Mınıstr oqıǵanyń egjeı-tegjeıin baıandady

  Elimizdiń Ishki ister mınıstri Qalmuhanbet Qasymov Almatyda shuǵyl brıfıng ótkizip, ońtústik astanada 18 shilde kúni oryn alǵan oqıǵalardyń egjeı-tegjeıin baıandady. – Atys kezinde 8 adam, sondaı-aq qolǵa túsirý barysynda qyl­mysker jaralandy. 3 polı­seı, 1 shekarashy mert boldy. Sońǵysy onyń avtomobılin tartyp almaq­shy bolǵan kezde qarsylyq kór­setti,– dedi mınıstr brıfıngte. – Sondaı-aq, ártúrli deńgeıdegi jaraqattarmen 6 polıseı jáne 3 jaı adam aýrýhanaǵa jatqyzyldy. Bulardyń qatarynda qylmysker de bar. Terrorızmge qarsy kúres jó­nin­­degi Almaty qalalyq jedel shta­by­nyń resmı ókili Saltanat Ázirbektiń málimdeýinshe, qyl­mys­ker osynyń aldynda О́zbekstan azamatshasyn óltirgen. Buǵan deıin ol ártúrli qylmystary, sonyń ishinde kisi tonaǵany jáne zań­syz qarý saqtaǵany úshin 5 jyl 11 aı merzimdik jazasyn ótegen. Qyl­myskerdiń aıtýynsha, ol osy jyldarda ketken kegi úshin polı­seı­lerdi óltirýge bekinip shyqqan. Qalaı desek te, bul adam túzelý jolyna túspegen, jazasyn óteý oryndarynda teris jaǵynan sıpattalǵan. Ishki ister mınıstri 18 shildede Almatyda bolǵan oqıǵalardy ret-retimen tizip aıtty. Almaly aýdandyq ishki ister bóliminiń qyzmetkerine shabýyl jasaǵan sátten ol ustalǵanǵa deıin 24 mınót ótken. Aýdandyq ishki ister bólimine qylmysker aldyn ala qarý­lanyp kelip, polıseıdi atqan jáne onyń qarýyn alǵan. Ol polı­seıdi atqan pıstolet keıin­nen aýdan­­dyq ishki ister bólimi ǵıma­raty­­­nyń janynan tabyldy. Odan ári qylmysker Almaty aýdandyq ishki ister bóliminiń ǵımaratyna qaraı birneshe ret oq atqan, sonyń saldarynan 1 jaı adam jáne 1 polısııa qyzmet­keri jaraqat alǵan. Qarýmen qorqyt­qan qylmysker avtomobıldi basyp alyp, júrgizýshige Ulttyq qaýip­sizdik komıteti depar­tamentine qaraı júrýge buıyrǵan. Jol boıy, Qurmanǵazy-Sháripov kósheleriniń qıylysynda ol polısııa patrýlin atady, sonyń saldarynan 2 qyz­met­ker jaralanǵan. Odan ári Baızaqov kóshesiniń boıynda ol taǵy bir ekıpajdy atqylaıdy. Bul jerde bir qyzmetker – polısııa serjanty Sálinbaev taban aýzynda qaza taýyp, onyń áriptesi aýyr jaralandy. Sodan keıin qylmysker mashına aýystyrady. Biraq júrgizýshi jaı kıim kıgen shekara qyzmetkeri bolyp shyǵyp, ol qylmyskerge qarsylyq kórsetip, sol arada mert bolady. Odan soń qylmysker taǵy bir jaı adamdy óltiredi. Abylaı han kóshesiniń boıynda arnaýly batalon qyzmetkerleri mashınany toqtatýǵa árekettenedi. Bul arada da polısııa qyzmetkeri qaza taýyp, ekinshisi jaraqat alady. Osy kezde Memlekettik kirister departamenti ǵımaraty jaǵynan postyda turǵan qyzmetker júgirip shyǵyp, qylmys týraly aıqaılap aıtady. Oǵan da birneshe oq tıip, kóz jumady. Al onyń áriptesi qyl­mys­kerdi ustaıdy. Sóıtip, qorytyndysynda 5 adam – 3 polısııa qyzmetkeri, 1 jaı adam jáne Qazaqstan UQK depar­tamenti Shekara qyzmetiniń 1 qyzmetkeri qaza tapty. Zardap shekkender arasynda alty polısııa qyzmetkeri jáne bir jaı adam bar. Ustaý barysynda qylmysker de jaraqat aldy. Talǵat SÚIINBAI, «Egemen Qazaqstan» ALMATY