, badyraıtyp min taǵýshy ta­byla qoımady. Tipti, Almaty qa­la­synyń ákimdigi jarystar óte­tin árbir keshenge bir-bir medı­sı­nalyq jedel járdem tikushaǵyn bekitip qoıýyn osyndaıdaǵy eldigimizdi tanytar ulaǵatpen ushtas­ty­rar edik. Al endi «Mádenı Azıada» aıshyqtary men áýenderi kútkendegiden áldeqaıda asyp tús­ti. Qazaqstandy janyna tartý­shy, Qazaqstan ǵajabyna súıinýshi sheteldikter bul kúnderde júzdep emes, myńdap sanalǵany da anyq. Azıada musylman elinde, túr­ki tildes memlekette birinshi ret ótti. Dúnıeni jalt qaratqan, odan soń áliptiń artyn baqqyzǵan ja­ńa­lyqtyń biri osy boldy. Medeý men Shymbulaqta, Soldatsaı men Taba­ǵanda, basqa da jarys arena­laryn­da «Alǵa, Qazaqstan!» dep atoıla­ǵan shat daýystardan, jas daýys­tardan ózimiz de tebirenip ǵajap kúı keshkendeımiz. Ottan ystyq otan­shyldyq sezim-aı de­seń­shi! Qazaq eli Azııa oıyndaryn áserli, tar­tym­dy uıymdas­tyrý­da­ǵy jańashyl órnekpen tańǵal­dyryp otyrdy. Aıtalyq, Azıada alaýynyń eldiń úlken qalalaryn túgel aralap ótýi qandaı ǵanıbet boldy. Ol qazaq­stan­dyq uıym­das­tyrý komıtetiniń osynaý aý­qym­dy sharany túrlen­dirýge qos­qan úlesi dep aıta ala­myz. Qazaq­stan osy ǵalamat iri alaman ja­rysty ótkizip qana qoıǵan joq, ózi sonda top jardy, sańlaq sport­shylarymyz kún saıyn al­tyn-kúmis medaldardy saýdyra­typ jaýdyrdy. Muny tipti Halyq­ara­lyq Olımpıada komıtetiniń tór­aǵasy Jak Roggeniń: «Árbir Azıada kúninde biz sizderden súıinshi suraý­men boldyq», degen aq peıildi rııa­syz sózderinen de ańǵar­ǵan­daımyz. Súıinshiletken kimder de­se­ńiz, olar bizdiń Azıada­nyń tórt dúrkin jeńimpazy Alekseı Poltoranın, úsh dúrkin je­ńim­­pazdary Olga Novıkova men Mıhaıl Sorokın, má­ner­lep syr­ǵa­­naý­shy jampozymyz Denıs Ten, frıstaılshy Dmıtrıı Reıherd, qajymas qaısar bıat­lon­shylar Aleksandr Chervıakov, Dıas Keneshev, Elena Hrýstaleva, altyn­nan alqa taqqan dopty jáne shaı­baly hokkeı sheberlerimiz jáne bas­qa da búkil el-jurtymyzdy shattan­dyrǵan sańlaqtarymyz dep bar daýyspen jar salyp aıta alamyz. Eń basty súıinish sol, bizdiń elimizdiń quramasy 32 altyn medaldy jeńip alyp, altyn oljalaýdan rekord jasady. 1986 jy­ly Sapporo Azıadasynda 29 al­tyn alǵan burynǵy rekord Japo­nııaǵa tıesili eken. Bul joly Qa­zaqstan jańaǵy rekordty  al­tyn júldelerge 21 kúmis, 17 qola qo­syp, barlyǵy 70 medaldy qor­jy­­nyna salyp, jalpyko­m­anda­lyq esepte daýsyz jeńim­paz atan­dy. Altyn medaldy Japonııa men Ońtústik Koreıa 13-13-ten teń bóliskenimen, japondyqtardyń kú­misi áldeqaıda kóbirek shyǵyp, jeńis tuǵyrynyń ekinshi satysyna solar kóterildi. Bul Azıadanyń bir tosyn jańalyǵy sol, Qytaı sportshylarynyń tórtinshi shepke túsip qalǵandyǵy boldy. Sport degenińiz de árqashan aq sóıleıtin Aıazbı ǵoı, abyroı-ataqqa, laýa­zym-bedelge qaramaıdy. Kóbine-kóp baq emes, bap shabady. Bul araǵa qazaqtyń osy támsili dóp keletindeı. Máseleniń taǵy bir ja­ǵy­nan alǵanda, alamanǵa qatysýshy 27 eldiń ishinen Mońǵolııanyń besinshi, kórshiles aǵaıynymyz Qyr­ǵyz­stannyń jetinshi satydan kó­rinýi jaman kórsetkish te emes sııaqty. «Eń bastysy – qatysý» degen aqjoltaı qaǵıdat ustanǵan taǵy bir eldiń osy Azıadaǵa bir ǵana sportshymen qatysqanyna da bul qalaı deýge qaqymyz joq. «Toıdyń bolǵanynan bolady­sy qyzyq» degendeı, Azıada ǵa­jap­tary támamdalyp, onymen Balýan Sholaq atyndaǵy Sport saraıynda qımaı qoshtasý sátteri de kelip jetti. Elbasy Nursultan Nazarbaev qatysyp otyrǵan VII Qysqy Azııa oıyndary jabylýy­n­yń sal­tanat­ty rásimi «Azııa sım­fo­nııa­sy» dep atalǵan teatr­landyrylǵan qoıy­lym­men bas­tal­dy. Osynaý dýman avtorlar­dyń oı-qııalyna saı Azııa ha­lyqtary ókilderiniń qatysýyn­daǵy móltek