ChL: «Astana» kelesi kezeńge ótti

«Astana» – «Jalgırıs» 2:1 Match qaharmany – Marın Anıchıch Chempıondar Lıgasynyń irikteý kezeńindegi oıynda elordalyq «Astana» fýtbol klýby lıtvalyq «Jalgırıspen» kezdesip, 2:1 esebimen jeńiske jetti. Bul matchty elordalyq klýbtyń qorǵaýshysy Marın Anıchıchtiń benefısi desek artyq aıtpaımyz. «Astana» sapynda eki goldyń ekeýin de maqtaýly shabýylshylar nemese jartylaı qorǵaýshylar emes, dál sol Anıchıch soqty. Bas bapker Stanımır Stoılov match aldyndaǵy baspasóz más­lıhatynda óz shákirtteri neǵur­lym tezirek esep ashsa, soǵurlym psıhologııalyq qysymnan arylyp, erkin oınaýǵa múmkindigi artatynyn aıtqan bolatyn. Syrt alańda gol soǵa almaı, teń nátıjemen qaıtqan elordalyq klýbtyń oıynshylary match bastalysymen shabýyldaýǵa kóshti. Aldymen 3-mınýtta tepken aıyp doby qaqpadan bıik ketken Marın Anıchıch 31-mınýtta sonyń esesin qaıtardy. Buryshtan berilgen dopqa qarǵyǵan bosnııalyq qorǵaýshy basymen soqqy jasap, lıtvalyq klýbtyń qaqpashysyn qapy qaldyrdy. Ekinshi taımnyń basynda bra­zılııalyq Elıvelto aıyp alańyna ener urymtal tustan soqqy jasap, esepti teńestirip ketken. «Astana» jankúıerleriniń kóńilin kúpti qylǵan osy esep qosymsha ýaqytqa deıin saqtaldy. Stadıonǵa jıylǵan elordalyq jankúıerlerdiń qulaq tundyra qıqýlaǵan qoldaýy demeý boldy ma, áıteýir, «Astananyń» jigitteri sońǵy sekýndqa deıin janyn saldy. Aqyry 92-shi mınýtta dál sol Anıchıch taǵy da buryshtama soqqydan keıin qaqpa aldynda bolǵan qarbalasta dopty torǵa toǵy­typ úlgerdi. Arnur ASQAROV, «Egemen Qazaqstan» Sýretterdi túsirgen Erlan OMAROV