«Bıle, Qazaqstan!»

eń úzdik óner ıelerin anyqtaıdy «Bıle, Qazaqstan!» jobasy talaı jurtty moıyndatqan, kóptegen elderde óz kó­rermenderin jınap, tańǵaldyra bilgen mýzykalyq joba. «Habar» arnasy talǵamy joǵary kórermen úshin taǵy bir tyń dúnıe ázirlep jatyr. Kúzgi maýsymda kópshilik nazaryna «Bıle, Qazaqstan!» dep atalatyn jańa baǵdarlama usynylady. Halyqaralyq joba sheteldik bı jarysynyń Ortalyq Azııa aý­­maǵyndaǵy alǵashqy nusqasy bolmaq. Áı­gili «Endemol» kompanııasy bı baıqaýyn Qazaqstanda uıymdastyrýǵa kelisimin berdi. Bul – «Habar» agenttiginiń birneshe jyl boıy júrgizgen kelissóziniń nátıjesi. Baǵdarlama Qytaı, Avstralııa, Ulybrıtanııa syndy álem­niń 37 elinde kórsetilip, eń joǵary reıtıngterge ıe bolǵan. Al elimizde ótetin bı jarysyna 10 jastan asqan kez kelgen azamat qatysa alady. Basty talap – jeńiske degen umtylys pen ónerge qushtarlyq», – deıdi uıymdastyrýshylar. «Bıle, Qazaqstan!» jobasyna qatysýshy­lardyń ónerine áıgili bıshiler baǵa beredi. Qazy­lar alqasynyń quramyna shetelden arnaıy maman shaqyrtylǵan. Baıqaýǵa alys jáne jaqyn memleketterden yntalanǵan óner ıeleri de qatysa alady. Joba maqsaty – elimizdiń barlyq tur­ǵyn­daryn bı bılep, salamatty ómir saltyn us­taný­ǵa shaqyrý. Áleýmettik joba bı bıleý ar­qy­ly qazaqstandyqtardy birlikke, dostyqqa shaqyrady. Shoýdyń tólnusqasy birinshi ret 2005 jyly AQSh-ta «So You Think You Can Dance» degen ataýmen kórsetilgen. Joba 10-nan astam «Emmı» júldesin alǵan. Qazaqstan boıynsha bul baıqaýǵa irikteý kezeńderi Astanada shildeniń 23-i men 24-i aralyǵynda, al Almatyda 30-31 shildede ótedi. Esterińizge salaıyq, «Bıle, Qazaqstan!» shoýy arnanyń efırinen kúzgi televızııalyq maýsymnyń basynda kórsetiletin bolady. Baıqaýdyń irikteýi Qazaqstannyń úsh qalasynda ótedi: Astanada – 23 jáne 24 shilde, Almaty – 30 jáne 31 shilde, sondaı-aq, 6 jáne 7 tamyzda kórermender daýys berý arqyly tańdaǵan úshinshi qalada. Irikteý aınalymdarynan keıin 60 qatysýshy arnaıy jabdyqtalǵan úıge shaqyrylyp, onda tanymal horeograftardyń basshylyǵymen óner kórsetýge jattyǵa bastaıdy. Kezeńniń qory­tyndysy boıynsha 20 qatysýshy (10 jigit jáne 10 qyz) kelesi aınalymǵa óte alady. Úshinshi kezeńde jıyrma qatysýshy jup-jupqa bólinip, ár apta saıyn kórermender men qazylarǵa túrli janrdaǵy bı nómirlerin (balet, kontemporarı, hıp-hop, breık-dans, djaz, bal bıleri jáne basqalary) kórsetetin bolady. Qazylardy tań qaldyra almaǵan qatysýshylar jobadan ketedi. Fınaldyq shyǵarylymdarda bıshiler jeke-jeke 1-oryn úshin báseke-dodaǵa túspek. «Bıle, Qazaqstan!» shoýy arnanyń efıri­nen kúzgi televızııalyq maýsymnyń basynda kórsetiledi dep uıǵarylǵan. Gúlzeınep Sádirqyzy, «Egemen Qazaqstan» ALMATY