kórinisteri­men ór­nektelgen. Azııa aqqýyndaı ataq­ty ánshimiz Maıra Muhamed­qyzy Almas Serkebaevtyń sazy­men sal­tanatty da asqaq, shabytty da sulý ándi Azııa sımfonııasynyń únine úılestire shyrqady. Odan soń sahnada qazaq ańyzdary aı­shyqtaldy. Jas balanyń eseıip-erjetýi, ómir men órkenıetke kirigýi astarly maǵynamen ádemi tus­paldanyp beınelengen. Shyń týra­ly, Jer-Ana týraly, Jel týraly, Ot týraly, Qar týraly ańyzdar tolassyz tirshilikti ań­dat­qandaı. Osynyń bári bı tilimen shalqıdy. О́rkenıet­ter­diń ún qatysýy,  Eýropa men Azııa­nyń ózara baılanysy, óner men sport­tyń úndestigi kó­rer­mender sanasyn jaýlap alǵan­daı. KSRO halyq ártisi Álibek Dinishev Qazaq­stannyń ánuranyn zor tebirenispen oryndaǵan kezde oǵan qosyla shyr­qaǵan Elbasymyzdy, zaldaǵy kó­rer­men­derdi kórgende ishteı tolqyǵa­nymyzdy biz de jasyra almaımyz. Dýmannyń sońynda Azıadaǵa qatysýshy elderdiń sportshy­lary óz týlaryn kóterip, ortaǵa shyǵýy tamasha sátterdiń biri bol­dy. Mu­nyń ózi de bir jaǵadan bas, bir jeń­nen qol shyǵarǵan Azııa birligin, ortaq áýenge quıyl­ǵan Azııa sım­fonııasyn nyshandap turǵan­daı. Kópshilik kóńilinen shyqqan osynaý teatrlandyrylǵan qoıy­lymǵa ká­sip­qoı ártister, eriktiler – barly­ǵy 700-den astam adam qatysty. Merekelik qoıylymnan keıin saltanatty rásim qonaqtarynyń aldynda Almaty qalasynyń áki­mi Ahmetjan Esimov sóz sóı­ledi. Ol Azıadanyń joǵary dáre­jede ótýi­ne kómegin tıgizgen oń­tústik astana turǵyndaryna, Oıyn­dar­dyń uıym­das­tyrýshy­lary men demeýshilerine, sondaı-aq sport­shylar men meı­mandardy yqy­las­ty qamqorlyq­taryna bólep, ulan-ǵaıyr jumys atqarǵan eriktilerge úlken alǵy­syn bildirdi. Ákim odan ári: «Ál­bette, eń úl­ken alǵysty men álem­dik ekono­mı­kalyq daǵdarysqa qa­ramastan Azıadany ótkizý jóninde batyl sheshim qabyldaǵan adamǵa bildirgim keledi. Ol adam bizdiń Prezıdentimiz Nursultan Ábish­uly Nazarbaev», degen kezde  jurt dúrkirete qol soǵyp jiberdi. Budan soń Azııa Olımpııalyq keńesiniń vıse-prezıdenti Tımotı Fok  Aq Azıadany tamasha uıym­dastyrǵany úshin Qazaq­stan­nyń bas­shylyǵyna rahmetin aıtty. Azııa oıyndarynyń úlken tabys­pen ót­kendigin atap kór­setti. Azıada umy­tyl­maıtyn mereke bol­ǵan­dyǵyna, Qazaqstan­da­ǵy qonaq­jaı­lyq qatty unaǵan­dyǵyna toq­taldy. Munda ótkiz­gen ýaqyttary barlyq qatysý­shy­lardyń jadyn­da qalady. Rahmet, Almaty, rahmet, Astana, rahmet saǵan Qazaq­stan, deı kele, Azııa Olımpııalyq keńesiniń vıse-prezıdenti sóz kezegin Elbasy Nursultan Nazar­baev­qa berdi (Qazaqstan Prezıdenti Nursul­tan Nazarbaevtyń sózi gazette jeke berilip otyr). Saltanatty rásimniń sońynda Almaty qalasynyń ákimi Qysqy Azııa oıyndarynyń jalaýyn VIII Qysqy Azııa oıyndary ótetin Sapporo qalasy uıymdastyrý komı­teti­niń ókilderine tabys etti. Ol ja­laý­dy Saraı arenasyna dopty hokkeıden Qazaqstan quramasy­nyń sapyn­da Azıada chempıony atanǵan Raýan Esalıev alyp kirdi. Elbasy­nyń VII Qys­qy Azııa oıyn­daryn jabyq dep jarııalaýyna oraı Azıada alaýy sal­tanatty túr­de óshirildi. Q­a­­zaqstan­nyń estra­da sheberleri qo­rytyndy án kompo­zısııasyn oryn­dady. Ha­lyq­ara­lyq shańǵy­men tu­ǵyr­dan sekirý kesheninde as­panda myń san otshashýlar jar­qyldady. Saltanatty ja­bylý rási­min tikeleı efırden 300 myńnan astam adam tamasha­lady. Osylaısha kóp qýa­nysh syı­laǵan, elimizdi úlken asýlardan asyryp, taǵy bir mereı-már­tebege jetkizgen, álem­degi aıtý­ly sport­tyq derjavaǵa aınal­dyr­ǵan Azııa oıyn­dary ádemi túıindeldi. Biraq biz Azıadamen qosh­tas­paımyz. Azıa­da alamanyn álem jurtshy­lyǵymen birge Sapporo qa­la­synda kútip alýǵa jaz­syn deımiz. Alǵa, Azıada! Jasa, Qazaqstan! Qorǵanbek AMANJOL.

