Kárizdiń kináraty

Kólkildegen kósheler óskemendikterge Venesııany eske saldy Sońǵy kúnderi ór Altaı­dyń asqaq shyńdaryn jıi búr­kep alatyn kókshýlan bult­tar shyǵysqazaqstandyq tur­ǵyndardyń jazǵy demalysyn oıdaǵydaı ótkizýine múmkindik bermeýde. Álbette, tabıǵattyń jaratylysyna moıynusynbasqa lajymyz joq. Dese de, qala ınfraqurylymynyń qolaısyzdyq týdyrýy jergilikti ákimdiktiń áreketsizdiginen be degen oıǵa qaldyrady. Aıtalyq, gazetimizde «Nóser nópiri» (8 shilde, 2016 jyl) atty maqalamyzda qalyń jaýǵan jaýynnan kósheni kól­kildegen sý alǵandyqtan káriz júıeleriniń jumysynda kinárat barlyǵyn jazǵan edik. Alaıda, jóndelgen nemese tazalanǵan aryq joqtyǵy taǵy belgili boldy. Burnaǵy kúni tús áletinde bir saǵatqa jeter-jetpes jaýyn-shashynda oblys ortalyǵynyń kóshelerindegi kólikter kórgen janǵa júzip júrgendeı áser qaldyrdy. Beınebir О́skemende emes Venesııada júrgendeımiz, desedi turǵyndar. Atap aıtqanda, tolassyz jańbyrdan Jańa Sogra, Mırnyı kenti, qaladaǵy Táýelsizdik dańǵyly men Mıhaelıs kóshesi jáne basqa da jerlerdi sý bas­ty. Táýelsizdik dańǵylynda kólik keptelisi oryn aldy. Osynda kele jatqan biz tizeden sý keshken turǵyndarǵa, belýarynan maltyǵyp jan-jaǵyna sý shasha qozǵalǵan kólikterge kýá boldyq. Jeke sektorlardaǵy úılerdiń irgetasyna kóterilgen sý jertólelerge de quıyldy. Qalalyq tótenshe jaǵdaı bas­qarmasy Avrora kóshesiniń turǵyny kómek suraǵanyn, aýlasyndaǵy 65 santımetrlik bıiktikke kóterilgen sýdy sor­ǵyzyp alǵanyn aıtady. Al kóshedegi sýdyń deńgeıi 85 santımetrge deıin kóterilgen bolatyn. Jalpy, qutqarýshylar jeke úıler ıeleriniń tabıǵattyń tosyn raıy­na kez kelgen ýaqytta daıyn bolýyn, sýaǵar aryqtar jasap, qum toltyrylǵan qaptardy ázirlep qoıý qajettigin jetkizdi. Al bizdiń qos nóserden túıgen oıymyz – qala bıligi kóshe jıekterindegi aryqtar men káriz júıelerin jedel jańǵyrtýdy qolǵa alýy tıis. Dýman ANASh, «Egemen Qazaqstan» О́SKEMEN