Qant Semeıde de qymbattady

Semeıdegi azyq-túlik dúken­derinde sońǵy 10 kún shamasynda qant baǵasy 280 teńgeden 350 teńgege deıin kóterilgen. Qalalyq kásipkerlik bólimindegilerdiń aıtýynsha, baǵany kóterip otyrǵan qant zaýyttary. Jáne taǵy bir másele, qanttyń baǵasy ósýi bylaı tursyn, ol kóp jerlerde dúken sórelerinen joǵalyp ketipti. Al qazir, jemis-jıdektiń pisken ýaqyty, eldiń bári qysqa túrli tosap, qaınatpa daıyndap, azyqtaryn qamdaýǵa tyrysyp jatyr. – Bul jaǵdaı ári ketse bir aptaǵa ǵana sozylady, odan soń jaǵdaı qalpyna keledi, – dep túsindirdi qalalyq kásipkerlik bólimi bastyǵynyń mindetin atqarýshy Baýyrjan Iýsýpov. – Qant baǵasynyń kóterilýi qazir jiti baqylaýda. Bul sózbuıdaǵa salatyn másele emes. Alypsatarlyqqa jol bergenderge shara qoldanylady. Qant baǵasynyń kóterilýine baılanysty kásipkerlermen túsindirý jumystaryn jalǵastyra beremiz. Qazir Semeıdegi qanttyń ortasha baǵasy 290 teńge shamasynda. Qalaǵa táýligine 14 tonna qumsheker qajet. Búginde qalada 200 tonnadan astam qant qory bar. Aldaǵy 3 kúnde taǵy jetkizilmek. Elimizde Úkimet qaýlysymen 27 túrli azyq-túlik ónimi áleýmettik mańyzy bar dep bekitilgen. Onyń ishinde qant ta bar. Sondyqtan, ústeme aqy 10 paıyzdan aspaýy tıis. Semeıde qanttyń kóterme saýdasymen 3 kásiporyn aınalysady. Jaqynda «Aqsuńqar» jáne «Spýtnık» JShS-lerge qant ákelinedi dep kútilýde. Kásipkerlik bólimindegi saýdany damytý sektorynyń meńgerýshisi Aıjan Hasenovanyń aıtýynsha, qaladaǵy qant kóterme saýdasymen aınalysatyn úsh mekemeniń ekeýinde qant qory túgeldeı taýsylǵan. Ázirshe bir JShS ǵana 68 tonna qant jetkizgen. Osy serik­­tes­tikke qala bas­shy­lyǵy ákelgen qant­ty óziniń áriptesterine berý­di qoıa turyp, ha­lyq úshin qala dúkenderiniń sóre­lerin to­­lyq­­tyrýdy surap otyr. Semeıde qant­ty halyq­­qa satatyn 1,5 myń saýda núktesi bar. Kún saıyn halyqqa 14 tonna qant turaqty ótedi. – Biz Ortalyq Azııa qant korporasııasy basshylyǵymen kelissózder júrgizdik, onda bizdiń qalaǵa jetkiziletin 12 tonna qant daıyn turǵandyǵyn aıtty, – deıdi Aıjan Hasenova. – Qalada kóterme saýda jasaýshylar qanttyń kelisin 260 teńgeden saýdalap jatyr. Osyǵan jekelegen dúkender 10 paıyz qossa, qanttyń kelisi shamamen 290 teńgeden satylýy kerek. Talap boıynsha bólshek saýdadaǵy baǵa osy somadan aspaýy tıis. Al bazarlarda 340-360 teńgeden saýdalanýy osyndaı qysyltaıań ýaqytty paıdalanyp, alypsatarlardyń qoldan jasap otyrǵany. Qazir osynyń barlyǵyn anyqtap jatyrmyz. Qanttyń qymbattaýyna Jambyl oblysyndaǵy eki qant zaýytyndaǵy baǵanyń ósýi de áser etip otyr. Olardaǵy kóterme baǵanyń ózi 250 teńge. Jambyl oblysynan qalamyzǵa kelgenge deıin 260 teńge bolady. Bul jerde 5-6 paıyzdan artyq qosylyp otyrǵan joq. Al bólshek saýdada 10 paıyzdan artyq qosylmaı, ortasha alǵanda 290 teńgeden saýdalanýy kerek. Sonymen, júrgizilgen barlyq kelissózder nátıjesi boıynsha Semeıge jan-jaqtan, ıaǵnı qant qyzylshasyn ósiretin zaýyttardan 408 tonna qant keledi dep kútip otyrmyz. Raýshan NUǴMANBEKOVA SEMEI