Mekke

týraly kórme jalǵasýda Jaqynda Ulttyq mýzeıde Reseı Federasııasy Qarjy mınıstrliginiń Máskeý Aqsha saraıy qasıetti Mekke qalasy týraly kúmis markalar toptamasyn kópshilik nazaryna usynǵan bolatyn. Jer betiniń kindigi, qalalardyń qalasy Mekke shahary musylman halyqtary úshin qasıetti oryndardyń biri bolyp sanalady. Baldaı zám-zám sýy, dámi til úıiretin tátti qurmalary kúni búginge deıin jer júzindegi adamzat balasyn qýanysh pen rahatqa bólep keledi. Iá, taý-tasy kóp, shól dalada oryn tepken qalanyń tasyp jatqan berekeli tirligi óz aldyna bólek áńgime. Biz joǵaryda aıtyp ótken poshta markalary osy sózimizge dálel bola alady. Kórmege qoıylǵan kúmis markalardyń qaı-qaısysy bolsyn, 999 synamaly kúmis­ten quralǵan. Olardyń barlyǵy da Mekke qalasynyń keshegi tarıhynan syr shertedi. Ásirese, ár jyldary qajylyq paryzdaryn oryndap júrgen musylmandar týraly derekterdi kóptep kezdestirýge bolady. Sonymen qatar, Qaǵba, onyń bir bu­ry­shynda ornalasqan Qara tas, Ibra­hım paıǵambar týraly sóz, Mádına qalasyndaǵy Muhammed (s.ǵ.s.) paıǵamba­rymyzdyń meshiti men ataqty ál-Haram meshitiniń ár jyldardaǵy jalpy kórinisteri tamasha kórinis tapqan. Osy rette Ulttyq akademııalyq kitapha­nanyń bas dırektory Úmithan Muńalbaeva kórme týraly oılaryn ortaǵa saldy. – Kólemi kishi bolsa da bul poshta markalarynyń mazmuny óte tereńde jatyr. Álemde balamasy joq dep aıtsaq ta bolady. Ondaǵy sharıǵat belgileri men musylmandardyń qulshylyq jasap jatqan sátteri óte tamasha áser beredi. Islam dininiń mádenıeti, tarıhy, bári-bári kórinis tapqan. О́z isin jaqsy meńgergen sheberlerdiń qolynan shyqqan dúnıeler ekeni kórinip tur. Bul – Islam álemine degen úlken qurmettiń belgisi. Álbette, keshegi bizdiń ata-babalarymyz da sharıǵat úırenip, súnnet amaldaryn berik ustanǵan. Sonyń bir dáleli, Qunanbaıdaı tekti atalarymyz qajylyq paryzyn ótep qaıtqan. Sondyqtan da Ulttyq mýzeıdiń tórinen oryn alǵan kúmis markalardyń qundylyǵy qazaq halqy úshin de óte joǵary dep aıtar edim, – dedi Ú.Muńalbaeva. QMDB naıb múftıi Naýryzbaı qajy Taǵanuly atalmysh kórmege baılanysty pikirin bylaı dep bildirgen edi: – Qasıetti Mekkege arnalǵan jádigerler toptamasynyń mańyzy bizdiń elimiz úshin de zor. Rasynda, toptama sanynyń qyryq bolýynyń sımvolıkalyq mánine nazar aýdarmasqa bolmaıdy. О́ıtkeni, paıǵambarymyz Muhammedke (s.ǵ.s) paıǵam­barlyq mindet osy jasta kelgeni tarıhtan belgili. Kúlli álem musylmandary Mekke qalasyna, Qaǵbaǵa júz buryp, qulshylyq etedi. Ulyq ǵıbadat qajylyq ta Mekke men Mádına qalalarynda atqarylady. Bul qala Muhammedteı (s.ǵ.s.) ardaqty, asyl paıǵambardy dúnıege ákelýimen de qurmetti shahar. Tarıh qatparyndaǵy aıtýly oqıǵalardyń kýási bolǵan Mekkege erte zamanda babalarymyz jaıaýlap qajylyq jasaǵan. Kórme Astana halqyna úlken rýhanı serpilis, dem beredi dep senemin. 2012 jyly bas qalada boı kótergen «Áziret Sultan» meshitiniń ashylýyna oraı Mem­leket basshysy N.Nazarbaevtyń syıy retinde «Kúmis Quran» jıyntyǵy tartý etilgen edi. Bul týyndy da osy avtorlardyń qolynan shyqqan. Ideıa avtory, «VT» kompanııasynyń dırektory Vladımır Prýsakovtyń aıtýynsha, kúmis poshta markalar toptamasyn jasaý ıdeıasy 2006 jyly paıda bolǵan. Jobaǵa ǵalymdardan bastap, sarapshylar, tehnologtar, ınjenerler, dızaınerler, músinshiler men sýretshiler qatysqan. Shek­teýli tırajben shyǵarylǵan kúmis mar­kalardyń kórmesi alǵash ret 2013 jyly Tatarstanda, 2014 jyly Mahachkala men Más­keýde kópshilik nazaryna usynylǵan. Kórme keıin Qyrymda, Grekııada jalǵasyn tapqan. Aıta keteıik, «Máskeý aqsha saraıynyń kúmis markalaryndaǵy Mekke» atty kórmeni Astana qalasy turǵyndary men qonaqtary jazdyń sońyna deıin Ulttyq mýzeıden tamashalaı alady. Azamat BITAN, Ulttyq mýzeıdiń PR-menedjeri