Prezıdent baspasóz qyzmeti men
«Egemen Qazaqstannyń» birlesken jobasy
Qazaq halyq bolyp qalyptasqaly, jurt bolyp uıysqaly basqasy basqa, ultaraqtaı jerin jatqa bermeı, Otanyn jaýdan jankeshtilikpen qorǵaǵany tarıhtan málim. Sonaý zamandardan, baǵzy babalardan jetken erlerdiń erligi osynyń aıqyn dáleli.
Aıbyndy armııa qalaı quryldy?
«Atalarymyz aq bilektiń kúshimen, aq naızanyń ushymen osy ulan-ǵaıyr jerdi qorǵap, bizge muraǵa qaldyrdy. Sonyń arqasynda búginde táýelsiz memleket quryp, ony órkendetip kelemiz», degen bolatyn Elbasy Otan qorǵaýshy kúnine arnalǵan alqaly jıynnyń birinde.
Rasynda da, búgingi kúni azat halyq, táýelsiz el atanýymyz jaýjúrek babalardyń qaharmandyǵynyń arqasy. Babalarymyzdyń qazirgideı áskerı sheni bolmasa da, halyqtan alǵan batyr ataǵynyń ózi árýaǵyn asyryp, jaýynyń qutyn ábden qashyrǵan. Arǵysy Beıbarystan tartyp, bergisi Ábilqaıyr men Abylaı da el bılemes buryn áýeli maıdanda aıbynyn asqaqtatyp, alamanǵa áýeli batyrlyǵymen tanylǵan tulǵalar. Jońǵarlarǵa qarsy joryqta atoı salǵan Qabanbaı men Bógenbaı, shapyrashty Naýryzbaıdan bastalyp, bertindegi Reseı patshasynyń ozbyrlyǵyna qarsy kúreste atqa qonǵan Mahambet pen Isataı, Syrym batyr, Kenesary, Janqoja batyrǵa kelip tireletin halyq batyrlarynyń azattyq úshin arpalysy el tarıhynda qattaýly tur. Memleket basshysynyń atalarymyzdyń ulan-ǵaıyr jerdi qorǵaǵanynyń arqasynda osyndaı táýelsiz memleket qurdyq dep aıtyp otyrǵany da sondyqtan.
Ádette, armııa týraly áńgime qozǵala qalǵanda, esimizge Baýyrjan Momyshuly túsedi. Áskerı sheni polkovnık bolǵanymen, keńestiń marshaldarymen ıyq tirese sóılesken, Jýkovtardyń kóńiline qonaqtaǵan sóz aıtqan áıgili komandırdiń dańqy tórtkúl dúnıeni sharlap ketti desek, asyra aıtqandyq bolmas. «Qanmen jazylǵan kitap» avtorynyń shyǵarmalaryn otanshyldyq ónegesimen adamzatqa tanymal ızraıldik áskerıler, kúreskerligimen kúlli álemniń aýzynda júrgen kýbalyq jaýyngerler jastana oqıdy desek, asyra aıtqandyǵymyz emes.
Baýyrjan Momyshulynyń «Armııa – memleketti syrtqy jáne ishki jaýlardan qorǵaýǵa arnalǵan uıymdasqan, tártipti memlekettiń qarýly kúshi, armııada adamnyń rýhanı kúshi men qajyr-qaıraty qalypty ári josparly jumys júrgizý úshin qatań tártipke baǵynady», dep aıtqany bar. Momyshuly aıtqan sol «tártipti memlekettiń qarýly kúshin», táýelsiz eldiń kásibı armııasyn, Qazaqstannyń Qarýly Kúshterin qalyptastyrý ońaı bolǵan joq. Ásirese, áskerı kadrlardyń tapshylyǵy aýyr tıdi. Keńes Odaǵynda qazaqtan shyqqan joǵary býyndaǵy ofıserler sany bir qoldyń saýsaǵyna da jetpeı-tuǵyn. Áskerı generaldardyń sanyn aıtpaǵan kúnniń ózinde, kompartııa bılik júrgizgen jetpis jyldyq kezeńde halqymyzdyń úsh perzenti ǵana Bas shtabtyń Áskerı akademııasyn támamdaǵan, eki adam ǵana áskerı ǵylymdar kandıdaty ǵylymı dárejesine ıe bolǵan.
