Zaısandaǵy «Sálem» saýda ortalyǵy

50 adamdy jumyspen qamtamasyz etti Zaısan qalasynda záýlim, ishi-syrty kóz tartatyn, 4 qabatty «Sálem» saýda orta­lyǵy esigin aıqara ashty. Onyń saltanatty ashylýyna aýdan ákimi Temirbek Qasymjanov, qurylysty salyp bergen, «Zaısan-qurylys» kompanııasynyń basshysy, oblystyq máslıhattyń depýtaty Bolat Nurasyl, aýdannyń qurmetti azamattary, ardagerler, qala jurtshylyǵy qatysty. – Elbasynyń Qazaqstan halqyna Jol­daýynda shaǵyn jáne orta kásipkerlikti damytý, jumys oryndaryn ashý jóninde naqty tapsyrma berilgeni belgili. Bul rette Zaısan aýdanynda da eleýli jumystar atqarylýda. Máselen, aýdanda 140 saýda dúkeni bolsa, Zaısan qalasynyń ózinde ǵana 88 saýda oryndary men dúkender bar. Olarda 500-ge tarta adam jumys isteıdi. Al búgingi «Sálem» saýda ortalyǵy – eń úlken ǵımarat. Munda birinshi qabatta balalar oınaıtyn alań, dámhana, shashtaraz, halyqqa qyzmet kórsetetin oryndar, bankter ornalasqan. Demek, saýda ortalyǵyna kelgen adam ózine qajetti zattardy satyp alýmen birge bankten nesıe ala alady, basqa da sharýalaryn bitiredi. Saýda ornyn sapaly etip salyp bergen qurylys kompanııasynyń basshysy Bolat Iekpulyna, búgingi ǵajap ǵı­marattyń salynýyna 250 mıllıon teńge qarjy salǵan, 50 adamǵa jumys taýyp bergen Dáýlet Myqııanovqa aýdan turǵyndary atynan alǵys aıtamyn, – dedi jıyndy ashqan aýdan ákimi T.Qasymjanov. Budan keıin sóz alǵan Bolat Nurasyl ózimen Aınabulaq aýylynda bir mektepte oqyǵan dosy Dáýlet Myqııanovtyń naryqtyń qıyn-qystaý kezinde boran-shashynǵa qara­mastan kólikpen qajetti azyq-túlikti tasy­ǵanyn, avtobýs qatynasyn iske qosqanyn, isker azamattyń búgingi tabys­qa eńbekqorlyǵy men izdenisi arqasynda jetkenin aıtty. Budan keıin sımvoldyq kiltti «Jasulan» sharýa qojalyǵynyń tór­aǵasy, mal ósirýmen birge saýda dúkenderin paıdalanýǵa bergen D.Myqııanovqa tabys etti. Aýdandyq ardagerler keńesiniń tóraǵasy Tuqan Myrzahanov isker azamatqa batasyn berdi, Zamanbek Burymbetov pen Dáýlettiń apaıy lentany qıǵan soń jınalǵandar záýlim saýda úıin aralap, zattardy satyp ala bastady. Sońynda án men kúıge kezek berildi. Aýdan ákimi Temirbek Jumaqululy bizben áńgimesinde «О́skemen-Zaısan» áýe reısiniń qaıtadan iske qosylǵanyn, áýe­jaıdy jóndeýge Bolat Nurasyldyń qolǵabys jasaǵanyn, 2 shildede aýdanǵa Ońtústik Koreıadan 20-ǵa tarta bilikti dári­gerlerdiń kelip, halyqqa tegin qyzmet kór­sete bastaǵanyn, sol kúni kásip­ker Bolat Nurasyldyń qarjysyna salǵan em­hananyń paıdalanýǵa berilgeninen habardar etti. Iá, Zaısanda jańalyq kóp. Ońdasyn ELÝBAI, jýrnalıst Shyǵys Qazaqstan oblysy, Zaısan aýdany