Shańǵymen sporttyq baǵdarlaý

Topjarǵandar Sporttyq baǵdarlaý olımpııa­lyq oıyndar baǵdarlamasyna kir­­megenimen, túbinde shańǵy sportyn­­­daǵy qyzyqty jarys­tardyń sana­tyna enetindigi sózsiz. Ádette, Jaz­ǵy Azııa oıyndarynda jarys ótkizýdi moınyna alǵan memleket jan-jaqqa saýyn aıtyp, ózderin­de oınalatyn oıyndardyń tárti­bin jiberip, Azıadaǵa kirgizip alady. Osylaısha, altyndardy kóbeıtip, upaılaryn túgendeıdi. Máselen, qa­zaqtyń balalary bu­ryn láńgi teýip oınaıtyn. Ala­qandaı quı­ma qorǵasynǵa qoıdyń bir ja­py­raq terisin symmen tesip ótkizip, jerge túsirmeı qaqpaqyl­dap oınaıdy. Qazir Azııa oıyndarynda osy láńgige uqsaıtyn sotfol degen oıyn bar. Aıyrmashylyǵy, eki-ekiden tórt adam ortadaǵy kerilgen tordyń eki jaǵynda turyp, aıaqpen dop oınaıdy. О́z elinde Azııa oıyn­daryn ótkizip jatqan Qazaq­stan usaqtyqqa baryp, ondaı oıyn­dardy tyqqyshtaǵan joq. Turaqty álem chempıonaty ótip turatyn, halyqaralyq ma­ńyz­ǵa ıe sporttyq baǵdarlaý já­ne bendı (dopty hokkeı) sportyn qosty. Bir qyzyǵy da, bar jaqsylyǵy da sol, sport­tyq baǵdarlaý Qazaq­stan qorjy­ny­na erler men áıel­derdi qosqan­da 8 altyn saldy. Máselen, sprınttik, orta jáne uzaq qashyqtyq­taǵy ja­rystarda Mıhaıl Sorokın men Olga Novıkova Azıa­danyń úsh dúrkin jeńimpazy atan­dy. 5 aqpan kúni sporttyq baǵ­darlaý­dan esta­fe­­ta­lyq jarys ótti. Qu­ramynda Alek­sandr Babenko, Aslan Toq­paev jáne Mıhaıl Sorokın bar sport­shylarymyz 56 mınót 15 sekónt ýaqyt kór­setip, márege birinshi keldi. Al­ǵash­qy bo­lyp shań­ǵyǵa mingen Aleksandr Babenko al­ǵashqy ke­zeńdi 19 mı­nót 10 sekónt­te júrip ótti. Oǵan deıin Iran qurama­sy­nyń qolyn me­dalǵa jetkizgen Kangarlý Bıjan odan 2 mınót 9 sekóntke qalyp keldi. Al, úshinshi bolyp jarys jolyna shyq­qan Mıhaıl Sorokın qarsy­las­ta­ry­nan qozy kósh jerge uza­dy. Ekinshi bolyp kelgen ıran­dyq Saed Sattar Seıd 6 mınót 20 sekónt­ten keıin ǵana márege jetti. Úshinshi bolyp jarysty aıaq­taǵan mońǵol qura­ma­sy jeńimpaz­dar­dan 30 mınót 58 sekóntke qalyp keldi. Qyzdar da jarady. Evgenııa Kýzmına, Elmıra Moldasheva já­ne Olga Novıkova 59 mınót 43 se­kóntte márege jetti. Ekinshi oryn alǵan ońtústikkoreıalyq úsh qurby 18 mınót 17 sekóntke qa­lyp kelse, qola medalǵa ıe bol­ǵan mońǵol úshtigi qazaq­stan­dyq­tardan 33 mınót 20 sekóntke utyldy. Osylaısha, Qazaqstan qurama­sy sporttyq baǵdarlaýdyń 4 túri bo­ıyn­sha bar altyndy eldiń báı­ge qor­­jynyna saýdyratyp salyp berdi. Sońǵy kezderi sporttyń bul túriniń elimizde jaqsy damyp kele jat­qanyna jarys alańyna ba­ryp, teledıdar arqyly otandas­tary­­myzǵa bolysqan myńdaǵan jan­kúıerler kýá boldy. Baqtııar TAIJAN.

Bıatlon

Ult namysy múlt ketýdi keshirmeıdi Erler arasyndaǵy bıatlon estafetasy boıynsha 4h7,5 sha­qy­rymdyq básekede Qazaqstan koman­dasy jeńiske jetti. Shań­ǵy­shylar Aleksandr Chervıakov, Nıkolaı Braıchenko, Iаn Savıskıı jáne Dıas Keńesov mejeli qashyqtyqty 1 saǵat 21 mınót 3,5 sekóntte syrǵa­nap ótti. Ekinshi oryndy Japonııa eli­niń komandasy ıelendi. Iаǵnı, bizdiń bıatlon berenderi olardan 2 mınót 18,5 sekónt shapshańdyq ta­nytty. Al jeńimpaz qazaq bıatlon­shy­­lary­nan 5 mınót 8,6 sekónt qalyp kelgen Qytaı komandasy úshinshi oryndy qanaǵat tutty. Básekeniń mán-jaıyna qaraı oıyssaq, qazaqstandyq bıatlon­shy­lar jarystyń alǵashqy ke­zeńinde-aq kósh bastady. Ekinshi kezeńde jarys jolyna shyqqan Aqmola oblysynyń taǵy bir túlegi Nıkolaı Braıchenko qa­zaqstandyq bıatlonshylardyń je­ńi­sin jaqyndata tústi. О́ıtkeni, ol ja­typ atý sátinde qosymsha úsh oqtyń bireýine ǵana senim artty. Sonyń arqasynda estafetany odan ári jal­ǵastyrý kezinde bizdiń bıat­lonshy­lardyń japondardan ústem­digi 1 mınót 9,4 sekóntke ulǵaıa tústi. «Er kezegi úshke deıin». Biraq úshinshi kezeńdegi Iаn Savıs­kıı­diń nysana kózdeýi jankúıer­ler­diń kóńi­lin biraz qobaljytty. О́ıt­keni, ol «qoramsaǵyndaǵy» qo­symsha «je­belerge» kóp qol sap, birinshi atý shebinde – bir, ekinshi atý shebinde  úsh oqty ar­tyq jumsady. Bul, árıne, bıat­lonshy úshin ýaqyttan utylý men mergendik básekesinen kem soǵý bolyp baǵalanatyny anyq. Biraq, abyroı bolǵanda, sheshýshi kezeń tusynda ózderin ókshe­legen japon qarsylastarynan qa­zaq­stan­dyqtardyń basymdyǵy 1 mı­nót 48 sekónt bolyp, jan­kú­ıerler qaýpi seıile tústi. «Iаpyrmaılatqan» Iаn Savıskııden keıin estafeta jolyna Dıas Keńesov shyqty. Shańǵy sportynda, jalpy, qazaq ul-qyzdary az nemese múlde joq. Biraq az bolsa da máz qylatyn sportshy bolǵany da jaq­sy eken. Etpettep jatyp nysana kózdeýde qosymsha eki oq shyǵyn­daǵan Dıas, namysqa tyrysty ma, áıteýir, túregep turyp atýda esh­qandaı «múltim barǵa» jol bergen joq. Sóıtip, dúldúl Dıas jan­kúıerler qolyna ustatqan el baıraǵyn jelbirete ustap, máre syzyǵynan birinshi bolyp ótken. О́ıtkeni, ult namysy múlt ketýdi eshqashan keshirmeıdi. Kósemáli SÁTTIBAIULY.