Qazaqstandaǵy áskerı komıssarıattar men respýblıkanyń azamattyq qorǵanys júıesinde barlyǵy 1949 ofıser qyzmet atqarsa, sonyń ishinde qazaq ultynyń ókilderi 247 (12,6%) ǵana boldy. Sol kezdegi 19 oblystyq áskerı komıssardyń tek 5-i qazaq edi. Al KSRO Qarýly kúshteri boıynsha jalpy 2 830 ofıser qazaq ultynan bolsa, Almaty joǵary jalpy áskerı komandalyq ýchılıshesindegi 190 ofıserdiń 6-y qazaq (3%) boldy. Ýchılıshede batalon komandıriniń birde-bireýi qazaq ultynan bolǵan emes, kýrsanttardyń sany tóńireginde sóz qozǵasaq, oqý ornynda 87 qazaq balasy (9,4%) áskerı bilim aldy. О́ıtkeni, ýchılıshege de kvota Máskeýden bólinetin. Soǵan sáıkes atalǵan oqý ornyndaǵy qazaqtardyń sany 10 paıyzdan aspaýy tıis boldy. Kerisinshe, Reseıden, Ýkraınadan jáne basqa respýblıkalardan kelip oqıtyndar jetip artylatyn. Keńes ókimetiniń áskerı kadrlar daıarlaý saıasatyndaǵy osyndaı ustanymdary Qazaqstan táýelsizdigin alǵannan keıin qıyndyqqa soqtyrdy.
Qazaqstan sııaqty álemdegi toǵyzynshy terrıtorııany ıelenip otyrǵan el úshin armııanyń qýatty bolýy bárinen de mańyzdy edi. Zamanaýı talaptarǵa jaýap beretin kásibı armııa qurý Qazaqstan Prezıdenti Nursultan Nazarbaevtyń 1991 jylǵy 25 qazandaǵy Memlekettik qorǵanys komıtetin qurý týraly Jarlyǵynan bastaý aldy. Qazaq KSR Memlekettik qorǵanys komıtetiniń tóraǵasy bolyp Keńes Odaǵynyń Batyry Saǵadat Nurmaǵambetov taǵaıyndaldy. Qysqa merzim ishinde komıtettiń quramyn jasaqtaý, qorǵanys salasynyń basym baǵyttaryn aıqyndaý áste jeńil bolǵan joq. Komıtet tóraǵasy respýblıka aýmaǵyndaǵy Túrkistan áskerı okrýginiń qaramaǵyndaǵy áskerı qurylymdardy qabyldap alýǵa oraı, Máskeýdegi áskerı basshylyqpen úzdiksiz kelissóz júrgizýine májbúr boldy. Áıteýir, jankeshtiliktiń arqasynda kelisimge qol jetkizildi.
Joǵaryda aıtqanymyzdaı, is júzinde qazaq komandırleri joqqa tán edi ol tusta. Sol kezde respýblıka aýmaǵynda 250 myń ásker ornalassa da, sonyń ishinde birde-bir qazaq polk komandıriniń bolmaýy kóp nárseden habar beredi emes pe! Komandırlerdiń bári negizinen orys pen ýkraın ultynyń ókilderi-tuǵyn. Odaq tarap jatqan almaǵaıyp kezeńde olar kósh basyn tarıhı otanyna qaraı burdy da, qıyn-qystaý kezeńde túıtkildi máseleni jedel sheshýge týra keldi.
