«Egemen Qazaqstan» basshysy Almatyda qalamgerlermen kezdesti

Foto: Talǵat Súıinbaı

«Egemen Qazaqstan» respýblıkalyq gazeti» aksıonerlik qoǵamy basqarmasynyń tóraǵasy Darhan Qydyráli demalys kúnderi Almaty qalasynda bolyp, redaksııanyń osyndaǵy bólimshesi qyzmetkerlerimen kezdesti. Basylymnyń jańa basshysy óz sózinde ǵasyrǵa jýyq tarıhy bar aǵa gazettiń aldaǵy óndiristik josparlary men shyǵarmashylyq mindetteri túbegeıli túrde ózgeretinin jetkizdi. Ol sonymen qatar basylymnyń jergilikte jerdegi «qulaǵy men kózderiniń» pikirin tyńdap, usynystaryna den qoıdy. Almaty tilshilerine shahardyń elimizdegi asa iri ekonomıkalyq-qarjylyq ortalyq qana emes, tereń tarıhy men shejiresi zor mádenı megapolıs ekenin eske sala kelip, tilshilerdiń qalanyń tirshilik-tynysy týraly oqyrmanǵa dál ári der kezinde habardar etip, salalar boıynsha qalam terbeıtin avtorlardyń jańa legin tartý týraly tapsyrmalar berdi. Almaty oqyrmandary úshin taıaý mezgilde qalada «Egemenniń» óziniń gazet dúńgirshekteri bolatyny jaıly da habardar etti.

Budan keıin Darhan Qydyráli qazaq jýrnalıstıkasynyń abyz aqsaqaly, Halyq jazýshysy, «Egemen Qazaqstannyń» burynǵy bas redaktory Sherhan Murtazaǵa sálem bere baryp, onyń batasyn aldy. Kelesi kezekte basylym basshysy gazettiń keńes kezeńinde redaktory bolǵan, janyna ótkir qalamy men jalyndy jigerin serik etken Balǵabek Qydyrbekulynyń otbasynda bolyp, qalamgerdiń jary  – alashordashy Seıdaly Orazalınnyń qyzy Sapýra apaımen kezdesti. Alashordashylar qozǵalysynyń 100 jyldyǵy qarsańynda ótkizgen ózara áńgime tanymdylyq sıpatymen qyzyqty boldy. «Egemen Qazaqstan» respýblıkalyq gazeti» AQ basqarma tóraǵasy sapary barysynda sondaı-aq Almatyda shyǵatyn birqatar basylymdar basshylarymen, belgili qalamgerlermen júzdesti. Talǵat SÚIINBAI