Shaıbaly hokkeı

Jigitter jarady Azııa oıyndarynyń sońǵy kúni Astanada hokkeıden Qazaqstan men Japonııa komandalarynyń arasynda ótken oıynda ulttyq qurama Azıada chempıony atandy. Buǵan deıin 2007 jyly Qy­taıdyń Chanchýn qalasynda ótken Qysqy oıyndarda Qazaqstannyń erler quramasy naq osy Kún­shy­ǵys eliniń hokkeıshilerinen fı­nal­dyq kezdesýde qolda turǵan altyn júl­deden aıyrylyp, kú­mis medaldy ǵana qanaǵat tutýǵa májbúr bol­ǵan edi. Sondyqtan bolar, bul oıynda ulttyq qurama japon jigitterinen Qytaıda ketken eseni qaıtaryp, óz alańynda jeńiske jetýge bar kúsh-jigerin saldy dese bolady. Bul matchtyń birinshi kezeńi 0:0 esebimen aıaqtaldy. Ekinshi kezeń­niń aldyndaǵy 15 mınóttik úziliste bas bapker V.Homýtov jigitterin jigerlendirgen bolýy kerek, ekinshi 20 mınóttik oıynda olar Japo­nııanyń qaqpasyna eki shaıba soǵyp úlgerdi. Shaıbanyń avtor­lary bolǵan Evgenıı Blohın men Ilıa Solarevtiń budan keıin de esepti eseleýge birneshe múmkindik­teri bol­dy. Degenmen, japondardyń qaqpa­syna úshinshi shaıbany soǵý Maksım Semenovtyń mańdaıyna ja­zylyp­ty. Ol kezdesýdiń úshinshi ke­zeńinde áriptesteriniń ádemi shyǵar­ǵan pa­syn paıdalanyp, qamaly bıik bolyp turǵan qarsylastarynyń qaq­pasyn dál kózdep, esepti 3:0-ge jetkizdi. Osy­dan keıin japondar tarazy ba­syn teńestirýge tyrys­qanymen, ola­ry­nan eshteńe shypady. Olar tek Qa­zaqstan qaqpasyna bir shaıba soǵýmen shekteldi. Al bizdiń jaqtan japondardyń qaqpasyna tórtinshi shaıbany Roman Starchenko soǵyp, Azıadadaǵy hokkeı oıyndarynyń núktesin qoıdy. Kezdesý sońynda Japonııa qu­ra­masynyń qaqpashysy Fýkýfýdjı Iýkata úzdik qaqpashy, onyń otandasy Aaron Keller úzdik qorǵaýshy, bizdiń Vadım Krasnoslabodsev úzdik shabýyl­shy atandy. Sóıtip, hokkeıden áıelder komandasynyń jolymen júrgen erler quramasy óz alańynda Azıada chempıony degen mártebeli ataqqa ıe boldy. Al qola júldeni 11:1 esebimen Qytaı quramasyn jeńgen Ońtús­tik Koreıa koman­dasy ıelendi. Dastan KENJALIN, Sýretterdi túsirgen Bersinbek SÁRSENOV.