Al eldiń Qarýly Kúshterin qurýdaǵy basty kezeń, eń mańyzdy qujat – «Qazaqstan Respýblıkasynyń Qarýly Kúshterin qurý týraly» Prezıdenttiń 1992 jylǵy 7 mamyrdaǵy Jarlyǵynan bastalady. Osy Jarlyqtyń aıasynda respýblıka aýmaǵynda ornalasqan Qarýly Kúshter men onyń búkil múlki respýblıkanyń quzyretine kóshetinin aıqyndap berdi. Osy kúni Elbasy jas memlekettiń qorǵanys salasyndaǵy taǵdyry úshin óte mańyzdy «Qazaqstan Respýblıkasynyń Memlekettik qorǵanys komıtetin Qazaqstan Respýblıkasy Qorǵanys mınıstrligi etip qaıta qurý týraly» Jarlyqqa qol qoıdy. Táýelsiz eldiń tuńǵysh Qorǵanys mınıstri bolyp general-polkovnık Saǵadat Nurmaǵambetov taǵaıyndaldy.
Saǵadat Nurmaǵambetov Qazaqstan armııasynyń qalyptasýyna baılanysty óz esteliginde tómendegishe jaıdy áńgimelegeni bar edi: «Mınıstrliktiń shtat kestesin shapshań bekitip alyp, basqarý apparatyn qurýǵa kiristik. Bárimiz de kúrdeli jaǵdaıda, qusuıqyly jumys jasadyq. Mindet asa jaýapty edi. Eń aldymen, sol bir qysyltaıań shaqta óte qymbat turatyn jáne sansyz kóp áskerı tehnıka men qarý-jaraqtardy, áskerı qalashyqtardy saqtap qalý kerek bolatyn. Osy jerde ádilin aıtsam, memleketimizdiń Tuńǵysh Prezıdenti N.Nazarbaev kúrmeýin kútken qısapsyz másele qozdap shyǵyp, jan-jaqtan qyspaqqa alǵan alasapyran jaǵdaıda asa kóregendik tanytty. Mundaı muqalmas qajyr-qaırat pen almas jiger birtýar qaıratkerdiń ǵana mańdaıyna jazylǵan». Ýaqyt ótken saıyn Tuńǵysh Prezıdent týraly aıtqan tuńǵysh Qorǵanys mınıstriniń osy tujyrymy quny joǵary ekenin paıymdaımyz.
Táýelsizdikti bekemdeýdiń basty temirqazyǵy ásker deıtin bolsaq, endeshe sol armııany qalyptastyrý jedel sheshimdi, shuǵyl áreketti talap etti. Sondyqtan da el Prezıdenti áskerı bólimderdi ózi bas bolyp aralap, olardyń basshy quramymen ashyq-jarqyn áńgime ótkizdi. Komandırlerge ulttyq alalaýdyń bolmaıtyny, sol sebepti alańdamaı qyzmetterin jalǵastyra berýdiń qajettiligi jan-jaqty túsindirildi. Qazaq jeriniń, sondaı-aq, osyndaǵy barlyq ulttar úshin ortaq Otan ekeni de jerine jetkize aıtyldy. Ásirese, bir atap ótetin jaǵdaı, áskerı qyzmetshilerdi áleýmettik qoldaý jónindegi zań tez qabyldandy. Sonyń arqasynda ofıserler elderine baramyz dese, basqa memleket ekenine qaramastan, olardyń tegin baryp-qaıtýyna da múmkindik jasaldy. Burynǵy odaqtas respýblıkalardyń birde-birinde sol kezde mundaı zań qabyldanǵan emes-ti. Memleket basshysynyń shuǵyl sheshimi aıasynda qabyldanǵan osyndaı naqty sharalar respýblıka aýmaǵyndaǵy áskerı adam resýrsy men tehnıka qýatyn múmkindiginshe saqtap qalýǵa óziniń úlken septigin tıgizdi. Bul óz kezeginde ulttyq kadrlardy daıarlaýǵa deıingi aralyqta áskerdiń áleýetin álsiretpeýge jasalǵan úlken múmkindik edi.
Sonymen qosa, Keńes Odaǵynyń túkpir-túkpirinde áskerı qyzmet etip júrgen qazaq ofıserleri táýelsiz eldiń patrıoty retinde ulttyq armııanyń qataryn tolyqtyrdy. Sóıtip, Qazaqstan armııasynyń negizi qalana bastady. Onyń quramyna Qorǵanys mınıstrligi, Bas shtab, Qurlyq áskerleri, Áskerı-áýe kúshteri men Áýe shabýylyna qarsy qorǵanys áskerleri kirdi. Osylaısha, elimizde tolyqqandy áskerı júıe qalyptasa bastady.
