6 jasar aspazdyń tabysy – 2 myń dollar
Úndiniń Nıhal Radj esimdi 6 jasar balasy óz rolıkteriniń birin Facebook-te paıdalanýǵa ruqsat bergeni úshin $2 myń dollar kóleminde aqsha aldy.
Jurtqa Kıcha degen nıkpen kóbirek belgili bolǵan aspaz bala YouTube-ta óziniń jeke jazbasyn júrgizedi. Ol as daıyndaýmen 4 jasynan bastap aınalysqan. Sebebi, ózi gýrmandar otbasynan shyqqan eken.
46 jastaǵy Albıon azamaty aqyr zamanǵa daıyn otyr
Brıtanııanyń 46 jastaǵy Iаn Kýlthard esimdi azamaty aqyr zamanǵa bar ynty-shyntysymen ázirlenip jatqan kórinedi. Onyń esebi boıynsha, ekonomıkalyq apat aldaǵy 20 jyldyń ishinde kelip jetedi.
Burynǵy áskerı qyzmetker osy kezge deıin Shotlandııa, Soltústik Anglııa jáne Ýels jerlerinen apokalıpsıs ornaı qalǵan jaǵdaıda turatyn qonys daıyndap qoıypty. Olardyń barlyǵynda keminde 10 kúnge jetetin tamaq pen sýdyń qorlary bar.
Muzdy muhıt ústinde mýzyka oınady
Italııanyń Lıýdovıko Eınaýdı atty kompozıtory ári pıanısi Soltústik muzdy muhıttyń ústinde júzýshi platformada otyryp, óziniń jeke shyǵarmasyn oınap shyqty.
Mýzykant kópten bergi bul armanyn Norvegııanyń Shpısbergen aralyndaǵy Wahlenbergbreen muzdyǵynyń aldyńǵy bóliginde júzege asyrǵan. Ol munda kezinde kúlli álemnen 8 mıllıon adamnyń daýsyn jınaǵan Arktıkany qorǵaý týraly «Arktıka elegııasy» atty týyndysyn oryndaǵan.
Toıǵa kelgen tóbetti tap-tuınaqtaı etip kıindirdi
Shotlandııanyń bir turǵyny súıikti tóbetin ózge bireýlerdiń úılený toılaryna saltanatqa saı kıindirip alyp baryp, óziniń janyna otyrǵyzyp qoıdy.
Kılt pen jeıde kıingen ıttiń moınynda kóbelek-galstýk kórinip tur. «Jaqynda meniń ózim de úılenemin. Sonda tóbetimsiz toı sýretterin túsirte almas edim», dep jazypty Reddit áleýmettik jelisine YellyG degen nıgi bar paıdalanýshy. Osy kadr Imgur jelisinde paıda bolǵan eki kúnniń ishinde ony 1,4 mıllıon adam qarap úlgergen.
Qaryndashtan pil úıirin súrmelep shyǵarǵan
AQSh-tyń Sındı Chınn degen sýretshi áıeli ónerdiń dáldikti kózdeıtin mınımalızm degen túri boıynsha qaryndashtardan súrmelep, birneshe pildiń sulbasyn jasap shyqqan.
Sýretshi «Sergentıtı pilderi» degen ataý bergen bul jobada osy janýardyń bir úıiri kórinis beredi. Tapsyrys boıynsha jasalǵan músin kompozısııasynda Sındı bireýdiń ornyna úsh pil qashap shyǵarǵan. Árbir pil bir qaryndashtan alynǵan. Biraq olar sońynan bir-birimen birigip ketken. Bul ómirge ónerdiń osyndaı bir túri kelgenin kórsetedi.
72-degi Mık Djagger segizinshi balaǵa áke atandy
Aǵylshynnyń belgili rok-mýzykanty, The Rolling Stones rok-tobynyń vokalısi Mık Djagger jasy 72-ge kelgende segizinshi balasyna áke atanǵaly otyr.
Mýzykanttyń ókili 29 jastaǵy balerına Melanı Hamrıktiń Djaggerden ekiqabat ekenin rastap berdi. Biraq qyz rok-juldyzben birge turý úshin Los-Andjeleske nemese Konnektıkýtke qonys aýdarýǵa nıetti bolyp otyrǵan joq. Al Djaggerdiń buǵan deıin eki áıeli bolǵan. Bulardan basqa taǵy eki áıelden bala súıgen.
Fın premeri Mońǵolııaǵa ushaqty ózi aıdap bardy
Fınlıandııanyń premer-mınıstri Iýha Sıpılıa Mońǵolııada ótip jatqan Azııa-Eýropa (ASEM) sammıtine qatysý úshin jalǵa alǵan ushaǵyn ózi basqaryp bardy.
Premer-mınıstr keńsesindegiler Sýomı úkimeti basshysynyń ushaqty óz qaltasynan shyǵarǵan aqshaǵa jaldap barǵanyn da jetkizdi. Sóıtsek, premer buǵan deıin de birneshe qyzmettik issaparyna áýe kemesin ózi basqaryp barǵan eken.
Aqparat agenttikteriniń materıaldary negizinde daıyndaldy