Shańǵy

Altyn fabrıkasy Soldatsaıdaǵy shańǵy-bıatlon kesheninde elimizdiń sportshylary 18 altyn, 9 kúmis, 6 qola medaldy somdady Atyshýly Medeý, Shymbulaq­tarǵa jalǵasa Azıadanyń alaman dodasynyń tarıhyna altyn árip­termen jazylyp qalar taǵy bir maqtanyshymyz Talǵardyń tap irgesindegi Soldatsaı bolyp tur. Patsha zamanynda stanısa atama­ny Alataýdyń osy bir qalyń jynys qoınaýynda aıý aýlaýǵa shyǵady eken. Saıdy boılaı sol­dattardy kúzetke qoıatyn kórinedi. Sodan bul saıdy jergilikti halyq, Talǵardyń orys-qazaǵy túgel solaı ataıdy. «Soldatskoe ýshele» degennen qazaq­shaǵa qaıta aýdaryp «Soldat shat­qaly» dep sympıta sy­paıyla­ǵanǵa talǵarlyqtaryńyz ezý tar­tady da qoıady. Qalaı desek te, osy Soldatsaı qutymyzǵa aınaldy. Qazaq­stan quramasy qorjynyndaǵy altyn medaldardyń teń jarty­synan astamy naq osyndaǵy shań­ǵy-bıat­lon stadıondarynda ót­ken jarystardan túsirildi. О́t­ken­degi bir maqalamyzda «Sol­dat­saıdaǵy qar fabrıkasy» dep astarlap aı­typ edik. Sóıtsek, Soldatsaıy­myz naǵyz altyn fabrıkasy bo­lyp shyqty. Altyn shyqqan jerdi bizdiń shańǵyshy-bıatlonshy, baǵ­dar­laýshy sportshylarymyz da belden qazyp, altyn-kúmis me­dal­d­ardy alaman báıgede el mereıin asyra tógip-tógip tastady. Qola men kúmisti aıtpaǵannyń ózin­de, munda tabany kúrekteı 8 al­t­yndy shańǵymen baǵdarlaý­shy­lar, batpandaı 5 altyndy shań­ǵyshylar jáne beseýin bıat­lon­shylar ol­ja­lady. Ásirese, tórt altyndy bók­tergen shyǵysqazaqstandyq Alekseı Poltoranın, úsh-úshten altyn alqa taqqan astanalyq Mıhaıl Sorokın men Olga Novıkova, qos altyndy qanjyǵasyna baılaǵan Aleksandr Chervıakov, sondaı-aq Elena Hrýstaleva syndy sańlaq­tarymyz Soldatsaı sııapatyn áste umytpas dep bilemiz. «Kúlsheli bala súımekke jaq­sy» degendeı, Azıadanyń az ǵana kúnderinde Soldatsaıdy jurt sú­ıip qaldy. Soldatsaı sam­ǵaýynyń arqasynda qasıetti Tal­ǵar­dyń da eli men jeriniń aty shyǵyp, álemge tanylyp jatyr. Azıada jarys­tary­na degen talǵarlyqtardyń yqy­­lasy erekshe boldy. Shańǵy-bıatlon sta­dıonyndaǵy dodaly jarystardy kúndelikti 5-6 myńǵa deıin kó­rermen tamashalap, sport­shy­la­ry­myzǵa jan­kúıerlik jaly­ny­­men jiger berip, qoldap otyrdy. Birqansha marapattaý rásiminde jeńimpazdarǵa júldeler­di tap­syrý qurmetin Azıadany ót­kizýge jergilikti jerde ilkimdi úle­sin qosyp, qolǵabysyn aıamaǵan Tal­­ǵar aýda­nynyń ákimi Talǵat О́mir­álıev enshilegenin aıtýymyz kerek. Soldatsaıda 5 aqpan bizdiń shań­­­ǵyshylarymyzdyń erekshe er­lep, ótkende ketken esesin qaı­tarý úshin ári namysqa tyrysqan, ári kúsh-qaırat pen sheberlikterin b­a­rynsha aıshyqtap sátimen kórsete bilgen kúni boldy. Bul joly áýeli áıelder arasyndaǵy 4h5 shaqy­rym­dyq estafetalyq jarys máre­den shyqty. Munda negizgi taıta­las-tartys Qazaqstan men Japonııa komandalary arasynda órbidi. Eki kezeńi klassıkalyq, eki kezeńi erkin mánerde ótken jarys jo­lyn­da bizdiń bapkerler qoldanǵan tásil utymdy bolyp shyqty. Shań­ǵyny ońtaıly maılaý máse­lesi de durys sheshimin tapqan eken. Ári munyń aldynda jos­parly medaldardy joǵaltyp al­ǵa­n­dyqtan, bizdiń quramanyń endi qatelesýge qaqysy da bolmaǵan kórinedi. Alǵashqy úsh kezeń boıy biz­diń qyzdar qarsylastyń myq­tylyǵyn moıyndaı otyryp, japon qyz­da­ryn tym uzatyp al­maýǵa tyrys­ty. Al, sońǵy, tórtin­shi kezeńde es­ta­fe­tany 12 sekónt keshigip alǵan Svetlana Malahova-Shıshkına ózine ar­tyl­ǵan úmitti aqtap, kóp uzamaı japon Kashıvabara­nyń adymyn ashyr­­maı aldyna tústi. Odan soń ara­qashyq­tyqty birtindep uzarta berdi. Svet­lana máreden kókbaı­raqty jelbirete birinshi ótti. Sóıtip, 1 saǵat 1 mınót 45,1 sekónt ýaqyt kórset­ken bizdiń qyzdar jeńistiń joǵary sa­ty­syna kóterildi. Estafetada al­tyn alǵan júırik qyzdarymyz Elena Kolomına, Oksana Iаskaıa, Anastasııa Slonova jáne Svetlana Malahova-Shıshkınalar sóıtip osynaý Azıa­dadaǵy qýanyshymyz­dy eseleı tústi. Kópke deıin altyn medaldan úmitti bolǵan japon shańǵyshy­larynyń ekinshi oryndy qanaǵat etýine týra keldi. Olar qazaq­standyq qyzdardan 53 sekónt qa­lyp qoıdy. Iá, olar Madoka Nasýmı, Masako Ishıda, Iýkı Kobaıashı jáne Mıshıko Kashıvabara. Úshinshi oryn qytaılyq shańǵy­shy qyzdardyń úlesine erkin tıdi. Tústen keıin 4h10 shaqy­rym­dyq komandalyq jarysta jigitterimiz jeńisti joldy odan ári jal­ǵady. Olardyń da negizgi báseke­lesi Japonııa quramasy boldy. Degenmen de Qazaqstan shańǵy­shy­la­ry­nyń basymdyǵy barlyq aına­lym­darda aıqyn bilindi. Sergeı Cherepanov, Alekseı Poltoranın, Nıkolaı Chebotko, Evgenıı Velıchko quramyn­daǵy bizdiń komanda Jetinshi Azıa­danyń 27-shi altyn medalin jeńip aldy. Qazaqstannyń kókbaıraǵy Sol­datsaıda taǵy da máre qıdy. Kúmis jáne qola me­daldardy tıisinshe Japonııa men Ońtústik Koreıa shańǵyshy­lary ıemdendi. Jeńimpazdardyń altyn ýa­qy­ty 1 saǵat 54 mınót 40,9 sekónt bolsa, buǵan deıin úsh altyndy sypyryp ketken japondar bul joly 3 mı­nótten artyq utylyp qaldy. Qu­ramynda Keıshın Iosıda, Masaıa Kımýra, Nabý Narýse syndy álem­dik sańlaq­tary bolǵan komandadan ozý namysqa syn bolsa, jigitterimiz sol synnan abyroımen ótip, Soldatsaı altyn fabrıkasynyń ataǵyn aspandata túsken edi. Qorǵanbek AMANJOL.