Zaman talaby – áleýetti ásker
Qazaqstan armııasy qurylǵan kúnnen bastap onyń aldyna basty mindet – táýelsizdigimizdi qorǵaý mindeti qoıyldy. Áskerı basshylyq osyny únemi nazarda ustady. 1992 jyly 8 jeltoqsandaǵy Qarýly Kúshter basshylyq quramynyń komandırlik jıynyna qatysýshylar aldynda alǵash ret Qazaqstan Respýblıkasy Qarýly Kúshteriniń Joǵarǵy Bas Qolbasshysy retinde sóılegen sózinde Nursultan Nazarbaev: «Ishki jáne syrtqy saıasattyń qurylymyndaǵy negizgi irgetas – qaýipsizdikti qamtamasyz etý. Sondyqtan, bizge el egemendigin qorǵaý múddesi úshin kez kelgen qaterge tótep beretin, sany az bolǵanmen, sapasy bıik zamanaýı ásker qajet», degen bolatyn. Sol sátten bastap Bas Qolbasshynyń basshylyǵymen Qazaqstannyń Qarýly Kúshteri eldiń táýelsizdigi men aýmaqtyq tutastyǵyn saqtaýda, ulttyq qaýipsizdikti qamtamasyz etýde irgeli mindetterdi atqaryp keledi.
Árıne, áleýeti joǵary ásker qurý úshin eń aldymen zańdyq negizdi shegendep alýdyń mańyzy zor. 1992 jyldyń segiz aıy bar, 1993 jyldyń úsh aıy bar, bárin qosqanda bas-aıaǵy 11 aı ishinde Qazaqstan Respýblıkasy Joǵarǵy Keńesiniń májilisterinde memlekettik mańyzy bar birqatar qujattar jan-jaqty talqylanyp, qabyldandy. Onyń ishinde alǵashqy Qazaqstan Respýblıkasynyń Áskerı doktrınasymen qatar, áskerı zańdar paketi: «Qazaqstan Respýblıkasynyń qorǵanysy jáne Qarýly Kúshteri týraly» Qazaqstan Respýblıkasynyń Zańy, «Jalpy áskerı mindet jáne áskerı qyzmet týraly», «Áskerı qyzmetshilerdiń jáne olardyń otbasy músheleriniń mártebesi jáne áleýmettik qorǵaý týraly», «Qazaqstan Respýblıkasy Qarýly Kúshteriniń áskerı qyzmetshilerin zeınetaqymen qamtamasyz etý týraly», «Qazaqstan Respýblıkasynyń shekara áskerleri týraly», «Qazaqstan Respýblıkasynyń memlekettik shekarasy týraly», «Qazaqstan Respýblıkasy Ishki ister mınıstrliginiń ishki áskerleri týraly» zańdary qoldanysqa endi. Sóıtip, táýelsiz eldiń qurysh qalqany zańdyq turǵydan da túbegeıli bekemdeldi.
Ýaqyt talabyna jaýap beretin armııa tehnıka men qarý-jaraqty jetildirý emes, sonymen qatar, kásibı armııanyń negizi bolyp sanalatyn jańa áskerı býyndy tárbıeleýge de basymdyq beredi. Osy turǵydan alǵanda, 1996-2005 jyldar aralyǵynda elimizde áskerı bilim berýdiń negizi qalandy dep aıtýǵa bolady. Búginde barshaǵa tanymal áskerı oqý oryndary osy kezeń aralyǵynda ashyldy: Qazaqstan Respýblıkasynyń Tuńǵysh Prezıdenti – Elbasy atyndaǵy Ulttyq qorǵanys ýnıversıteti, Qurlyq áskerleriniń Áskerı ınstıtýty, eki márte Keńes Odaǵynyń Batyry T.Bıgeldınov atyndaǵy Áýe qorǵanysy kúshteriniń Áskerı ınstıtýty, Radıoelektronıka jáne baılanys áskerı ınjenerlik ınstıtýty, Áskerı-teńiz ınstıtýty, Shet tilderi áskerı ınstıtýty. Sondaı-aq, jumyldyrý rezervin tolyqtyrý maqsatynda azamattyq oqý oryndarynda zapastaǵy ofıserler daıarlaý úshin áskerı kafedralar jumys isteı bastady.