Oraıy kelgen oı

Alty alashqa úlgi bolǵan Azıada Adam degen aýyz óziniki bol­ǵan soń aıta beredi eken. Qa­zaq elinde ótken Sammıtke murnyn tyrjıtqandar, endi qazaq úshin Azıadany da artyq kórip, «pysh-pyshtasyp» jatyr. Olarǵa salsa, Qazaq eli baıaǵy «toqal tamdar» dáýirindegi deń­geı­de qala berýi kerek syqyldy. Keshegi meshel eldi búgingi kósheli eldiń qataryna jetkizetin ıgi is-sharalardan bizdiń basshylar múl­de aýlaq bolýy kerek-mys. Azıa­da degendi bir erikkenniń ermegi sııaqty basy artyq jumys sanaıdy. Baıaǵyda dúnıeniń tap­shy kezi ǵoı, bir baqýatty atam­nyń úıindegi «cherno-belyı» teledıdardan hokkeı kóreıin dep barsam, «adam jaýrap óleıin dep otyrǵanda qaıdaǵy kákkeı, aına­la­ıyn-aý!» dep, shala búlinýshi edi jaryqtyq, eliniń el bolǵanyn qalamaıtyn keraýyzdar da týra sol atam sııaqty «Azıada degen nemeneme kerek, qudaı-aý?», deıdi erinderi túrtıip. Qarańyzdarshy, qazaq Azıada­sy­nyń arqasynda elimizde qan­sha­ma qysqy sport keshenderi tur­ǵy­zyldy. Astanalyqtar men alm­aty­lyqtardy aıtpaǵanda, tal­ǵa­rlyq­tar, mysaly, «Taba­ǵan» men «Sol­datsaıdaǵy» qysqy sport keshenderi úshin qudaılaryna kún saıyn alǵys aıtyp otyr. О́ıtkeni qan­shama adamǵa jumys tabyldy. So­syn úlgisi she?!. Buryn boks pen kúresti ǵana tańdaıtyn qazaq balalary, endi «Biz kimnen kembiz?», dep aıaqtaryna shańǵy men konkı baılap, aq qar men kók muzdyń maıtalmandaryna aınal­ma­syna kim kepil?!. Azıadanyń el mártebesi men mereıi úshin taǵy bir úlgisi men úlesi – Astana men Almatyǵa «sary qur­lyq­tan» qanshama sportshy ul-qyz­dar­ keldi! Qanshama bilikti bapkerler jetti! Olar qazaqtardyń qonaq­jaı peıiline ǵana emes, sonymen birge, álemdik talaptarǵa tamasha jaýap beretin sándi sport saraı­laryna da tánti boldy. Qazaq eliniń qysqy sport túrlerinen álem chempıonat­tary men Olımpııa oıyndarynyń altyn mekenine aınalatynyna da ábden senimdi. Astana men Almatyda sport­tyq oqý-jattyǵý jıyndaryn ótkizýge de qazirden bastap qul­shyna tilek bildirip otyr. Keıbir elder, tipti, tapsyrys ta berip qoıypty. Keler jyly Medeýde dopty hokkeıden álem chem­pıo­naty da jalaýyn kótermekshi! Al bul degen el bıýdjetine túsetin qyrýar qarjy ǵoı. Ne kerek, Azıadaǵa qarapaıym qazaqtar men sheteldik qonaqtar­dyń bári rıza da, rıza emes tek qa­na ózimizdiń keıbir «ishten shyqqan shubar jylandar». Qazaq tyrnaq astynan kir izdeıtinderdi «báleqor» deıdi. Túımedeıdi túıedeı etetinderdi «lań», «daýkes» deıdi. Eliniń, aǵaıyn-baýyrlarynyń qýanyshyna ortaqtasyp, jaqsy sózin aıtqysy kelmeıtinderi «mysyqtileý» deıdi. Mine, osylar qarapaıym qazaqtar­dyń sanasyna qaıdaǵy bir «qym­tanǵan» elderdiń kóshbasshylaryn «ultjandy», «eljandy» retinde bıiktetip, úlgi qylmaqqa áýre. Qazaq halqy aqymaq emes, kimniń dos, kimniń qas, neniń jaqsy, neniń jaman ekenin jaqsy bilip otyr. El ishine enip jatqan jaqsylyqty, jańalyqty jaqtyrmaıtyndar, me­niń baıaǵydaǵy atam sııaqty shala saýatty bireý bolsa meıli ǵoı, joq, olar ózderin eshkimnen kem emespiz dep sanaıdy. «Zııalymyz», «saıasatkermiz» deıdi, arasynda «aqynbyz», «jazýshymyz» dep keýde qaǵatyn­dar da júr. Tańnan buryn turatyn, buqaradan buryn oılaıtyn, ǵaja­ıyptardy ǵasyrdan buryn kó­re­tinderimiz osylaı degen soń basqa­larǵa ne joryq!?. Táýelsizdik alǵa­ly bergi jıyrma jylda ne jaqsy, ne jaman, kimniń dos, kimniń qas  ekeni sondaılardyń sanasyna áli jetpegenine tańǵalasyń. Álde, al­ty alash pen túbi bir túrki jurty­nyń arasynan Qazaq eliniń sharyq­tap óskenin, qaryshtap órkendegenin kóńilderi shynymen qalamaı ma?!. «It úredi, kerýen kóshedi». «Qyz muraty ketý, jol muraty jetý». Budan túıetin oı –  ıt­ter­diń mindeti úrý eken de, ke­rýen­niń mindeti eshteńege alańdamastan alǵa qaraı qaryshtap júre berý eken. Al búginde qazaq kerýeniniń baǵyty durys, kóshi kólikti. Endeshe, álem chempıonattary men Olımpıada oıyndarynyń aldyn­daǵy altyndy Azıadamyz aqjol­taı bolsyn, aǵaıyn! Kósemáli SÁTTIBAIULY.

Dopty hokkeı

Qazaqstan-Mońǵolııa 16:2 Jeksenbi. Almatynyń halqy tórt jylda bir ret bolatyn dodanyń búgin sońǵy kúni ekeni esterine endi túskendeı taý jaqqa asyǵypty. Aǵylypty. Taýǵa qa­raı yńyranǵan avtobýstar jurt­ty tasyp úlgere alar emes. – О́tkende bir ret kóreıin dep kelip edim. Keremet eken. Búgin elegizip úıde otyra almadym. Kúnde bitpeıtin sharýa qaıda qashar deısiń dep bárin esten shyǵardym da taýǵa tartyp kettim, – deıdi keıýana aýzy-murnynan shyqqan avtobýsta qasyndaǵy kelinshekke sambyrlap. Ol da qalyspady. – Anaý Raýan degen bala ǵajap oıynshy eken. Qımylyna, qolyn­daǵy taıaqshasyna kóz ilespeıdi. Qazaqtardyń hokkeı oınaǵanyn kóp kórmeıtin edik. Oıpyr-aı, bári ózimizdiń qarakózder... Estip turyp razy bolasyń. Qa­zaq­tyń keıýanalary sportty jaqsy kórse, mynaý Azıadanyń jastarǵa beretini kóp bolǵany ǵoı. О́tkende ǵana qazaqtarǵa 17:0 bolyp utylyp, qaqpa mańyna jolaı almaı ketken mońǵoldar bul joly namysqa mindi. Qorǵanysty kúsheıtip, shabýyl jaıyn oılas­tyr­dy. Judyryq siltesken sát­ter de boldy. Hokkeı de­genińiz, naǵyz erlerdiń oıyny ǵoı. Buny biz shyǵarǵan joqpyz. Osyn­daı naqyl bar. Jankúıer­lerdiń jú­re­gi­nen oıyp oryn alǵan Raýan Esalı bul joly da mońǵol qor­ǵaý­shy­larynyń arasynan bul­tyń-bul­tyń jol taýyp, synaptaı syr­ǵyp júrip, 5 gol soǵyp ketti. Alǵashqy eki oıynda 18 gol soqqany bar. Naǵyz surmergen. Bul joly Vladıslav No­vojılov tórt, Eskendir Nuǵy­manov, Nıkolaı Shabaldın, Petr Grıvanov eki-ekiden dop kirgizdi. Bul oıyndy Elbasymyz da arnaıy kelip tamashalady. Baqtııar TAIJAN, Almaty.

Konkı

Jańa rekordtar Astanada alaýy tutanǵan Aq Azıadadaǵy ótken jarystar legi de óz máresine jetti. Senbi kúni bes myń metrlik qashyqtyqta áıel­der arasyndaǵy jarystar ótti. Sonymen atalǵan qashyq­tyqta japon qyzdaryna teń keler eshkim bolmady. Masako Hozýmı 7 mınót 09,23 sekónt jyl­damdyqpen aldy­na jan salmaı, Azıadanyń alty­nyn talassyz aldy.  Osy báseke­den soń ile erler arasyndaǵy on myń metrlik qashyqtyqtaǵy saıys bas­talyp ketti. Munda da, jan alysyp, jan berisken qyzyqty sátter. Bul jarysta Koreıa sport­shysy Lı Seý Hýnǵa teń keler sportshy tabyl­mady. Onyń kór­setkishi 13 mınót 09,74 sekóntti qu­ra­dy. Kúmis júlde Dmıtrıı Babenkoǵa buıyrdy. Jeksenbi kúngi, ıaǵnı Aq Azıa­danyń márege jetetin kúni bolǵan jarystar da eshkimdi beıjaı qal­dyrmady. Sońǵy túıeniń júgi aýyr degendeı konkımen syr­ǵa­naý­dyń bul kúni koman­da­lyq syn­daǵy júlde sarapqa sa­lyndy. Munda da el namysyn tý etken jan­kúıer jurtshylyq kóp­tep jı­­nal­dy. Ádettegideı jarys birinshi áıelder arasynda ótti. Bul synda jarystyń bas júl­desin ońtústik­koreıalyq qyz­dar qanjy­ǵalaryna baılady. Belgilengen qa­shyq­tyqty 3 mınót 04,35 se­kóntte baǵyndyr­ǵan olar toptyq synda top jaryp, Azııa rekordyn jańart­ty. Kúmis medalmen qytaılyq qyzdar kúp­telse, qola júlde ıeleri bolyp  japon arýlary tanyldy. Komandalyq jarystyń erler básekesi jankúıer qanyn qyz­dyrý­men boldy. Shyn myqtyny tap osyndaı jarysta tanýǵa bo­lat­yndaı. Bul turǵyda japon jigitterine teń keler jampoz shyq­pady. Úsh myń eki júz metrlik máre sy­zyǵyn 3 mınót 49,18 sekónt ýaqytta syrǵyp ótken olar top­tyq óner kórsetý­de Qysqy Azııa oıyndarynyń chem­pıony atanyp, jańa rekordty enshiledi. Ekinshi oryn japon­darmen quı­ryq tistesip kelgen Koreıa sań­laqtaryna buıyr­dy. Olar­dyń kór­setkishi 3 mınót 49,21 sekónt. Al qola júlde qol­da qal­dy. 3 mınót 49,56 sekónt kórset­kishimen quramynda Aleksandr Jı­gın, Artem Belaýsov já­ne Dmı­trıı Babenko syndy sań­laq­tary bar Qazaqstan koman­dasy básekeniń úshtigin qorytyn­dylap, jerlesterine júlde syılady. Ábdirahman QYDYRBEK.

Mánerlep syrǵanaý

Saıystyń sońǵy kúni О́tken senbide Astanada mánerlep syrǵanaýdan medaldardyń úsh jıyntyǵy sarapqa salyndy. Áıelder arasyndaǵy erkin baǵdarlamada 177,04 upaıdy enshilegen japon sportshysy Mýrakamı Kanako birinshi oryndy jeńip aldy. Qarsylas taǵy bir japon Imaı Harýka 167,00 kórsetkishimen kúmisti enshilese, koreıalyq Kvak Mın Djong 147,95-pen qola júldege ıe boldy. Saıystyń bul túrine Azııa elderinen 16 úmitker qatysty. Qazaqstan atynan Krıstına Prılepko 108,59 kórsetkishimen toǵyzyn­shy orynnan kórinse, Marına Shıshkına 84,67 upaımen 14-shi orynǵa jaıǵasty. Juptar arasyndaǵy erkin baǵdarlamanyń eki kezeńiniń qorytyndysynda 195,90 upaı jınaǵan qytaılyq Pang Kıng pen Tońg Jıan juby Azııa chempıony atandy. Qytaılyq taǵy bir jup Sýı Venjıng pen Han Song 177,54 upaımen kúmis júldege ıe boldy. Al 143,04 upaı jınaǵan koreı sportshylary Rı Jı Hıang pen Tae Von Hıok qola júldeni qanaǵat tutty. Jarystyń muzda erkin bıleý túrine qatysqan bes juptyń eki kezeń boıynsha jınaǵan upaılarynyń qorytyndysynda 129,75 upaı jınaǵan qytaılyq jup Sınton Hýan men Chjen Sıýn altyn medalǵa qol jetkizip, Azııa chempıony atandy. Al olardan nebári 1,47 upaı kem, barlyǵy 128,28 upaımen aǵaly-qaryndas Ketı men Krıs Rıdterge ekinshi oryn buıyrdy. Qola júldeni 127,50 upaı kórsetkishimen taǵy bir qytaılyq jup Iý Sıaoıan men Van Chen enshiledi. Bul jarysta Qazaqstan atynan shyqqan Vık­torııa Kýcherenko men Vıktor Adonev 102,74 upaımen tórtinshi orynǵa taban tiredi. Juldyz BAIDILDA.