Elimizdegi Qurlyq áskerleriniń áskerı ınstıtýtynyń arǵy tarıhy 1970 jyly qurylǵan KSRO Joǵarǵy Keńesiniń Qaýlysy negizinde Almaty joǵary jalpy áskerı komandalyq ýchılısheden bastaý alady. Áskerı oqý ornynan 10 myńnyń shamasynda maman joldama alyp, olardyń 400-den astamy óziniń áskerı mindetin Aýǵanstanda jáne basqa da qaqtyǵys bolǵan aımaqtarda atqarǵan. Janqııarlyq erlikteri úshin joǵary úkimettik nagradalarǵa ıe bolǵan. Ýchılısheni bitirgen úsh ofıser – A.Shahvorostov (qaza bolǵannan keıin), N.Akramov jáne S.Gýshın Keńes Odaǵynyń Batyry ataǵyna ıe boldy. 2008 jyly Qazaqstan Respýblıkasy Prezıdentiniń qolynan Halyq qaharmany joǵary ataǵyn alǵan general-leıtenant Baqytjan Ertaev ta osy oqý ornynyń túlegi. Qurlyq áskerleriniń ınstıtýtyn erlikpen jazylǵan ózindik dástúri bar joǵary oqý orny dep ataýǵa ábden bolady. Qazirgi áskerı ınstıtýttyń kýrsanttary, komandırleri men oqytýshylary aǵa urpaqtyń erlikteri men eren eńbekterin maqtan tutady.
Qarýly Kúshterge kásibı serjanttar daıarlaý maqsatynda Elbasynyń Jarlyǵymen Shýche qalasynda Qorǵanys mınıstrliginiń Shoqan Ýálıhanov atyndaǵy Kadet korpýsynyń qurylýy otandyq armııa tarıhyndaǵy taǵy bir beles. Búgingi tańda serjanttar basqarý ortalyq organdarynan bastap eń tómengi bólimderge deıin áskerlerdiń búkil qurylymyn qamtıdy. Al armııa generaly S.Nurmaǵambetov atyndaǵy «Jas ulan» respýblıkalyq mektebi naǵyz patrıottar tárbıeleıtin oqý ornyna aınaldy dep aıtýǵa bolady.
Memleket basshysy Nursultan Nazarbaev jasulandyqtarmen kezdesý barysynda olarǵa úlken senim artqan bolatyn. «Biz bul mektepti qurǵan kezde, oǵan aty ańyzǵa aınalǵan jerlesimiz, Keńes Odaǵynyń Batyry, Halyq qaharmany Saǵadat Nurmaǵambetovtiń esimin berdik. Sender onyń ómir jolyn zerttep, sondaı bolýǵa umtylýlaryń kerek. Bizdiń maqsatymyz – elimizge berilgen naǵyz patrıottardy – Táýelsizdikti, Otanymyz – Qazaqstan Respýblıkasynyń tutastyǵyn qorǵaýǵa daıyn bolatyn áskerı adamdardy tárbıeleý. О́z aralaryńda dostyq pen birlikti nyǵaıtyńdar, ózderińdi eń jaqsy adamı qasıetti saqtaýǵa tárbıeleńder», – dedi Elbasy.
«Jas ulan» respýblıkalyq mektebiniń túlekteri ózderiniń ónegesimen qatarlastaryna úlgi bolýdan aınyǵan emes. El Prezıdentiniń senimin aqtap, qazirgi kezde Otan aldyndaǵy paryzyn minsiz atqaryp júrgen jasulandyqtar osynyń dáleli ispetti.