Qarsylastardyń myqtylyǵyn moıyndaý kerek

4 aqpannan Azıadanyń sońǵy kúnderine deıin elor­dadaǵy Respýblıkalyq velotrekte mánerlep syrǵa­naýdan sportshylar baq synasqany belgili. Mánerlep syrǵa­naýdyń ishinde qysqa bı túrinen Qazaqstannyń namy­syn Krıstına Prılepko men Marına Shıshkına syndy batyl qyzdarymyz qorǵaǵan bolatyn. Alǵashqy irikteý aıaqtalyp, aralyqtaǵy úzilis kezinde osy eki sportshy­myzben azdy-kópti áńgimelesken edik. – Krıstına, birinshi suraǵymdy saǵan qoıǵym kelip tur. Osydan shamaly ýaqyt ǵana buryn óz ónerińdi kórsetken bolatynsyń. Qazir qandaı sezimdesiń? – Árıne, alǵashqylardyń biri bolyp shyqqanda biraz qobaljýdyń bolatyny zańdy. Alaıda men kóbinese senimge ıek artamyn. О́ıtkeni, adamdy jeńiliske ushyrata­tyn da osy qobaljý men úreı ǵoı. Mundaı sátterde oǵan kóńil aýdarmaǵandy, mán bermegendi baıaǵyda-aq úırenip qalǵan­myn. Al endi jańa ǵana muz aıdynynda kórsetken ónerime toqtalaıyn. Meniń kórsetilimim jaman shyqqan joq, biraq sekirý kezinde tepe-teńdikti saqtaı almaı biraz baldy joǵaltyp alǵanym ózime onsha unamaı tur. Degenmen de bar kúshimdi salyp tyrystym. Qarsylastarymnyń da osal emes ekendikterin baıqaǵan bolarsyzdar. – Kóptegen jaǵdaı daıyndyq jumystaryna baıla­nys­ty ǵoı. Jarysqa daıyndyqtaryń qalaı boldy? – Tek Azıada eken dep daıyndalýǵa bolmaıdy. Sport­shylardyń kez kelgen daıyndyq pen jattyǵý jumystary erekshe bir jaýapkershilikke toly bolý kerek. Sol sebepti de bizdiń daıyndyǵymyz nashar bolǵan joq. Kún saıyn qaıtalap, syrǵanaý áreketterin pysyqtap júrdik. Qazir men 16-damyn, eseptep qarasam sporttyń bul túrimen aınalysqanyma da 8 jyl bolyp qalypty. Osy segiz jyldyń ishinde jaz mezgilinen basqa kúnderdiń bárinde jattyǵýlar jasap júrdim. – Marına, ózińniń jańa kórsetken ónerińe kóńiliń tola ma? – Árıne tolady. Syrǵanaý barysyndaǵy aınalyp sekirý áreketin jasaǵanda aıaqtyń ıkemin durys keltirmegennen jyǵylyp túskenim bolmasa, qalǵanynyń bári óz oıymdaǵydaı shyqty. Onyń ústine zalda otyrǵan jankúıerlerim meni demep, qoldaý kórsetip jatsa men nege óz ónerimnen lázzat almasqa. Jarys bolǵannan keıin mundaı sátsizdikter bolyp turady. Biz áli jaspyz, sondyqtan bizge tájirıbeler jınaqtap, bıikterden kórinýge múmkindikter jetedi dep oılaımyn. KRISTINA: – Syrǵanaý kezinde bı áreketterimen birge sekirý túrleri úlken ról atqarady. Iаǵnı, sportshynyń bıimen qosa sekirý ádisteri neǵurlym kúrdeli ári jyldam bolsa, sonyń baly da soǵurlym joǵary bolady. Sekirýdiń de ońaılary, qıyndary bolady. Baldyń bári qıyndyqqa baılanysty. MARINA: – Jalpy, qysqa bıleýdiń eń bir sheshýshi elementi ol sekirý bolyp tabylǵandyqtan bı kezindegi sportshynyń sekirgeni, sekirip qana qoımaı ony jyl­damdyqpen úılestire alsa, sózsiz ol joǵary ball alatyny belgili. Qarsylastarymyzdyń ishinde japondardyń ónerleri myqty shyǵyp jatyr, Koreıa da osal emes ekendikterin kórsetti. Bizdiń olardan úırenerimiz óte kóp. Áńgimelesken  Araı ÚIRENIShBEKQYZY.

Qysqa da nusqa

Bıylǵy Azıadanyń basty jańalyǵy – Qazaqstan qurama­synyń jeńip alǵan 32 altyn medali. Qysqy oıyndarda Japonııa quramasy 1986 jyly Sapporoda ótken jarysta óz eline 29 altyn júldeni syılap, osy kezge deıin eshkimge Azıadanyń osyn­shama medalin jeńip alýǵa múm­kin­dik bermeı kelgen bolatyn. Qysqy Azıada kezinde As­ta­nadaǵy «Alaý konkı tebý» sta­dıonynda Azııanyń 9 rekordy jańartyldy. Bul jerde ótken j­a­rystarǵa