Ásker túrleriniń basqalary jóninde áńgime basqa da, al áskerı-teńiz kúshteri jóninde jeke aıtýǵa týra keledi. О́ıtkeni, elimizdiń aýmaǵynda buryn-sońdy áskerı-teńiz kúshteri bolǵan emes, atalǵan ásker túriniń qurylýy táýelsiz Qazaqstannyń jylnamasyndaǵy tarıhı oqıǵa bolyp sanalady. Elbasynyń 2003 jylǵy 7 mamyrdaǵy «Qazaqstan Respýblıkasy Qarýly Kúshteriniń qurylymyn ári qaraı jetildirý sharalary týraly» Jarlyǵyna sáıkes Áskerı-teńiz kúshteri Qarýly Kúshterdiń jeke mártebesine ıe boldy. Kaspıı teńizindegi qorǵanys qabiletin nyǵaıtyp, teńiz tósindegi shekara shebin myǵymdaıtyn qazaqstandyq teńizshiler sapqa turdy.
Az ýaqyttyń ishinde Áskerı-teńiz kúshteri halyqaralyq kelisimderge sáıkes basqa elderden jaýyngerlik kemelerdi jetkizýge baılanysty birqatar memlekettik tapsyrmalardy júzege asyrdy. Astrahannan shaǵyn tórt kúzet kemesin, Túrkııanyń Gelchýk portynan Mármár teńizi arqyly shaǵyn kúzet kemesin, Koreıa Respýblıkasynyń Chıne portynan Pendık porty men Mármár teńizi arqyly kemelerdi Aqtaý portyna jetkizdi. Halyqaralyq deńgeıdegi qyzmetterin qaltqysyz atqarǵan keme ekıpajdarynyń jeke quramy Qazaqstan Qarýly Kúshteriniń basqa memleketter aldynda abyroıyn asqaqtatty.
Áskerı-teńiz kúshteriniń jaýyngerleri áskerı tapsyrmalardy oryndaı otyryp, Kaspıı teńiziniń qazaqstandyq bóligindegi sý asty jáne sý ústi jaǵdaıyn únemi qadaǵalap otyrady. Al jyl saıyn Áskerı-teńiz kúshteriniń qatary otandyq jáne sheteldik oqý oryndaryn bitirgen túlekter esebinen tolyǵyp keledi. Áskerı teńizshiler Reseı, Germanııa, Túrkııa, Koreıa, Ázerbaıjan, Pákistanda bilim alyp, áskerı-teńiz kúshterine qatysty áskerı mamandyqtardyń qyr-syryn meńgeredi. Osylaısha, táýelsizdiktiń arqasynda dúnıege kelgen áskerdiń jańa túri de eldiń qorǵanys qabiletin nyǵaıtýda óz úlesin qosyp keledi.
Ásker áleýeti áskerı jattyǵýlar arqyly shyńdala túsedi. Ujymdyq qaýipsizdik sharty uıymyna múshe memleketter áskerleriniń alǵashqy «О́zara is-qımyl-2009» birlesken strategııalyq-komandalyq jattyǵýlary «Mátibulaq» áskerı polıgonynda ótkizilip, oǵan 15 myńnan astam ásker, 1500 brondy tehnıka jáne júzshaqty áskerı ushaq pen tikushaq qatysqan edi. Bul da bolsa Qazaqstan armııasyn taǵy bir qyrynan tanytqan aýqymdy áskerı jattyǵý boldy.
Jaýyngerler jattyǵýda shyńdalady demekshi, Qorǵanys mınıstrliginiń tizginin Imanǵalı Tasmaǵambetov ustaǵaly bergi áskerılerdiń jaýyngerlik daıarlyǵy aıryqsha qarqyn ala bastady. Aıaq asty dabyl qaǵylyp, áskerlerdiń shuǵyl ázirligi synaqqa túsip júr. Sondaı-aq, oqý-jattyǵý jıynynyń sany da kúrt ósti. О́tken jyly elimizdiń Qarýly Kúshterinde uzyn-sany 3500-deı ártúrli oqý-jattyǵý ótkizilse, bıylǵy jyldyń tórt aıy ishinde 950 oqý-jıyny ótkizildi. Sońǵylarynyń ishindegi irileri «Aıbalta» jáne «Qarataý» iri oqý-jattyǵýlary bolyp tabylady.
Qazaqstan Respýblıkasynyń Qarýly Kúshteri Bas Qolbasshysynyń tapsyrmasy boıynsha «Batys» óńirlik qolbasshylyǵynyń áskerlerinde ótken «Qarataý-2016» oqý-jattyǵýǵa «Batys» jáne «Ońtústik» óńirlik qolbasshylyǵynyń jeke quramy, 25744, 86717, 30238, 75488 áskerı bólimderiniń áskerı qyzmetshileri, sondaı-aq, UQK Shekara qyzmeti men QR IIM Ulttyq ulannyń bólimsheleri tartyldy. Atalǵan jattyǵý jeke quramnyń jaýyngerlik is-qımyldardy júrgizý mashyǵyn, sondaı-aq, dene tózimdiligin jáne áskerlerdi alys qashyqtyqtarǵa bir jerden ekinshi jerge jóneltýdi pysyqtaýǵa baǵyttalǵan. «Qarataý-2016» oqý-jattyǵýyna 7000-nan asa áskerı qyzmetshi qatysty. Jyl saıyn turaqty túrde ótkizilip kele jatqan áskerı jattyǵýlardyń nátıjesinen Qazaqstan Qarýly Kúshteriniń áleýeti artyp kele jatqandyǵyn aıqyn ańǵarýǵa bolady.
Qazaqstan Respýblıkasynyń Prezıdenti, Qazaqstan Respýblıkasynyń Qarýly Kúshteriniń Joǵarǵy Bas Qolbasshysy Nursultan Nazarbaev otandyq armııanyń áleýeti kúshti armııaǵa aınalýyna qajyrly eńbek sińirýmen qatar, onyń tehıkalyq turǵydan jaraqtandyrylýyna da erekshe nazar aýdarady.
«Bıyl biz osy aıtýly kúndi Táýelsizdigimizdiń 25 jyldyq mereıtoıyna daıyndyq aıasynda atap ótemiz. Ulttyq armııa, áskerı-áýe kúshterin jáne áskerı-teńiz flotyn qurý – egemen Qazaqstan shejiresindegi mańyzdy belestiń biri. Alǵashqy áskerı bólimderdi qalyptastyrýdan bastap, ulttyq qorǵanys pen qaýipsizdiktiń qazirgi zamanaýı júıesine deıingi úlken joldy júrip óttik. Eń zamanaýı qarýmen jáne tehnıkamen jabdyqtalý, komandırlerdiń kásibıligi, jeke quramnyń joǵary jaýyngerlik daıyndyǵy men mashyǵy – osynyń bári bizdiń Qarýly Kúshterimizge tán», – degen edi Nursultan Nazarbaev bıylǵy Otan qorǵaýshy kúnine arnalǵan jıyn barysynda.
Iá, shırek ǵasyrǵa jýyq ýaqyt ishinde Qazaqstan armııasy qıyn kezeńnen, qalyptasý kezeńinen abyroımen ótip, áleýeti kúshti, memlekettiń táýelsizdigin, qorǵanysyn qamtamasyz etetin qýatty armııaǵa aınaldy.
«Qazir endi osynyń bári bir kúnde ózdiginen bola qalǵandaı kórinýi múmkin. Shyndyǵynda, táýelsizdigimizdi jarııalaǵanymyzben, onyń erteńgi taǵdyry beımálim edi. Respýblıkamyzdyń Tuńǵysh Prezıdenti N.Nazarbaevtyń syndarly saıasaty, Úkimet pen Parlamenttiń qajyrly qyzmeti, sondaı-aq, qazaqstandyqtardyń ózine ǵana tán parasat-paıymy talaı urpaq ańsaǵan aqjarylqap kúnge jetkizdi». Elimizdiń tuńǵysh Qorǵanys mınıstri, Halyq qaharmany Saǵadat Nurmaǵambetov Qazaqstan armııasynyń qalyptasýyna baılanysty osylaı degen bolatyn.
Ǵabıt ISKENDERULY,
«Egemen Qazaqstan»
